Levítico 18 - Qheshwa Biblia DC

Ayllupi allinta kausanamanta

^1-2 Señorqa kay jinata Moisesman parlarqa: Niy israelitasman noqa Señor Diosniykichej kasqayta.

³ Egiptopi maypichus qankuna tiyakorqankichej, imastachus paykuna ruwanku chaykunata ama ruwankichejchu. Mayqenmanchus pusasqaykichej chay Canaán sutiyoj jallp'aj ususnintapis ama ruwankichejchu, nitaj kamachiykunasnintapis ruwankichejchu.

⁴ Noqaj kamachisqasniyta junt'ankichej; nisqasniytapis kasunkichej, chaykunaman jinataj kausankichej. Noqaqa Señor Diosniykichej kani.

⁵ Nisqasniyta, kamachisqasniytapis kasunkichej. Pillapis chaykunata junt'ajqa kausanqa. Noqamin Señorqa kani.

⁶ Ni pi qharipis renqachu familianmanta kaj warmiwan puñuykakapoj. Noqamin Señorqa kani.

⁷ Tataykita ama p'enqaypi rikhurichinkichu mamaykiwan puñuykapuspa, payqa mamaykimin, mana chaytaqa ruwayta atinkichu.

⁸ Ama tataykitaqa p'enqaypi rikhurichinkichu warminwan puñuykapuspa.

⁹ Ama panaykiwan puñuykapunkichu, ni tataykimanta panayki kajtin, nitaj mamaykimanta panayki kajtimpis. Tataykej wasimpipis nacechun, wajpipis nacechun, amapuni paywan puñuykapunkichu.

¹⁰ Ama warmi allchhiykiwan puñuykapunkichu, warmi wawaykejtapis kachun, chayri qhari wawaykejtapis kachun. Amapuni paywan puñuykapunkichu.

¹¹ Ama tataykej ususinwan puñuykapunkichu, imaraykuchus chay ususeqa tataykej wawan, chayrayku qampataqa panayki, waj mamayoj kajtimpis. Amapuni paywan puñuykapunkichu.

¹² Ama tataykej pananwan puñuykapunkichu; imaraykuchus kikin tataykej yawarnillanmantataj.

¹³ Ama mamaykej ñañanwan puñuykapunkichu; imaraykuchus kikin mamaykej yawarnillanmantataj.

¹⁴ Ama tioykita p'enqachinkichu warminwan puñuykapuspa, imaraykuchus payqa tiayki.

¹⁵ Ama qhachuniykiwan puñuykapunkichu, payqa wawaykej warmin; chayrayku ama paywan puñuykapunkichu.

¹⁶ Ama wauqeykita p'enqaypi rikhurichinkichu warminwan puñuykapuspa.

¹⁷ Ama uj warmiwan, ususintinwan puñuykapunkichu; nitaj ususi allchhinwan, chay warmej qhari wawampatapis kachun, chayri warmi wawampatapis kachun. Amapuni paywan puñuykapunkichu. Chayqa ancha millaymin, imaraykuchus payqa kikin yawarninkumanta kashan.

¹⁸ Ama uj warmiwanqa ñañantinwan casarankichu, nitaj paywan puñuykapunkichu warmiyki kausashajtenqa, ama paywan chejninakunankupaj.

¹⁹ Ama uj warmiwan puñuykapunkichu killampi yawarnin jamushajtin.

²⁰ Ama runa masiykej warminwan puñuykapunkichu, ajinamanta qanqa mana llimphupajchu qhawasqa kanki.

²¹ Amapuni Moloc nisqa lantiman wawasniykita mayqentapis rikuchikuta jina qonkichu. Ama chay jinamanta Diosniykej sutinta qhesachankichu. Noqamin Señorqa kani.

²² Ama pi qhariwampis puñuykapunkichu, warmiwampis puñushawaj jina; chayqa millay juchamin.

²³ Ama ima uywawampis puñuykapunkichu, uj warmiwan jinaqa, ama chay jinamanta ch'ichichakunaykipaj, nillataj warmispis. Chayqa millay juchamin.

²⁴ Ama chay jinamanta millayta juchachakunkichejchu. Chay imaswan chay ayllus juchacharkorqanku, mayqenkunatachus kunan qankunaj ñaupaqeykichejmanta wijch'usaj.

²⁵ Jinallataj chay llajtasninkupis millay ch'ichichasqas qhepakorqanku. Noqataj chay juchasninkumanta cuentata mañarqani. Chay jallp'aspis qharqomorqa chaypi tiyaj runasta.

²⁶ Qankunaqa israelitas, jinallataj qankunawan tiyakoj karu llajtayojkunapis kamachiykunasniyta, imastachus nisqasniytapis kasukunkichej. Qankunaqa ama ni mayqen kay millay juchasta ruwankichejchu.

²⁷ Kay tukuy millay juchasta ruwarqanku qankunamanta ñaupajta kay jallp'api tiyajkuna, chayrayku jallp'aqa millay ch'ichichasqa qhepakorqa.

²⁸ Pajtataj qankunatañataj chay jallp'aqa wijch'umusunkichejman chay millay juchasrayku, imaynatachus qankunamanta ñaupajta kaj runasta wijch'orqa jinataqa.

²⁹ Pillapis chay jatuchaj millay juchasta qankuna ukhumanta ruwajqa, ayllun ukhumanta chinkachisqa kanqa.

³⁰ Chayrayku, noqaj nisqayta sumajta waqaychankichej. Ama qankunaqa urmankichejchu, qankunamanta ñaupajta karqanku chay runaspa millay ruwasqasninkuta ruwaspaqa. Nillataj chaykunawan ch'ichichakunkichejchu. Noqaqa Señor Diosniykichejqa kani.