Levítico 16 - Qheshwa Biblia DC

Juchaj pampachakuynin p'unchay

¹ Señorqa Moisesman parlarqa Aarompa iskaynin wawasnin wañusqankumantaña. Paykunaqa wañorqanku Señorpa ñaupaqenman qayllaykusqankurayku.

² Chaypi Señorqa Moisesman nerqa: Wauqeyki Aaronman niy, ama sapa kuti Diospa tiyakunanman yaykunankuta, mayqenchus veloj wasampi kashan chayman, nillataj Diospa leyninwan kashan chay cajompa kirpanan qayllamampis, ama payñataj wañunampaj. Imaraykuchus noqaqa rikuchikuni uj phuyupi chay kirpana patapi.

³ Aaronqa Dios maypichus kashan chayman yaykuchun uj torillo aysarisqa juchamanta uj rikuchikuta jaywanampaj. Apamullachuntaj uj carnerota ruphachisqa kanampaj.

⁴ Linomanta ruwasqa p'achata churakuspa jamuchun Diospa tiyakunanman. Ukhunmampis churakuchun linomanta ruwasqa calzoncillosta, jinaspataj linomanta chumpiwan chumpikuchun. Umanmampis churakuchun linomqanta ruwasqa muru ch'uluta. Chaykunaqa llimphupaj qhawasqa p'achas kanku. Churakunampajqa ukhusninta yakuwan mayllakuchun.

⁵ Israel ayllupis Aaronman iskay chivosta apamonqa juchaj cuentanmanta, uj carnerotawan ruphachisqa kanampaj.

⁶ Señorman jaywanqa chay torillota juchaspa cuentanmanta, Señormanta perdonta tarinampaj, paypa juchasninmanta, jinallataj familiampa juchasninmantapis.

⁷ Chaymantataj chay iskay chivostañataj Señorman jaywanqa Dioswan tinkukuna toldo punkupi.

⁸ Jinaspataj chay chivos patapi suerteta choqanqa. Ujnin kajqa Señorpaj kanqa, ujnin kajtaj Azazelpaj kanqa.

⁹ Mayqen kaj chivomanchus suerte chayanqa Señorpaj kanampaj, chay chivota Aaronqa Señorman jaywanqa uj rikuchikuta juchasmanta.

¹⁰ Mayqen chivomanchus chayanqa Azazelpaj choqasqa suerte, kausashajta Señorpa ñaupaqenman apanqa, juchasmanta perdonta tarinampaj. Chaymantataj ch'in pampaman kachariponqa, maypichus Azazel kashan chayman.

¹¹ Chaymantataj Aaronqa torillo ofrendta apachimonqa rikuchikuta Señorman jaywanampaj kikin juchasninmanta, paypa juchasninmanta perdonta tarinampaj, jinallataj familiampajpis.

¹² Chaymantaqa incienso q'osñichinata apamonqa nina brasas junt'ayojta, Señorpa ñaupaqempi kashan chay altarmanta. Apamullanqataj iskay maki q'apiy kutasqa sumaj inciensota. Jinaspataj chayta apanqa maypichus velo kashan chaypa wasanman.

¹³ Jinaspataj chay nina brasasman jich'aykonqa chay inciensota Señorpa ñaupaqempi. Chay inciensoj q'osñintaj Diospa leyninwan kashan chay cajompa kirpananta pakaykonqa. Ajinamanta Aaronqa mana wañonqachu.

¹⁴ Chay torilloj yawarnintataj uj chhikata jap'enqa, jinaspataj dedonwan ch'ajchumonqa chay kirpanaj inti llojsimuyninnejman. Jinaspataj qanchis kutita chay yawarta dedonwan ch'ajchumonqa chay kirpanaj ñaupajninta.

¹⁵ Chaymantataj chay chivota ñak'anqa israelitaspa juchankumanta rikuchikuta Señorman jaywanampaj. Chay chivoj yawarnintataj veloj wasannejman apanqa. Chay ukhupitaj kirpanaj patanta ñaupajnintawan ch'ajchonqa, imaynatachus torilloj yawarninwan ruwarqa ajinata.

¹⁶ Ajinamanta maypichus Diospa tiyakunanqa llimphuchasqa kanqa israelitaspa millay imasninkumanta, machu machu kayninkuwan juchasninkuwan ima ch'ichichasqa kasqanmanta. Kikillantataj ruwanqa Dioswan tinkukuna toldotapis; chay kashan israelitaspa chaupinkupi, tukuy millay kayninkoj chaupimpi ima.

^17-18 Aaronqa Diospa tiyakunan toldo ukhupi kanankama, juchasmanta perdonta mañaspa, chaymanta llojsimunankamataj ni pipis Dioswan toldo ukhupi kanqachu. Chay ukhupi perdonta mañamuytawan paypaj, familiampaj, tukuy israelitaspajwan, renqa Señorpa ñaupaqempi kashan chay altartañataj llimphuchaj. Torillojta, jinallataj chivojtapis uj chhikata apaspa chaywan altarpa esquinasninta wajras jina kajta jawenqa.

¹⁹ Jinaspataj qanchis kutita chay yawarta dedonwan altarman ch'ajchumonqa. Ajinamanta altarta israelitaspa millay juchasninkumanta llimphuchanqa, Diospajtaj t'aqanqa.

²⁰ Aaronqa Diospa tiyakunanta, Dioswan tinkukuna toldota, altartawan llimphuchayta tukuytawanqa, kausashallarqaraj chay chivota apachimonqa.

²¹ Chay chivoj umanman makisninta churaykuspataj, nenqa israelitaspa tukuy juchasninkuta, Diospa contrampi oqharikusqankuta, tukuy ima sajra ruwasqasninkutawan. Chay jinamanta israelitaspa juchasninkuta chay chivoj uman pataman churanqa. Chaymantataj chay chivota uj kachawan apachenqa, ch'in pampaman kacharpayamunampaj.

²² Ajinamanta chay chivoqa israelitaspa tukuy juchasninkuta ch'in pampaman apanqa. Chayman chay apaj runaqa kacharpayamonqa.

²³ Chaymantataj Aaronqa Dioswan tinkukuna toldoman yaykonqa. Chaypitaj linomanta ruwasqa p'achasninta lluch'ukonqa, mayqenkunatachus churakorqa Diospa tiyakunanman yaykunampaj, chay kikimpitaj saqeponqa.

²⁴ Diospaj uj t'aqasqa cheqapi yakuwan mayllakonqa. Chaymantataj p'achasninta churaykukuspa llojsimonqa, paypa rikuchikunta Señorpaj ruphachenqa, israelitaspatapis ruphachillanqataj. Ajinamanta perdonta tarenqa paypa juchasninmanta, israelitaspa juchasninmantawan.

²⁵ Juchaspa cuentanmanta ofrendaj wirasnintataj altar patapi ruphachenqa.

²⁶ Pichus chay chivota aparqa ch'in pampaman kacharpayamunampaj Azazelpaman chayqa, p'achasninta, ukhusninta ima yakuwan mayllakonqa. Chaymantataj jaramanqa yaykuyta atenqa.

²⁷ Chay torillowan, cabra chivowan juchaj cuentanmanta jaywasqa karqanku, yawarninkutaj Diospa tiyakunanman apasqa karqanku, chaykunaj qarasninta, aychanta, phusnusninta imaqa, jaramanta jawaman orqhospa ninawan ruphachimonqanku.

²⁸ Pichus chaykunata rupachimojqa p'achasninta t'ajsakuchun, ukhusnintawan yakuwan mayllakuchun. Chaymantaraj jaramanqa yaykuyta atenqa.

²⁹ Kay kamacheyqa qankunapaj wiñaypaj kanqa: Qanchis kaj killapi chunka días kashajtin sinch'itapuni tukuy sonqoykichejpi llakikunkichej ayunankichejtaj. Chay p'unchaypeqa ni imata ruwankichejchu, ni kikin llajtayoj israelitas, nitaj karu llajtayojkuna qankunawan tiyakojkunapis.

³⁰ Imaraykuchus chay p'unchaypi juchasniykichejmanta perdonasqas kankichej Señorpa ñaupaqempi. Jinamanta qankunaqa chay juchasniykichejmanta llimphuchasqas kankichej.

³¹ Kay kamacheyqa wiñaypaj kanqa. Chay p'unchay qankunapajqa uj sumaj samarina p'unchay kashan. Chaypi sinch'itapuni sonqoykichejpi llakikunkichej ayunankichejtaj.

³² Sacerdotepaj aceitewan jawisqa kajqa mayqenchus t'aqasqa karqa tatampa cuentanmanta sacerdote kanampaj chay kajqa, rikuchikuta jaywanqa juchamanta perdonta tarinampaj. Chantapis linomanta ruwasqa t'aqasqa p'achasta churakonqa.

³³ Jinamanta Diospa tiyakunan cheqata llimphuchanqa; jinallataj Dioswan tinkukuna toldota, altartapis. Jinaspataj perdonta tarenqa sacerdotespaj, jinallataj tukuy israelitaspajpis.

³⁴ Kay kamacheyqa wiñaypaj kanqa: Watapi uj kutita ruwankichej kay jinata juchasmanta perdonta tarinaykichejpaj, ima juchastachus israelitas ruwanqanku chaykunamanta. Kaykunaqa ruwakorqa imaynatachus Señorqa Moisesman kamachisqanman jina.