Levítico 15 - Qheshwa Biblia DC

Qharej mana llimphu kayninmanta

^1-2 Señorqa Moisesman Aaronmanwan kay jinata parlarqa: Israelitasman niychej kay jinata: Mayqen runajllatapis mujun llojsipullajtimpuneqa, mana llimphupajchu qhawasqa kanqa.

³ Chay mujun llojsipullajtimpuni, chayri surumuynin ukhumpi sayaykapojtimpis, chay runaqa mana llimphupaj qhawasqallapunichu kanqa.

⁴ Maypichus chay onqoyniyoj runa puñun chay cheqa mana llimphupajchus qhawasqa kanqa. Chantapis imaspichus chay runas tiyakun chaykunasnintin mana llimphupajchu qhawasqas kanqanku.

⁵ Pillapis chay runaj puñunanta llankhanman chayqa, chay llankhaj runaqa p'achasninta t'ajsakunan tiyan, paypis yakuwan mayllakunan tiyan. Ch'isiyaykama mana llimphupajchu qhawasqa kanqa.

⁶ Pillapis chay onqoyniyoj runa imapichus tiyasqampi tiyakunman chayqa, p'achasninta t'ajsakunan tiyan, jinallataj paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

⁷ Pillapis chay onqoyniyoj runata llankhajqa, p'achasninta t'ajsakunan tiyan, jinallataj paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

⁸ Sichus chay onqoyniyoj runaqa uj llimphu nisqa runaman thoqaykunman chayqa, chay thoqaykuchikoj runa p'achasninta t'ajsakunan tiyan, jinallataj paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

⁹ Ima monturallamampis chay onqoyniyoj runa tiyaykunman chayqa, chay monturaqa mana llimphupaj qhawasqachu kanqa.

¹⁰ Pillapis chay runaj tiyasqanta llankhan chayqa, chay llankhajqa ch'isiyanankama mana llimphupaj qhawasqachu kanqa. Chanta pillapis chay onqoyniyoj tiyasqa imasta apaykachajqa, p'achasninta t'ajsakunan tiyan, jinallataj paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

¹¹ Pillatapis chay onqoyniyoj runaqa mana mayllakuspalla llankhanman chayqa, chay llankhachikojqa p'achasninta t'ajsakunan tiyan, paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

¹² Sichus chay onqoyniyoj runa ima t'uru mankallatapis llankhanman mana mayllakuspalla chayqa, chay mankaqa p'akisqa kanqa. Chanta sichus maderamanta imasta llankhanman chaypis, chaykunaqa mayllasqas kananku tiyan.

¹³ Sichus chay runaj mujun llojsipullasqanmantapuni thañikun chayqa, chay runaqa qanchis p'unchayta suyanqa llimphuchasqa kanampaj. Chaymantataj p'achasninta t'ajsakonqa, paypis mayllakonqa juturi yakuwan, jinamanta chay runaqa llimphuchasqa kanqa.

¹⁴ Pusaj kaj p'unchaypitaj iskay juruk'utasta apamonqa, chayri iskay irpasta. Jinaspataj renqa Dioswan tinkukuna toldo punkuman. Chaypitaj sacerdoteman jaywamonqa Señorpa ñaupaqempi.

¹⁵ Sacerdotetaj chaykunamanta ujninta rikuchikuta jina jaywanqa, runaj juchasninmanta, ujnintataj ruphachenqa. Ajinata sacerdoteqa Señorpa ñaupaqempi chay mujun suruchikoj runapaj ruwanqa, llimphupaj qhawasqa kanampaj.

¹⁶ Pi runajllamantapis mujun llojsinman chayqa, yakuwan ukhusninta mayllakuchun. Ch'isiyaykamataj chay runaqa mana llimphupajchu qhawasqa kanqa.

¹⁷ Sichus chay runaj mujun ima p'achaman, chayri qaraman urmanman chayqa, chay imasta yakuwan t'ajsananku tiyan. Ch'isiyaykamataj mana llimphupajchu qhawasqa kanqa.

¹⁸ Sichus uj qhari uj warmiwan puñunman mujuntaj llojsinman chayqa, iskayninku yakuwan mayllakunanku tiyan. Ch'isiyanankamataj iskayninku mana llimphupajchu qhawasqa kanqanku.

Warmej yawarnin imaynachus kananmanta

¹⁹ Sichus uj warmi killampi kashanman chayqa, qanchis diata mana llimphupajchu qhawasqa kanqa. Pillapis chay warmita llankhajqa ch'isiyanankama mana llimphupajchu qhawasqa kanqa.

²⁰ Imapichus chay killayoj warmi puñun killampi kanankama chay imasqa mana llimphupajchu qhawasqa kanqa. Chanta imapichus chay warmi tiyakunman, chaypis mana llimphupaj qhawasqachu kanqa.

²¹ Pillapis chay killayoj warmej puñunanta llankhanman chayqa, chay llankhajqa p'achasninta t'ajsakunan tiyan, jinallataj paypis mayllakunan tiyan. Ch'isiyaykamataj mana llimphupaj qhawasqachu kanqa.

²² Imapichus chay killayoj warmi tiyakorqa, chayta pillapis llankharejqa p'achasninta t'ajsakunan tiyan, paypis yakuwan mayllakunan tiyan. Ch'isiyanankamataj mana llimphupajchu qhawasqa kanqa.

²³ Jinallataj maynejpichus chay killayoj warmi puñorqa, chayri tiyarqa chayqa, chay imasta llankhajqa mana llimphupajchu qhawasqa kanqa ch'isiyanankama.

²⁴ Sichus pipis chay killayoj warmiwan puñunman, yawarninwantaj chimpachikunman chayqa, chay qhareqa qanchis p'unchayta mana llimphupaj qhawasqachu kanqa, jinallataj maynejpichus chay qhari puñonqa chay cheqapis.

²⁵ Sichus uj warmejta killanmanta astawan unaytaraj kan yawarnin, chayri yawar apaynin, chay yawarnin mayk'ajchus sayanankama, chay warmeqa mana llimphupaj qhawasqachu kanqa, imaynatachus killampi karqa ajinata.

²⁶ Maynejpichus chay warmi puñun, chayri maynejpichus tiyarqa chay yawarnin kanankama chayqa, chay imasqa mana llimphupajchu qhawasqas kanqanku, imaynatachus qhawasqas karqanku chay warmi killayoj kanankama, ajinata.

²⁷ Pillapis chay imasta llankhajqa mana llimphupaj qhawasqachu kanqa. Chay llankhajqa p'achasninta t'ajsakunan tiyan. Paypis yakuwan mayllakunan tiyan. Ch'isiyaykamataj mana llimphupajchu qhawasqa kanqa.

²⁸ Maypachachus chay warmej yawarnin sayan chaypachaqa, qanchis p'unchaytaraj sayanan tiyan, chaymantaraj llimphupaj qhawasqa kanqa.

²⁹ Pusaj kaj p'unchaypitaj iskay juruk'utasta apamonqa, chayri iskay irpasta: chaykunatataj sacerdoteman apanqa, Dioswan tinkukuna toldo punkuman.

³⁰ Sacerdotetaj chaykunamanta ujninta uj rikuchikuta jina chay warmej juchasninrayku jaywanqa, ujnintataj ruphachenqa. Ajinata sacerdoteqa Señorpa ñaupaqempi ruwanqa chay yawar killayoj warmipaj, llimphupaj qhawasqa kanampaj.

³¹ Ajinata qankunaqa israelitasta chay ch'ichi kay ninkumanta karunchachinkichej, chay jinamanta ama wañunankupaj, maynejpichus noqa paykuna ukhupi kashani chayta ch'ichichasqankurayku.

³² Kaykuna kanku kamachiykuna qharej mujun llojsimojtillampuni, chayri uj kutita llojsimojtimpis, chayrayku mana llimphupajchu qhawasqa kanqa.

³³ Jinallataj warmispis killankupi imaynachus kanankumanta, chaymanta qhepaman yawarninku jamojtillampunipis. Kay kamachiykunaqa kashan qharejta, warmejtapis mujun llojsejtin imaynachus kananmanta, jinallataj uj qhari puñojtin, warmipis killampi kashajtin.