Levítico 12 - Qheshwa Biblia DC

Onqokuytawan warmi llimphuchakunamanta

^1-2 Señorqa kay jinata Moisesman parlarqa: Israelitasman ninki: Maypachachus uj warmi wijsallisqa rikhurin, qhari wawatataj nacechikun chayqa, qanchis p'unchayta ch'ichipaj qhawasqa kanqa, imaynatachus killampi yawarniyoj kan ajinata.

³ Chanta chay wawaqa pusaj p'unchayninman circuncidasqa kanqa.

⁴ Chaymanta chay wawaj mamanqa kinsa chunka kinsayoj p'unchaytawanraj yawarninmanta llimphuchakonqa. Chaykamaqa ni imata Diospaj t'aqasqa kajta llankhanqachu, nitaj Dioswan parlana toldomampis yaykuyta atinchu, chay llimphuchakunan p'unchaykuna junt'akunankama.

⁵ Sichus mayqen warmi uj warmi wawata nacechikonqa chayqa, iskay semanata ch'ichipaj qhawasqa kanqa, imaynatachus killampi yawarniyoj kan ajinata, sojta chunka sojtayoj p'unchaytataj yawarninmanta llimphuchakonqa.

⁶ Chay warmej llimphuchakuynin p'unchaykuna junt'akojtintaj, chay qhari wawata nacechikusqanmanta, chayri warmi wawatapis, chay warmeqa Dioswan tinkukuna toldo punkuman Señorpaj apamuchun uj watayopj corderota sumaj q'apashajta ruphachinapaj. Apamullachuntaj uj irpa palomatawan, chayri uj jurk'utata juchampa cuentanmanta ruphachisqa kanampaj. Chaykunataqa sacerdoteman jaywanqa.

⁷ Sacerdotetaj chayta Señorman jaywamonqa, chay warmipaj juchasninmanta perdonta tarinampaj. Ajinamanta chay warmeqa yawar apayninmanta llimphuchasqa kanqa. Kaykunas kanku kamachiykunas qhari wawas, chayri warmi wawas nacenankumanta.

⁸ Sichus chay warmejta mana tiyakunchu corderota apamunampaj chayqa, apamuchun iskay jurk'utasta, chayri iskay irpa palomasta. Ujnin kajqa Señorpaj sumaj q'apashajta ruphachinapaj kanqa, ujnintaj juchasnimpa cuentanmanta rikuchikuta ruphachinapaj kanqa. Chaymantaqa sacerdote chay rikuchikuta jaywasqanrayku warmej juchasnin pampachasqa, llimphuchasqataj kanqa.