Levítico 10 - Qheshwa Biblia DC

Nadabpata Abiujpatawan juchanku

¹ Aarompa wawasnin, Nadabwan, Abiuwan, sapa ujninku juch'uy braserosta oqharispa, chaykunamantaj ninata inciensotawan churaykorqanku. Chaytataj Señorman jaywarqanku millaypaj qhawasqa ninata, mayqentachus Señorqa mana kamacherqachu, chay ninata larwachinankuta.

² Chaypacha Señorpa ñaupaqenmanta ujllata nina llojsimuspa paykunata ruphaykorqa. Ajinamanta iskayninku Señorpa ñaupaqempi wañorqanku.

³ Chaymantataj Moisesqa Aaronman nerqa: Kaytamá Señorqa niyta munarqa kay jinata nishaspa: Noqaman qayllamuwajkunamanqa llimphu kayniyta rikuchisaj. Tukuynin israelitasman jatun lliphipiyniyta rikuchikusaj, nispa. Aaronqa ch'inlla karqa.

⁴ Moisestaj Aarompa tíon Uzielpa wawasnin Misaelta, Elzafantawan wajyarqa, nerqataj: Jamuychej, orqhonkichej qankunaj ayllusniykichejta Dioswan tinkukuna toldomanta, jaramanta jawaman.

⁵ Paykunataj qayllaykuspa p'achasninkumanta jap'ispa Jaramanta jawaman aparqanku, Moisespa nisqanman jina.

Imaschus sacerdotespa ruwanankumanta

⁶ Chaymantataj Moisesqa Aaronman, Eleazarman, Itamarmanwan nerqa: Ama q'ara umalla kaychejchu, nitaj p'achasniykichejtapis llik'ikuychejchu, wañusqarayku llakisqa kasqaykichejta rikuchispa, ama qankunapis wañunaykichejpaj, amataj qankunarayku Dios astawan sinch'i phiñakuyninta israelitasman rikuchinampaj. Manachayqa tukuynin ayllu masiykichej israelitasqa Señormin wañojkunata ninawan ruphachisqanmanta waqallachunku.

⁷ Amataj karunchakuychejchu Dioswan tinkukuna toldomanta, ama qankunapis wañunaykichejpaj, imaraykuchus Señorpa ajllasqan jawina aceiteqa qankunapi kashan, nispa. Paykunataj Moisespa kamachisqanman jina ruwarqanku.

^8-9 Señorqa Aaronman kay jinata parlallarqataj: Qan, chayri wawasniyki Dioswan tinkukuna toldoman yaykunaykichej kajtenqa, ama ujyankichejchu vinota, nitaj ima machachej ujyanastapis, ama wañunaykichejpaj. Kayqa uj ley tukuy miraykunasniykichejpaj wiñaypaj.

¹⁰ Ajinamanta qankunaqa allinta rejsinkichej Diospaj t'aqasqa kajta mana allin millay kajmanta; llimphu nisqa kajtataj, ch'ichi nisqa kajmanta.

¹¹ Chaymanta israelitasman atinaykichejpaj yachachiyta Señorpa tukuy kamachiykunasninta, paymin Moisesnejta chaykunataqa qosorqachej.

¹² Chaymanta Moisesqa Aaronman, iskaynin qhepakoj wawasnin Eleazarman, Itamarmanwan kay jinata nerqa: Señorman chay ch'aki mikhuy rikuchikuta qosqaykichejmanta puchojtaqa jap'ispa, mana levadurayojta mikhuychej altarpa qayllampi. Chay rikuchikoqa may t'aqasqamin.

¹³ Chaytaqa mikhuychej Diospaj t'aqasqa cheqapi. Chayqa qanman wawasniykimanwan chayasunkichej Señorman qosqa ruphachisqa rikuchikusmanta. Kayta Señorqa kamachiwarqa.

¹⁴ Pecho aychatarí sumajnin kaj rikuchiku kashan chayta, pierna aychatawan, qankunaman qosqa kajta mikhunkichej Diospaj t'aqasqa cheqapi, qan, qhari wawasniyki, warmi wawasniyki ima. Chaykuna qankunaman chayasunkichej israelitaspa apamusqankuta allinyakuy rikuchikusmanta.

¹⁵ Pierna aycha qankunaman qosqa kajqa, pecho aychantawan sumajnin kaj rikuchiku kashan, chayqa apasqa kachun Señorpa ñaupaqenman. Chayta jaywaychej uj sumaj richuchikuta jina, ruphachisqa kanampaj apamunku chay wirastawan khuska. Chayqa qampaj, wawasniykipajwan kanqa Señorpa kamachisqanman jina.

¹⁶ Chanta Moisesqa taporqa, chay chivomanta juchaspa cuentanmanta apamusqanku chaymanta. Chay chivotataj ñapis ruphaykuchisqankuña. Paytaj phiñakorqa, Aarompa iskaynin qhepakoj wawasnimpaj, Eleazarpaj, Itamarpajwan. Kay jinatataj nerqa:

¹⁷ Imaraykutaj juchasrayku rikuchikuta mana mikhorqankichejchu Diospaj t'aqasqa cheqapiri? Chayqa may t'aqasqamin. Chayta Señorqa qankunaman qosorqachej, qankuna israelitaspa juchasninta apanaykichejpaj, chaywan paykunaj juchasninku Señorpa ñaupaqempi pampachasqa kanampaj.

¹⁸ Yawarqa, mana Dioswan tinkukuna toldoman apasqa kasqanrayku, qankuna Diospaj t'aqasqa chay cheqapi mikhunaykichej karqa chay rikuchikuta, noqa kamachisqayman jina.

¹⁹ Aarontaj payman kuticherqa: Kunan paykuna Señorman jaywarqanku rikuchikuta, ruphachisqa kanan karqa chaytawan; kayqa noqaman kay imas pasawarqa. Sichus chay juchasrayku jaywasqa rikuchiku aychasta mikhuyman karqa chayqa, Señorpaj allillanchu kanman karqa?

²⁰ Moisesqa chayta uyarispa, walejpacha kasqanta nerqa.