Levítico 1 - Qheshwa Biblia DC

Rikuchikusta ruphachinamanta

^1-2 Señorqa Moisesta wajyarqa Dioswan tinkukuna toldomanta, ajinata nispa: Israelitasman niy: Uywasmanta jaywanawankupaj ofrendasta apamuwanqanku chayqa, apamuwachunku wakasmanta, chayrí ovejasmanta.

^3-4 Sichus wakasmanta uj rikuchikuta ruphachipunawampaj mayqempis apamuwanqa chayqa, apamuwachun sumajnin kaj torota mana iman imanasqata. Ajinamanta Diospaj allin kanampaj, chaytaqa Señorpa ñaupaqempi jaywanqa, Dioswan tinkukuna toldo punku yaykuypi, makinta chay uywaj umanman churaykuspa. Ajinamanta juchasnimpa cuentanmanta chay uywa ruphachisqa kanqa.

⁵ Chay runaqa Señorpa ñaupaqempi torotaqa ñak'anqa. Chaymantaqa chay toroj yawarninta Aarompa mirayninmanta kaj sacerdotes Señorman jaywanqanku. Chaymantataj Dioswan tinkukuna toldo punku yaykuypi kashan chay altarta yawarwan ch'ajchonqanku patanta tukuy muyuyninta ima.

⁶ Pichus uj uywata apamojqa qaranta ch'uskenqa, aychasnintataj chhikan chhikanta khuchuranqa.

⁷ Sacerdotesqa altar pataman llant'ata churanqanku, chaymantaj ninata jap'ichenqanku.

⁸ Chay nina patamantaj toroj khuchurasqa aychasninta, umasninta, wirasnintawan churanqanku.

⁹ Chanta chay runaqa uywaj ch'unchulasninta, chakisnintawan mayllanqa. Chaymantataj sacerdoteqa tukuy chaykunata altar patapi ruphachenqa. Chay ruphachispa jaywasqampa q'apaynenqa Señorpaj allin kanqa.

¹⁰ Sichus ovejasmanta, chayri cabrasmanta, chayri rikuchikuta mayqempis apamonqa ruphachipunawampaj chayqa, apamuchun uj orqotapuni uj sumajnin kajta, mana iman imanasqata.

¹¹ Chaymantataj ñak'anqa Señorpa ñaupaqempi altarmanta pata ladonnejpi. Chaymantataj Aarompa mirayninmanta sacerdotesqa chay uywaj yawarninwan ch'ajchonqanku, chay altar patata, tukuy muyuynintinta ima.

¹² Chaymantataj chay runaqa uywaj aychasninta chhikan chhikanta ñak'anqa. Sacerdotetaj nina laurashaj pataman uywaj aychasninta, umanta, wirasninta ima.

¹³ Chanta chay runa mayllanqa, uywaj ch'unchulasninta, chakisnintapis. Chaymantataj sacerdoteqa, tukuy chaykunata ruphachenqa altar patapi. Chay ruphachispa jaywasqampa q'apaynenqa Señorpaj allin kanqa.

¹⁴ Sichus p'isqosmanta uj rikuchikuta mayqen apamonqa ruphachisqa kanampaj chayqa, juruk'utata, chayri paloma irpata apamuchun.

¹⁵ Chaykunatataj sacerdoteqa altar patapi Señorman jaywanqa. Chaymantataj k'ichirpayaytawan umanta, altar patapi ruphachenqa, yawarnintataj altarpa uj lado uyanman sut'uchenqa.

¹⁶ Buchenta orqhoytawan, inti llojsimuynejman altarpa ladompi chay ushphaman choqaykonqa.

¹⁷ Chay lijrayojtaqa khuskanninmanta p'akenqa mana iskayman t'aqaspa. Sacerdotetaj chay p'isqotaqa altarpi llant'a patapi ruphachenqa. Chay ruphachispa jaywasqampa q'apaynenqa Señorpaj allin kanqa.