Lamentaciones 5 - Qheshwa Biblia DC

Phishqa kaj llakiy: Llakisqa runaspa mañakuynin

¹ Kay jina mana allin imas qhatiriwasqaykumanta, Señor, yuyarikuwayku ari. Qhaway Señor, imaynatachus k'umuykachachiwasqaykuta.

² Tukuy imasniykuta waj runas jap'ikapunku. Wasisniykoqa waj runaspa makisninman chayan.

³ Mana tatayoj wajchas rikhuriyku. Mamasniyku viudas jina qhepakunku.

⁴ Yakullaykutataj qolqeykuwan rantikuyku. Llant'allaykutataj qolqeykuwan rantikuyku.

⁵ Atisqaykuta ñak'arichiwayku. Sinch'i sayk'usqaña kayku, mana noqaykupajqa samarikuy kanchu.

⁶ T'antawan sajsakunaykupajpis egipciosman, asiriosman ima makisniykuta jaywarqayku.

⁷ Tatasniykoqa juchallikorqanku, wañurapunkutaj. Chay jasut'iyninkutaj noqaykuman chayamuwayku.

⁸ Kamachispa kamachinan kayku. Ni pipis kanchu chaykunaj makisninmanta qhechunawaykupaj.

⁹ Wañuywan kausaywan t'antatapis jap'ikuyku, ch'impi sayaj suwaspa qhawashasqallan.

¹⁰ Uyaykoqa horno jina yanallaña, yarqhaywan ch'ayñasqaykupi.

¹¹ Siompi warmistaqa mana munashajta qhenchachacherqanku. Judá llajtapi sipaskunatapis kikillantataj ruwanku.

¹² Kurajkunataqa makisninkumanta warkhuykunku. Machu runastapis mana khuyakorqankuchu.

¹³ Aswan kallpayoj wayna runastaqa molinota khiwichimorqanku. Wakin pisi kallpayoj waynastataj ashkha llant'ata q'epirichispa, chay q'epej llasayninwan wañuracherqanku.

¹⁴ Punkuspi tiyakoj machu runaspis manaña rikukunchu. Waynakunaj takisqankupis manaña uyarikunchu.

¹⁵ Sonqoykupi kusiyniykoqa manaña kanchu; tusunaykupis llakiyman tukupun.

¹⁶ Umaykumanta pilloqa urmapun. Imanallasqaykuchus kunanqa, juchallikusqaykurayku.

¹⁷ Chayrayku sonqoykupi manchay llakiy tiyan. Chayrayku ñawisniykoqa chharpuyaykuwayku.

¹⁸ Sión orqoqa ch'impacha, atojkunallaña chaykunapeqa purishanku.

¹⁹ Qanqa, Señor, wiñaypajpuni kanki. Kamachiyniykeqa uj miraymanta uj miraykama chayanqa.

²⁰ Imaraykutaj chay jinatapuni qonqakapuwaykuri? Imaraykutaj kay chhika unaytaña saqerpariwaykuri?

²¹ Wajyakapuwayku ari Señor, noqaykutaj qanman jampusqayku. Kay p'unchayniykutaqa mosojyachiy ari, ñaupajta karqa ajinata.

²² Qanqa, Señor, unaytaña qhesachawayku. Qanqa anchatañapunitaj noqaykupaj phiñakunki ari, Señor.