Lamentaciones 4 - Qheshwa Biblia DC

Tawa kaj llakiy: Siompa jasut'iynin tukukun

¹ Chay jinatapuni qoreqa yanayaykusqa! Chhika sumaj qori lliphipiyninta chinkarichisqa! Dioswan parlana wasimpa rumisnimpis kaynejpi jaqaynejpi tukuy callespi t'aka t'akalla kashan.

² Sión llajtapi tiyakojkunaqa may sumajpaj qhawasqas karqanku, sumaj kaj qorimantapis aswan munasqas. Kunanqa kashanku uj mankeroj t'urumanta ruwasqan jinalla, mana allimpaj qhawasqas.

³ Atojkunapis uñasninkuman ñuñuchinku. Aylluypa wawanqa ancha sajra, ch'in pampapi suris jina.

⁴ Ñuñoj wawaspa qallusninkupis yaku ch'akiywan siminkuman k'askaykapullanña. Juch'uy wawas t'antata mañakunku, manataj pipis t'antata jaywaj kanchu.

⁵ Pikunachus ñaupajta sumaj sumajllata mikhoj kanku, kunan yarqhaymanta callespi wañunku. Sumaj p'achaswan p'achallisqa kausajkuna, kunanqa q'opa jich'anaspi kausashanku.

⁶ Ayllusniypa wawasnenqa astawan juchata ruwanku Sodomamanta nisqaqa. Chay llajtaqa ujllapi chinkachisqa karqa, manaraj enemigos qayllaykushajtinku.

⁷ Ajllasqa runasninkoqa rit'imantapis, lechemantapis aswan yurajkunaraj karqanku. Ukhunkoqa puka puka coral nisqamantapis astawan karqa, uyankutaj uj sumaj kaj zafiro rumi jina.

⁸ Kunanqa uyanku yana oqepacha kashan, callepipis mana rejsiyta atinkuchu. Qarankupis tullunkuman k'askaykusqallaña, k'aspipachataj ch'akiykushan.

⁹ Espadaswan wañuchisqa kajkunaqa allin wañuyta wañunku, yarqhaywan ch'ayñaspa wañojkunamanta nisqaqa. Kaykunasqa pisimanta pisi kay jallp'a patapi mana mikhuna kajtin wañorqanku.

¹⁰ Ñaupajta k'acha khuyakuyniyoj warmis kajkunaqa, wawasnillankutataj wayk'uykakaporqanku. Kikin wawasnillankutataj mikhuykakaporqanku, aylluypa llajtan chay jina thuñisqa kajtin.

¹¹ Señorpa k'ajaj phiñakuyninta junt'an, k'ajaj phiñakuyninta kachamun. Sión llajtapi ninata jap'iykuchin, chaytaj cimientonmantapacha chinkarichin.

¹² Manapuni jayk'ajpis kay mundopi kaj chhika reyes, nitaj tukuy runaspis yuyarqankuchu, Jerusalén llajtaj punkunta enemigos, contraypi kajkuna ima chay jinatapuni junt'aykunankutaqa.

¹³ Chay jina jasut'eqa karqa profetas juchallikusqankurayku, sacerdotes millay juchasta ruwasqankurayku ima. Paykunaqa chay llajta ukhupi cheqan runaspa yawarninta jich'arqanku.

¹⁴ Chaymantataj paykunaqa tukuy callespi cherqos jina puriykachanku, p'achasninkupis yawar yawarlla kanankama. Chaynejta ni pipis p'achasnillankutapis t'ojpiykurejchu kanku.

¹⁵ Paykunaqa nej kanku: Jatariychej ch'ichi runas; ayqeychej, ayqeychej, ama llujchiychejchu, nispa. Paykunaqa ayqekusqanku, tukuynejman ch'eqerasqanku, manaña jayk'ajpis kaypeqa tiyanqankuchu kasqa, nisqalla tukuy nacionespeqa karqa.

¹⁶ Señorpa k'ajaj phiñakuynin paykunatqa tukuynejman ch'eqerachin, manaña astawan qhawarerqachu. Chaypi kaj sacerdotestapis mana manchachikorqankuchu, manataj chaypi kaj machu runastapis khuyakorqankuchu.

¹⁷ Imaynallapipis khuyakuyniykita qhasita qhawasqaykupi ñawiykupis chharpuyawaykuña. Noqaykoqa suyashallaykupuni uj nación manapuni salvayta atejta.

¹⁸ Purisqaykuta sumajta qhawawarqayku, chaynejta callestapis mana purerqaykuchu. Qayllamunña noqaykoj tukukunaykoqa. P'unchayniykoqa junt'akapun. Chayamunña tukukapunaykoqa!

¹⁹ Noqaykuta tukuchinawaykupaj qhatiykachajkunaqa, ankasmantapis astawan sinch'ita phinkiykachanku. Tukuy orqospi mask'awayku, jap'inawaykupajtaj tukuy ch'inkunaspi misk'anasta churanku.

²⁰ Señorpa ajllakusqan, pichus noqaykuta kausachiwajniykoqa preso urman. Paymanta noqaykoqa nej kayku: Tukuy nacionespa chaupimpi paypa llanthullampi kausasunchej, nispa.

²¹ Uzpa jallp'ampi tiyakoj Edom, mayta kusikuy ari. Qanmampis chay jaya copata ujyanaqa chayamullasonqataj. Ajinamanta qanqa machaykunki, mana p'achayojtaj kanki.

²² Sión llajta, jasut'iyniykeqa tukukun. Manaña jayk'ajpis kunanmantaqa maymampis Señorqa apachisonqachu. Chaywampis, Edom nación, juchaykitaqa Señor jasut'enqa. Juchaykitaqa imaynamantapis sut'imampuni orqhonqa.