Lamentaciones 3 - Qheshwa Biblia DC

Kinsa kaj llakiy: Diospa khuyakuynenqa jamumpuni

¹ Noqa kani Diospa phiñakuynimpa jasut'isqanta jap'ikojqa.

² Pay pusaykachawarqa purichiwarqataj mana k'anchayniyoj laqha ñankunasta.

³ Cheqamanta tukuy p'unchaynintin noqaman kutin kutinta makisninta churaykuwan.

⁴ Pay aychayta qaraytawan machuyachin. Tullusniytapis payllataj p'akiran.

⁵ Pay muyuyniypi sayarichin mana aguantay atina ñak'arina perqata.

⁶ Laqhapi saqerpariwan unayña wañusqasta jina.

⁷ Kancha ukhupi rikhurichiwan, ni mayninta llojsiyta atinichu; astawan cadenasniyta llasayaykuchipuwan.

⁸ Chhikata qhaparikushajtiypis ningrisninta wisq'aykukun, mañakusqayta mana uyariwanchu.

⁹ Sumaj ch'eqosqa rumiswan ñanniyta jark'aykuchin, chaki ñankunasniytapis wist'uyarpayachipuwan.

¹⁰ Pay noqapajqa mikhunawampaj wateqaj jukumari jina karqa. Pakaymanta wateqamoj león jinataj.

¹¹ Ñanniyta pantachiwan, mitha noqawantaj. Manchachikuywan kharkatishajta saqerpariwan.

¹² Flechanta mat'iykuspa sayaykuchiwan flechanawampaj.

¹³ Chay Señorpa flechamuwasqasnenqa ukhuyman sat'iykukunku.

¹⁴ Tukuy ayllusniy asipayawanku, sapa p'unchay paykunaj asikunanku jina kani.

¹⁵ Señorqa chay jina jaya llakiywan junt'aykuchiwan, jawa yakuwan machaykuchiwan.

¹⁶ Kirusniyta rumiwan chhamurawan, ushphapitaj sunt'ichiwan.

¹⁷ Almayqa imachus sonqo tiyakuymanta karunchakun, allin kajkunatapis qonqapuni.

¹⁸ Chanta nerqani: Kallpayqa tukukapun, jinallataj Señorpi suyayniypis.

¹⁹ Yuyarikuy ari llakiyniymanta, ñak'ayniymanta, jayaq'eta ujyasqaymantawan.

²⁰ Chayta noqaqa yuyarinirajpuni. Chaymanta maypi jinallaña yuyarini, almaytaj noqapi ñak'ashan.

²¹ Chay tukuywampis sonqoypi unanchasaj, chayrayku suyallasajpuni.

²² Señorpa munakuynenqa mana jayk'ajpis tukukunchu, khuyakuynimpis mana tukuchisqachu.

²³ Sapa paqarin mosojllapuni, qampa cheqan kayniykeqa mana tukukoj.

²⁴ Almayqa nin: Señorqa tukuy ima noqapajqa; chayrayku payllapi suyakusaj.

²⁵ Señorqa may k'acha pichus paypi suyajpaj, pichus payta mask'an chaypajpis.

²⁶ Señorpa salvacionninta ch'inmanta suyanaqa may sumajpuni.

²⁷ Uj runapajqa allimpuni wayna kasqanmantapacha kasukoj kananqa.

²⁸ Dios kamachejtin runaqa sapa tiyakuchun, ch'inlla kakuchun.

²⁹ Pampaman k'umuykukuchun, ichapis paypajqa suyay kanraj.

³⁰ Pichus maqajmanqa ujnin uyantawan kutirichichun, ajinamanta p'enqachisqa kayta jap'inampaj.

³¹ Señorqa mana wiñaypajchu qhesachawasunchej.

³² Llakichejtimpis, khuyakun, may chhikan khuyakuynin kasqanrayku.

³³ Payqa mana kusikunchu runasta llakichispa.

^34-36 Señorqa mana munakunchu carcelpi kajkunata mana khuyakoj sarojkunata. Manataj munakunchu patapi kaj Dios qhawamushajtin, runasta llakichejkunata. Pichus runaj cheqan kayninta qhasi mana kajman tukuchejkunatapis Señorqa mana munakunchu.

³⁷ Pitaj kanman, kaytaqa mana Señorchu apachimun, nejri?

³⁸ Tukuy sajra kaj, tukuy allin kajpis, manachu patapi kaj Diosmantapuni jamun?

³⁹ Runaqa imamantataj kay kausaypi waqanri? Runaqa juchan patapi waqachun.

⁴⁰ Allinta reparakunachej, Señorta mask'anachej, paymantaj kutirikunachej.

⁴¹ Janaj pachapi kashaj Diosninchejman, makisninchejta sonqonchejtawan oqharinachej.

⁴² Noqaykoqa qampa contraykita oqharikorqayku, manataj cheqantachu purerqayku. Chaymanta qanqa mana perdonawaykuchu.

⁴³ K'ajaj phiñakuyniykiwan qanqa muyuykuwarqayku, qhatiykachawarqaykutaj. Qanqa cantomanta mana perdonaspa wañuracherqanki.

⁴⁴ Phuyus ukhuman qanqa pakaykukunki, mañakususqaykuta ama uyarinawaykupaj.

⁴⁵ Uj millay p'enqaypi, millachikunapaj jinataj tukuy runaspa chaupimpi rikhurichiwayku.

⁴⁶ Tukuy enemigosniyku noqaykoj contrallaykutapuni parlarinku.

⁴⁷ Noqaykupajpuni tiyarqa manchachikuy, misk'anas, ch'inman tukuypis.

⁴⁸ Ñawiymanta waqayqa mayu yaku jina puririn, llajtaypa wawasnin chinkachisqas kasqankumanta.

^49-50 Ñawisniymantaqa waqayllapuni surumun mana sayk'uyta, imaraykuchus manapuni samariyta tarinichu, Señor janaj pachamanta qhawarimunankama.

⁵¹ Ñaweyqa maytapuni sonqoykama nanawan, llajtaypa warmi wawasninta llakiypi rikuspa.

⁵² Enemigosneyqa p'isqota jina jap'irawanku, mana imallamanta.

⁵³ Kausashajta pozoman wijch'uykuwanku, pataymantaj uj rumiwan atiykuwanku.

⁵⁴ Umaykama yaku junt'aykamuwan, chaypitaj nerqani: Wañusqaña kani kunanqa, nispa.

⁵⁵ Noqaqa pozo ukhumantapacha sutiykita qhaparikorqani, Señorníy.

⁵⁶ Qanqa parlasqayta uyariwarqanki. Mañakususqaytapis uyariway ari.

⁵⁷ Qhaparikamushasojtiy qanqa qayllaykamuwaspa niwarqanki: Ama manchachikuychu, nispa.

⁵⁸ Almaymanta qanqa Señor kutikuspa sayaykorqanki, kausayniytataj librawarqanki.

⁵⁹ Qan rikushawanki, Señor, kajmanta mana kajmanta ñak'arichiwasqankuta; chayrayku, Señor, justiciata ruwaway ari.

⁶⁰ Qan rikushayki imaynatachus ruwanawankupaj wakichikusqankuta, noqaj contraypi tukuy yuyasqankutapis.

⁶¹ Qan uyarishanki Señor, toreawasqankuta; tukuy sajra imasta contraypi wakichisqankutawan.

⁶² Tukuy parlasqanku, yuyasqankupis, sapa p'unchay noqaj contrallaypipuni.

⁶³ Tiyaykukuspataj, sayaykuspataj noqallatapuni takipayawanku.

⁶⁴ Kunanqa, paykunaman kutichiy ari, Señor, imatachus ruwasqankuman jina.

⁶⁵ Sonqosninkuta astawan rumiyachiy, ima mana allintachus nisqaykeqa paykunaman chayachun.

⁶⁶ Chay k'ajaj phinakuyniykiwan qhatiykachay, kay jallp'a patamantataj chay runasta chinkachiy ari, Señor.