Jueces 8 - Qheshwa Biblia DC

Gedeonqa jap'ichin madianitaspa reykunasninkuta

¹ Efraimpa ayllunmanta kajkunaqa, phiñarikorqanku siminakorqankutaj Gedeonwan, paykunata mana wajyachisqanrayku madianitaswan maqanakunankupaj.

² Gedeontaj kuticherqa: Manachu reparakorqankichej, qankuna noqamanta astawan ruwasqaykichejta. Chay pisi ruwasqaykichejqa astawanraj valen noqaykoj ruwasqaykumanta nisqaqa.

³ Diosqa jaywasorqachej Orebta Zeebtawan qankunaj makiykichejman, paykunaqa madianitaspa kurajkunasnin karqanku. Imatataj noqa ruwarqani qankunaj ruwasqaykichejmanta aswan allintari? Efrainmanta kajkunaqa, Gedeompa nisqanta uyariytawankama phiñakuyninkuta tiyaykucherqanku.

⁴ Gedeón kinsa pachaj runasninwan Jordán mayuman chayamuspa chimparqanku. Paykunaqa sinch'i sayk'usqas kasharqanku enemigosninkuta qhatiykusqankupi.

⁵ Sucotpitaj, Gedeonqa chaypi tiyakojkunata nerqa: Mikhuyta qoriychej noqawan khuska jamojkunaman, paykunaqa may sayk'usqas kashanku. Purishayku chay madianitaspa reykunasninku Zebata Zalmunatawan qhatiykachaspa.

⁶ Sucotpa kurajkunasninkutaj kuticherqanku: Zebata, Zalmunatawan jap'inkichejñachu chay soldadosniykita mikhuchinaykupajri?, nispa.

⁷ Gedeontaj paykunata kuticherqa: Señor jaywawajtinkama Zebata Zalmunatawan, kutimusaj qankunatataj ch'in pampa khishkaswan ithapalloswantaj seq'osqaykichej.

⁸ Chaymanta jamorqa Penielman, chaypipis mañakorqa Sucotpi jinallataj. Penielpi kajkunataj kuticherqanku Sucotpi jinallataj.

⁹ Gedeontaj paykunaman nerqa: Noqa atipaytawan kutimusaj chayqa chay torreta urmachisaj.

¹⁰ Zebawan Zalmunawan chunka phishqayoj waranqa runaswan kasharqanku Carcorpi. Paykunaqa puchorqanku chay pachaj iskay chunkayoj waranqa inti llojsimuynejmanta kaj soldados wañorqanku chaykunamanta.

¹¹ Gedeón ñaupajman rerqa chay ch'in pampanta muyuykoj ñanta, Nobamanta inti llojsimuynejninta chantá Jogbehannejta, uj mana yuyay ratopi jarankuman maqanakoj yaykunankupaj.

¹² Zebawan Zalmunawan ayqerqanku, Gedeontaj qhatiykuytawan jap'irparerqa. Tukuy soldadosninkutaj sinch'ita mancharikorqanku.

^13-14 Gedeón maqanakusqanmanta Heresninta kutimpushajtin, Sucotmanta uj waynata jap'erqa, payta tapojtintaj chay waynaqa Sucotmanta qanchis chunka qanchisniyoj kamachejkunajpa jinataj kurajkunasnimpa sutisninta qelqasqata qorqa.

¹⁵ Chaypacha Gedeonqa Sucotman rispa nimorqa chaypi tiyakojkunaman: Yuyarikunkichejchu imaynatachus asiykukuwarqankichej Zebarayku jinataj Zalmunanejta chayta? Yuyarikunkichejchu soldadosniyman t'antata mana qorisqaykichejta, paykuna may sayk'usqas kashajtinku, manaraj presosniykichejchu kanku, nispa? Qhawaychej, kunan kaypi kashanku.

¹⁶ Chaypacha Gedeonqa khiskasta ithapallustawan ch'in pampamanta apamuspa, chaykunawantaj jasut'iykorqa Sucotmanta chay kurajkunastaqa.

¹⁷ Ajinallatataj Penielpi torreta urmacherqa, chay llajtayojkunatataj wañuracherqa.

¹⁸ Chaymanta tapurerqa Zebata Zalmunatawan: Imaynataj karqanku chay Taborpi wañucherqankichej chay runasri? Paykunataj kuticherqanku: Qanman rijch'akorqanku. Sapa ujninkutaj uj reypa wawanman rijch'akorqa.

¹⁹ Chaypacha Gedeón qhaparerqa: Hermanosnillaytataj! Kikin hermanosnillaytataj qankuna wañucherqankichej! Cheqamanta Señorqa kausajmin. Manachus qankuna wañuchiwajchej karqa chayqa, manallataj noqapis wañuchiykichejmanchu kunanqa.

²⁰ Chay kikin ratopacha kamacherqa kuraj kaj wawan Jeterta: Jatarikuy wañurachiytaj, nispa. Jinapis Jeterqa as waynallaraj kasqanrayku mana espadanta orqhokamorqachu.

²¹ Chaypacha Zebawan Zalmunawan nerqanku Gedeonta: Qan wañuchiwayku, chaypi runataqa rejsinchej wapu kaynintaqa. Gedeontaj jatarikuytawankama wañurparicherqa, Zebajtawan Zalmunajtawan camellosninkoj kunkasninkupi kasharqa chay k'achanchasninta orqhokaporqa.

²² Chaypacha israelitasqa nerqanku: Ña qan kay madianitaspa makisninmanta kacharichiwaykuña, kunanqa munayku ari qan chantá ayllusniyki kamachinawaykuta.

²³ Gedeontaj paykunaman kuticherqa: Mana noqachu nitaj wawaychu kamachisonqachej, manachayqa Señor kamachisonqachej.

²⁴ Noqaqa munayman chay jap'erqankichej chay runaspa anillosninta qonawaykichejta. Chay anillostaqa chay enemigosninku ukhupi soldados apaykachaj kanku, chay ch'in pampasnejmanta runas kasqankurayku.

²⁵ Israelitasqa, uj qhatakunata pampaman mast'aykuytawankama, chayman churarqanku jap'isqasninku anillosta, nerqankutaj Gedeonman: Kayqa, jap'ikapuy nispa.

²⁶ Tukuynimpi chay qori anillosqa chunka isq'onniyoj kilosta aysarqa, chaypis wajlla karqa; k'achanchakunas, qorimanta kaj k'achanchakunas, jinataj chay Madianmanta reykunas p'achallikunasninkumanta puka telas, chay camellospa kunkasnimpi kaj k'achanchaspis.

²⁷ Gedeonqa chay qoriswan ruwarqa uj lantita, chaytataj Ofra llajtaman churaykorqa. Jinapis chay lantita ruwachisqanrayku Señorman mana cheqatachu purerqanku chay llajtayojkuna jinataj Israel ayllupis. Gedeompaj ayllumpajpis chayqa pantaypaj karqa.

²⁸ Ajina karqa israelitaspa kamachiyninkuman madianitas churakusqankoqa. Manañataj chaymantapacha madianitasqa israelitaspa contrampi oqharikorqankuchu. Tawa chunka watas junt'ata, Gedeón kausanankama allin tiyasqalla chay jallp'api kausakorqanku.

Gedeón wañupun

²⁹ Jerobaalqa chayri Gedeonqa kikin wasinman tiyakapoj rerqa.

³⁰ Ashkha warmisniyoj kasqanrayku qanchis chunka qhari wawasniyoj karqa.

³¹ Siquem llajtapitaj uj warmiwan tantakorqa, chay warmitaj uj qhari wawata paypaj nacechikorqa. Gedeontaj, Abimelecta suticharqa.

³² Ña ashkhaña watasnimpiña Gedeonqa wañuporqa. Paytataj p'ampaykorqanku tatan Joaspa covachampi. Chaytaj kasharqa Abiezerpa ayllumpa llajtampi.

³³ Gedeompa wañupusqanmanta qhepamanqa, israelitasqa Diosmanta qonqapuyta qallarillarqankuñataj Baalpa tukuy laya lantisninman yupaychaj rinankupaj. Baal-berit lanti nisqatataj ajllakorqanku diosninku kanampaj.

³⁴ Señor Diosninkumantataj qonqakaporqanku, Paymá tukuy enemigosninkumantaqa kacharicherqapis.

³⁵ Manataj chhika khuyakorqankuchu Jerobaalpa chayri Gedeompa ayllunmanta kajkunamantaqa, payqa sumaj imasta Israelpaj ruwarqapis.