Jueces 7 - Qheshwa Biblia DC

Gedeón atipaykun madianitasta

¹ Gedeontaj, pichus Jerobaal sutiyoj, tukuy paywan kajkunapiwan tuta tutamanta jatarikorqanku, Harod yakus chaypitaj jarakoj rerqanku. Madianitaspa jarankutaj vallepi kasharqa, paykunamanta astawan patanejpi, More orqo k'uchunejpi.

² Señorqa Gedeonman nerqa: Ancha ashkha runasta apamushanki, israelitasqa madianitasta atipaykojtinkoqa, alabakonqanku paykunallamanta salvakusqankuta creespa.

³ Chayrayku niy piskunachá manchachikunku chaykunata wasisninkuman ripunankuta. Jinamanta Gedeón pruebaman churajtinkama iskay chunka iskayniyoj waranqa runas wasisninkuman kutiporqanku, chunka waranqallaña qhepakorqanku.

⁴ Señor nillarqataj: Chaywampis ashkharajpuni. Pusay yakuman ujyanankupaj, chaypi pruebaman churasaj, nisqaykitaj pischus rinankuta, pistajchus mana rinankuta, nispa.

⁵ Gedeonqa pusarqa yakuta ujyamunankupaj, Señortaj nerqa: Pischus makisninkuwan alqo jina lakhospa ujyajkunata wajmantaj t'aqanki, chay pischus qonqoriykukuspa ujyanqanku chaykunamanta.

⁶ Pischus makinkuwan yakuta apaspa ujyarqanku lakhospa alqos jina chaykunaqa kinsa pachaj karqanku. Tukuy puchojkunaqa qonqor chakiykuspa ujyarqanku.

⁷ Chaypacha Señorqa Gedeonman nerqa: Kay kinsa pachaj runasllawan qankunata salvasqaykichej, atipachisqaykichejtaj madianitasta. Tukuy chaymanta puchojkunaqa atinku ripuyta.

⁸ Gedeón chaypacha kamacherqa chay puchojkuna wasisninkuman kutipunankuta; manaraj ripurashajtinkutaj tantacherqa wich'isninkuta, chivo wajrasmanta pututusninkutawan. Qhepakorqataj kinsa pachaj chijllasqas runasllawan, madianitas pampanejpi jarasqas kasharqanku chaynejmanta aswan patanejpitaj jarakorqanku.

⁹ Chay ch'isipitaj Gedeonman Señor kamacherqa: Jatarikuy, madianitaspa contrampi maqanakoj uraykuy, paykunataqa noqa makisniykiman churasaj.

^10-11 Sichus manchachikushanki paykunawan maqanakuyta chayqa, kamachiyki Furawan jarankuman uraykuychej, uyarimuytaj imastachus nisqasninkuta. Chaymantaqa astawan animasqa kanki paykunawan maqanakamunaykipaj. Chaypacha Gedeonwan chay kamachin Furawan uraykorqanku maynejkamachus enemigosninkoj wateqajkuna soldadosninku kasharqanku chaynejkama.

¹² Madianitaswan, amalecitaswan, chantá inti llojsimuynejmanta chay runaspis ch'eqerasqas langostas jina chay pampa junt'a kasharqanku. Camellosninkupis may chhika karqa mar qocha cantopi t'iya jinapuni.

¹³ Gedeón, enemigoj campamentonman qayllaykushajtintaj, uyarerqa uj soldadota waj soldadoman willarishajta chay ch'isi mosqokusqanmanta, nisharqataj: Mosqokorqani uj cebada t'anta jaranchejman bolalaykamushasqanta, ujnin toldoman qomuspataj urmarparichisqa.

¹⁴ Chay ujnintaj kuticherqa: Kayqa, Israelmanta Joaspa wawan Gedeompa espadampuni. Madianitastaqa jarantinta ima Gedeonman Diosqa jaywaykonqa, nispa.

¹⁵ Chay mosqoymanta willajta chantá ima niytachus munasqantataj uyarispa Gedeonqa Señorta yupaycharqa. Chaymantaqa kuterqa israelitaspa jarankuman, chaypitaj kamacherqa: Jatariychej, Señor jaywaykuwasunchej madianitaspa jaranta.

¹⁶ Chay ratopacha, chay kinsa pachaj runasninta kinsaman t'aqarparerqa, tukuyninkumantaj pututusta jaywarqa, chantá ch'usaj wich'istawan, ukhusnimpitaj k'ancha jap'ichinasniyojta.

¹⁷ Nerqataj: Maypachachus qhawajkuna soldados chayman chayajtiykama qhawawankichej imatachus noqa ruwasaj jinallatataj qankunapis ruwanaykichejpaj.

¹⁸ Maypachachus noqa chantá noqawan rejkunapis pututusta waqachejtiykukama qankunapis tukuy jaraj muyuynimpi waqachillankichejtaj, qhaparinkichejtaj: Señornejta Gedeonnejtataj, nispa.

¹⁹ Ajinaqa, Gedeón chay pachaj runasninwan khuska chayarqanku madianitaspa jarankumanta waj ladoman chaupi tutanejpi, wateqajkuna soldados cambiakushajtinkuña. Chay rato waqacherqanku pututusninkuta, jap'isharqanku chay wich'isninkutapis p'akillarqankutaj.

²⁰ Kinsantin t'aqas kajkuna ujllapi pututusninkuta waqacherqanku, wich'isninkutapis p'akillarqankutaj. Lloq'e makisninkupi apasharqanku nina k'anchanasta, pututusninkutataj paña makisninkupi, qhaparerqankutaj: Señornejta Gedeonnejtataj kay maqanakoqa.

²¹ Israelitasqa sapa ujninku mana ni mayman kuyuypa chay jaraj muyuynimpi qhepakorqanku, tukuynin madianitasqa qhaparispa ayqekorqanku.

²² Chaykamataj chay kinsa pachajnintin israelitasqa chay pututusninkutaqa waqachishallarqankupuni, Señortaj madianitas purata maqanacherqa, llojsispataj ayqekorqanku Bet-sitakama, Zerera ñanninta rispa, Tabat qayllapi Abel-mehola tinkuykama.

²³ Chaypacha tukuy israelitasqa wajyachisqas karqanku, Neftalí ayllumanta, Asermanta, Manasespa tukuynin kajkunapiwan, madianitasta qhatiykunankupaj.

²⁴ Gedeón willajkunata kacharqa Efraímpa orqosninman. Pay kamacherqa chay ayllumanta qharis kajkuna uraykamunankuta madianitaswan maqanakoj. Kamacherqataj Bet-baraman chimpana ñankunasta jinataj Jordán mayumpi ñankunastapis manaraj chayamushajtinku jark'aykunankuta. Efrainmanta kajkunataj junt'arqanku kay kamachiykunasta.

²⁵ Chantá madianitasmanta iskay kurajkunata Orebta, Zeebtawan jap'erqanku. Orebtaqa wañucherqanku uj chhankapi. Chayrayku kunan chay chhankajta sutin Orebpa chhankan nisqa kashan. Zeebtataj wañucherqanku, chay sutinwan kashan chay lugarllapitaj. Chayllapitaj uvasta ch'irwaj kanku vinota ruwanankupaj. Madianitasta maqanakupi qhatiykuytawankamataj, Orebpa jinataj Zeebpa umasninkuta qholuspa Gedeonman aparqanku. Payqa Jordán mayoj chimpampi kasharqa.