Jueces 6 - Qheshwa Biblia DC

Diosqa Gedeonta wajyan

¹ Israelitasqa juchallikullarqankutaj Diospa contrampi sajra ruwaykunaswan, qanchis wata junt'atataj Señorqa churaykorqa madianitaspa makisninman.

² Madianitas astawan astawan israelitasta ñak'arichisqankurayku, israelitasqa madianitasta manchachikuspa orqosnejpi pakakunasta ruwakamorqanku, chay chhanka jusk'usnejpi, runas mana purinasnimpi jinataj.

³ Israelitaspata ima tarpusqallankupis kajtin, madianitasqa amalecitaspis chantá inti llojsimuynejmanta runaspis chajrasninkuman suwaj yaykuykullajpuni kanku.

⁴ Israelitaspa jallp'asninkupi jaraykukoj kanku, chajrasinkutataj t'ustiykoj kanku Gaza llajta chaynejkama, israelitas mikhunankupajqa mana imatapis saqejchu kanku, uywasninkumantapis ni ovejasta, ni bueyesta, nitaj burrostapis saqejchu kanku.

⁵ Chay carpa wasisninkuwan jinataj uywasninkuwan chay jallp'aman junt'aykorqanku tukuy imasta phiriraspa. Langostas jinapuni may chhika camellosninkuwan junt'aykorqanku.

⁶ Madianitasnejta israelitasqa may llakiyta yarqhaykunasta ñak'arerqanku. Chantá Señorman qhaparikorqanku yanapayninta mañaspa.

^7-9 Maypachachus israelitas mañakorqanku Señormanta chay madianitasmanta kacharichinanta, Señor kachamorqa uj profetata, paytaj nerqa: Ajinata nin Israelpa Señor Diosnin: Noqa qankunata orqhomorqaykichej Egiptomanta chaypi kamachis kashajtiykichej, manataj egipciosllamantachu qankunata kacharicherqaykichej, manachayqa tukuy ñak'arichisojkunamantapis. Paykunataqa ñaupaqeykichejmanta wijch'urarqani, qankunamantaj jallp'asninkuta qorqaykichej.

¹⁰ Nerqaykichejtaj qankunaman, noqa kasqayta qankunaj Señor Diosniykichej, manataj manchachikunaykichejta amorreospa dioskunasninkumanta, kunampis paykunaj jallp'ankupi kashankichej, chaywampis qankunaqa mana kasuwarqankichejchu.

¹¹ Chaypacha Señorpa angelnin jamorqa tiyaykukorqataj Ofra chaypi uj encina sach'a kasharqa chay urapi, Abiezerpa ayllunmanta Joaspata chay sach'a karqa. Joaspa wawan Gedeonrí pakayllamanta trigota ch'uwachasharqa, maypichus uvasta saroj kanku chaynejpi, madianitas mana rikunankupaj.

¹² Señorpa angelnintaj payman rikhurerqa, nerqantaj: Señor qanwan kashan, kallpayoj wapu runa.

¹³ Gedeontaj kuticherqa: Ay Señor, noqaykuwanchus Señor kanman chayqa, imaraykutaj kay tukuy imas qhatirishawaykuri? Maytaj chay t'ukuna imasta Egiptomanta orqhomushaspa Señor ruwasqasninmanta ñaupa tatasniyku willawasqasniykuri? Señorqa qonqarparipuwayku, madianitaspa kamachiyninmantaj jaywaykuwayku.

¹⁴ Señorqa payta qhawarispa nerqa: Chay kallpayki kajwan, riy israelitasta kacharichimuy madianitaspa kamachiyninmanta. Noqamin kachashayki.

¹⁵ Gedeonqa ujtawan kutichillarqataj: Señorníy, ujtawan nirikusqayki, imaynatataj israelitasta kacharichimuymanri? Aylloyqa Manasés ukhupi kaj ayllusmanta aswan wajcha, noqarí, wasi aylluypi kajkunamanta aswan sullk'a kani.

¹⁶ Señortaj kuticherqa: Noqa qanwan kasqayrayku qanqa ruwayta atillanki. Madianitastaqa atipanki imaynatachus uj sapan runata atipanchej jinata.

¹⁷ Chaypacha Gedeonqa kutichillarqataj: Sichus khuyakuyniykita tarini chayqa, rikuchiway uj señalta qampuni noqawan parlashasqaykita.

¹⁸ Mañarikuyki amaraj ripunaykita, uj ofrendata apamusunaykama. Señortaj cheqamanta nerqa: Kaypi suyashasaj kutimunaykita.

¹⁹ Gedeonqa rispa wakichimorqa uj cabritota, iskay chunka libras jak'umanta t'antasta ruwarqa mana levadurayojllata, aychantari uj canastaman churaykorqa, caldontataj uj mankaman, chay tukuytataj Señorpa angelninman aparqa chay encina sach'a uraman.

^20-21 Diospa angelnenqa kamacherqa churananta uj chhanka pataman chay aychata, mana levadurayoj t'antastapis, chay caldontataj chaykunaj patanman jich'aykunanta. Gedeón chay tukuy nisqanta ruwajtinkamataj, chay ángel tojnunwan chay aychata jinataj chay t'antasta llanqhajtinkama, chay chhankamanta nina llojsimorqa, aychata t'antastapis ruphaykorqa, chaymantataj Señorpa angelnenqa chinkariporqa rikuyninmanta.

²² Gedeónqa, Señorpa angelnimpuni kasqanta reparaytawankama, nerqa: Ay Señorníy, kikin Señorpa angelninta rikuni uya pura, nispa.

²³ Señortaj kuticherqa: Ama mancharikuychu, mana wañunkichu. Sonqo tiyasqa kay qanwan kachun.

²⁴ Chaypacha Gedeonqa Señorpaj uj altarta jataricherqa, suticharqataj, Señormin sonqo tiyakoyqa, nispa. Chay altarqa kashallanraj Abiezerpa ayllun ukhupi, Ofra llajtapi.

²⁵ Chay ch'isipacha Señorqa Gedeonman nerqa: Tataykej wakasninmanta uj torota apamuy, qanchis watayoj sullk'a kaj torota, tataykejpata kaj Baalpa altarninta phiriy. Ajinallatataj chay Baalpa altarnin qayllapi kashan Aserapaj t'aqasqa k'ullutapis llant'ay.

²⁶ Chay orqo puntapi uj altarta Señor Diosniykipaj jatarichiy. Chantá chay qanchis watayoj torota apamuy, chaytataj noqaman jaywaspa q'olachipuway, chay Aserapaj t'aqasqa k'ulluta llant'asqaykiwan.

²⁷ Chaypacha Gedeonqa chunka kamachisninta pusariykukuspa ruwarqa Señor tukuy imastachus kamachisqanta, mana p'unchaychu ruwarqa manachayqa tutallan, tatampa ayllunta manchachikuspa jinataj chay llajtayoj runastapis.

²⁸ Q'ayantin tutamanta runas sayarinankupajqa, Baalpa altarnenqa phirisqa rikhurisqa, ajinallatataj chay yupaychananku k'ullupis, altar chaypi kasharqa chaypis urmachisqallataj rikhurerqa, astawampis rikusqanku uj toroto mosoj altarpi q'olachisqata.

²⁹ Ujkuna ujkuna tapunakorqanku: Pitaj kayta ruwanman karqari? nispa. Mayta tapukuspa mask'aspañatajqa yacharqanku kay tukuytaqa Joaspa wawan Gedeón ruwasqanta, chantá rerqanku Joasman nerqankutaj:

³⁰ Chay wawaykita orqomuy, wañurpachinaykupaj. Baalpa altarninta jinataj altar qayllapi kasharqa chay yupaychana k'ullutapis phirisqanrayku.

³¹ Joastaj kuticherqa payman jamojkunaman: Qankunaqa Baalman kutikuspachu maqanakunkichej? Pillapis Baalman kutikun chayqa, manaraj sut'iyashajtin wañuchun. Baal diospuni kajtenqa, saqeychej pay kikinmanta jark'akojta, imaraykuchus paypatamin karqa chay urmachisqa altarqa.

³² Chaymantapacha Gedeontaqa Jerobaalta suticharqanku, nerqankutaj: Kikin Baal jark'akuchun Gedeonmanta, imaraykuchus Gedeompuni Baalpa altarnintaqa urmachisqa.

³³ Chaypacha tukuy madianitas, jinataj amalecitaspis, chantá inti llojsimuynejmanta kaj runaspiwan, tantaykukorqanku chimparqankutaj Jordán mayuta, chay Jezreel vallepitaj jaraykukorqanku.

³⁴ Señorpa Espirituntaj Gedeonman jamorqa, paytaj wajyarqa chivo wajramanta pututuwan, Abiezerpa tukuy ayllunmanta kajkuna tantakamorqanku.

³⁵ Chantá Manasespa ayllunmanta kajkunata wajyarachimorqa tantakamunankupaj. Wajyarachimullarqataj Aserpa ayllunmanta, Zabulompamanta, Neftalejpamanta ima, paykunataj paywan tantakoj jamorqanku.

^36-37 Gedeonqa Diosman nerqa: Sichus cheqamanta qan wajyawanki israelitasta salvamunaypaj, imaynatachus niwasqaykiman jina chayqa, churasaj uj ovejaj millmanta maypichus trigota oqharina chayman. Sichus tutamanta millma chhullawan joq'ochasqa kanman, tukuy pampataj ch'aki kanman chayqa, chaypi yachasaj cheqamanta qan ajllawasqaykita niwasqaykiman jina israelitasta salvanaypaj.

³⁸ Ajinapunitaj ruwakorqa. Gedeón sut'iyayta jatarikuspataj chay joq'o millmata ch'irwarqa uj vaso junt'ata.

³⁹ Chaywampis Gedeonqa ujtawan nillarqataj: Ama phiñakuychu uj señaltawan mañarikusojteyqa. Kay kutipeqa millmañataj ch'aki kachun jallp'añataj joq'o kachun.

⁴⁰ Chay ch'isipi Dios ajinata ruwarqa. Q'ayantin paqarintaj millmaqa ch'aki rikhurerqa, jallp'ataj chhullawan joq'ochasqa rikhurerqa.