Jueces 5 - Qheshwa Biblia DC

Deborajta Baracpatawan takiyninku

¹ Jaqay p'unchaypeqa Deborawan, Abinoampa wawan Baracwan takerqanku kay jinata:

² Tukuyniykichej Señorta yupaychaychej, imaraykuchus Israelpi runas kankuraj maqanakuman yaykunankupaj jina; imaraykuchus Israel ayllu ukhupi runas kankuraj maqanakuman wajyachejtinku uyariytawankama rinankupaj jina.

³ Uyariwaychej, qankuna reyes, Uyariwaychej, qankuna kamachejkuna, Kunan takisaj Señorman, Kunan takisaj Israelpa Diosninman.

⁴ Señor maypachachus Seirmanta qan llojserqanki; Edompa camposmanta ripushajtiykitaj, jallp'a ikhakorqa, cielopis qharkaterqa; phuyuspis parankuta jich'amorqanku.

⁵ Señor, ñaupaqeykipeqa, Israelpa Diosnin, ñaupaqeykipeqa, qharkaterqanku orqokuna, Sinaipis qharkaterqa.

⁶ Anatpa wawan Samgarpa p'unchaykunasnimpi, Jaelpa p'unchaykunasnimpipis, ñan purejkunaqa ñankunasta saqerparerqanku, purerqankutaj wist'u ñankunasninta.

⁷ Israelpa ranchosnenqa saqerparisqas qhepakorqanku mana runasniyoj. Chaypacha noqa sayarikorqani; noqa, Débora, Israelpa maman jina.

⁸ Waj dioskunata ajllakojtinkoqa, llajtaj punkusnimpi maqanakus kallarqapuni, chay tawa chunka waranqa israelitas ukhupeqa mana rikukorqachu ni uj escudo nitaj uj lanzallapis.

⁹ Sonqoyqa kusisqa kashan Israelpa kuraj kamachejkunasninmanta, Aylluypa runasnin maqanakuman rinapaj k'uchis kasqankumantapis. Señorta yupaychaychej.

¹⁰ Willaychej qankuna, yuraj china burrospi purejkuna; qankunapis llamp'u mast'anaspi tiyakojkuna; ñan puriypi kajkunapis.

¹¹ Uyariychej maypichus uywasta yakuta ujyachinas chaypi, platillospa ch'ajwaynimpi, Señor atipachej kasqanta qhapariychej, Israelpa ranchosnin atipasqasninmantapis.

¹² Rijch'ariy, rijch'ariy Débora; Rijch'ariy, takirikuytaj uj takiyta. Abinoampa wawan Barac, jatarikuy apakapuytaj presosniykita.

¹³ Chaypacha israelitasqa uraykamorqanku kallpasapa runaspa contrampi maqanakoj. Noqanejtamin Señorpa ayllonqa uraykamorqa maqanakunankupaj chay wapu runaspa contrampi.

¹⁴ Efraimpa ayllunmanta wakin uraykamorqanku valleman, paykunaj qhepankutataj Benjamimpa ayllunmanta kajkuna. Makinmantaqa kurajkunasninku uraykamorqanku, Zabulompamantataj kuraj kamachejkunasninku.

^15-16 Isacarpa kurajkunasnenqa Deborawan khuska jamorqanku. Isacarqa Baracpa yanapajnin karqa. Paypa qhepanta valleman kachaykukorqa. Sichus Rubempa runasnin ukhupi wapu runas kankuman chayqa, imaraykutaj qhepakorqanki ovejas chaupipi, chay michejkuna ovejasninkuta wajyajta uyarispa? Rubempa runasnin chaupipi wapu runas kanku, jinapis manchachikoj sonqosniyoj.

¹⁷ Galaadqa, Jordán mayu chimpapi jarasqa qhepakorqa. Dantaj qhepakorqa barcos qayllapi. Asertaj qhepakorqa mar qocha cantopi, manataj chaymanta kuyurikorqachu.

¹⁸ Chay campoj pata orqosnimpi Zabulonwan Neftaliwanqa maqanakupi casi wañuchichikorqanku.

¹⁹ Chaypacha reykunaqa jamorqanku Taanac llajtaman, Meguido yakus qayllaman maqanakoj; cananeospa reykunasnin jamorqanku maqanakuman, manataj aterqankuchu qolqeta nitaj ima qhapaj imastapis apayta.

²⁰ Cielomantapacha, maypichus kashanku chaymantapacha, ch'askakunaqa Sísaraj contrampi maqanakorqanku.

²¹ Wayq'o, ñaupa wayq'o, Gisón nisqa wayq'o, tukuy paykunata picharparerqa. Kallpayojkunajpa kunkanta qan q'allpirparinki.

²² Caballospa chaki zapatosnin jallp'ata sonarichinku. Phinkirispa, phinkirispa rinku chay chúcaro sinch'i correj caballosqa.

²³ Señorpa angelnintaj willan: Meroz llajtaman chaypi tiyakojkunamanwan maldición urmachun. Mana wapu runas jinachu jamorqanku, Señorta yanapanankupaj.

²⁴ Tukuy warmismanta aswan bendicisqa kachun quenita Heberpa warmin Jaelqa. Jarapi kaj tukuy warmismanta aswan bendicisqa kachun.

²⁵ Sisaraqa yakuta mañarikorqa, Jaeltaj lecheta jaywaykorqa. Leche ñojñuta jaywaykorqa uj allin kaj tazompi.

²⁶ Chaykamataj, uj estacata lloq'e makinwan jap'erqa, k'ullu mazotataj paña makinwan oqharimorqa, Sísaraj umampi wajtaspataj umanta estacawan pasarparicherqa.

²⁷ Sisaraqa q'ewiykachakorqa Jaelpa chakisnin chaypi, nanaywan q'ewiykachakuspataj pampaman wijch'ukorqa, maymanchus urmarqa chaypi wañuporqa.

²⁸ Sísaraj mamanqa may llakisqa, ventanaman qhawaj chimpaykuspa nin: Imaraykutaj carron kunankama qhepakunri? Imaraykutaj maqanakuman rina carronqa qhepakunrí? nispa.

²⁹ Chay aswan yuyayniyoj kaj warmisqa nisharqanku, mamampis sonqompi nikushallarqataj:

³⁰ Maqanakupi ganasqasninkutachá rak'inakushanku, sapa soldadochá apakamushan ujkama chayri iskaykama sipas kamachista. Sisarapajqa may k'acha kaj coloresniyoj telaschá kashan, may k'acha coloreswan bordasqa pichus atipajpa kunkanman churanapaj kanqa.

³¹ Señor, tukuy enemigosniyki phirisqas kachunku; Qanta munakusojkunataj k'ancharichunku, imaynatachus inti llojsimushaspa may sinch'ita k'ancharin jinata. Chaymanta qhepaman tawa chunka watasta chay jallp'api allin tiyayllapi kausakorqanku.