Jueces 3 - Qheshwa Biblia DC

Canaán jallp'api qhepakojkuna llajtas

¹ Kay llajtasta Señor saqerqa israelitasta pruebaman churanampaj, pischus Canaampi maqanakusta mana rikorqankuchu tukuy chaykunata.

² Señorpuni saqerqa israelitas maqanakuyta yachanankupaj chay pischus ni jayk'aj maqanakuman chayarqankuchu chaykunapaj.

³ Kaykuna qhepakorqanku: Filisteosmanta phishqa kurajkunasninku, tukuynin cananeos, sidonios, Líbano orqospi tiyakojkuna heveospis, Baal-hermonmanta Hamatman yaykunakama.

⁴ Kay llajtaswan Señor llakiyman churayta munarqa israelitasta, jinamanta yachanampaj kasunkumanchus manachus ñaupa tatasninkuman kamachiykunasta Moisesnejta qorqa chaykunata.

⁵ Jinamanta israelitasqa tiyakorqanku kaykunawan: hititaswan, amorreoswan, fereseoswan, heveoswan, jebuseoswan ima.

⁶ Israelitaspa qhari wawasninku chantá warmi wawasninkupis chay llajtasniyojkunawan casarakorqanku, dioskunasninkutataj yupaycharqanku.

Otoniel Israelitasta kacharichin Cusan-risataimmanta

⁷ Israelitasqa qonqaporqanku Señor Diosninkuta, Paypa mana munasqantataj ruwarqanku, yupaycharqankutaj Baalman Astartemanwan tukuy laya rijch'aj lantista.

⁸ Chayraykutaj Señorqa paykunaj contrampi sinch'ita phiñakorqa, Mesopotamiamanta rey Cusan-risataimwantaj saqerqa atipachikojta. Pusaj wata junt'a israelitasqa rey Cusan-risataimta sirverqanku.

⁹ Chaypacha Señorta qhaparikorqanku. Señortaj jataricherqa uj kacharichejta. Kaytaj Cenazpa wawan Otoniel karqa, Cenaztaj Calebpa sullk'a hermanon karqa:

¹⁰ Señorpa Espíritun Otonielman jamorqa, paytaj israelitasta kamacherqa, maqanakuman llojsejtintaj Señorqa rey Cusan-ristaimta atipacherqa.

^11-12 Chaymanta qhepaman tawa chunka watas junt'ata allin kausakuylla karqa chay jallp'api. Otoniel wañupusqanmanta qhepamantaj, israelitasqa kutillarqankutaj Señorpa mana munasqan imasta ruwaj, chayrayku Señorqa Moabpa reynin Eglonman astawan atiyta qorqa israelitasmanta nisqaqa.

Aod kacharinchin Israelta Moabpa atiyninmanta

¹³ Rey Eglonqa amonitaswan amalecitaswan ima ujchakuspa maqanakupi israelitasta atiparqa, palma sach'asniyoj llajtataj jap'ikaporqa.

¹⁴ Chunka pusajniyoj watasta israelitasqa rey Eglonta sirverqanku.

¹⁵ Chaypacha Señorta qhaparikorqanku, Paytaj jataricherqa uj kacharichejta. Chay kacharichejtaj karqa Benjamimpa ayllunmanta Geraj wawan Aod sutiyoj, payqa lloq'e runa nisqa karqa. Uj p'unchaytaj israelitasqa Aodwan apacherqanku uj t'inkata rey Eglonman.

¹⁶ Aodtaj iskay puntayoj espadata ruwakorqa khuskan metroyoj jinata. Chaytataj paña kaj chakanejman p'achan uraman churakorqa.

¹⁷ Chaymantataj Eglonman t'inkata apariykukuspa rerqa, Eglonqa rakhu runa karqa.

¹⁸ Chay t'inkanta Eglonman jaywapuytawantaj, Aodqa kachaporqa piskunachus, paywan jamorqanku chaykunata.

¹⁹ Gilgal qayllapi lantis kasharqa chayman chayamuspari, Aodqa kutirillarqataj maypichus rey Eglon kasharqa chayman, nerqataj: Reyníy, uj willay qampaj tiyan, kaytarí pakayllapi nisqayki. Reytaj, paywan kasharqanku chay kamachisninta kamacherqa, ama ch'ajwanankuta, chaynejmantataj llojsinankuta.

²⁰ Eglón chay q'oñi tiempopaj nisqa wasipi sapan qhepakusqantawantaj, Aodqa qayllaykuspa Eglonman nerqa: Reyníy, kay willay apamususqayqa Diosmantamin, kayta uyarispataj Eglonqa tiyasqa kasqanmanta jatarikorqa.

²¹ Aodtaj, lloq'e makinwan paña ladonmanta espadanta orqhokamuytawan Eglompa wijsanta t'ojsirparerqa.

²² May sinch'ita t'ojsirparisqanraykutaj tukuy espada jap'inantinkama yaykurparisqa, Eglón may rakhu kasqanraykutaj tukuynin espada chinkaykorqa, Aodtaj espadanta mana orqhokaporqachu.

²³ Chaymanta Aodqa pukusninta wisq'aykuytawankama ventanannejta llojsirikaporqa.

²⁴ Aod ripusqanmantañataj reypa kamachisnenqa jamorqanku, chay wasej punkusnin wisq'asqasta rikuspataj yuyasqanku paypuni wisq'aykakamusqanta chay ukhupi imatapis ruwanampaj.

²⁵ Anchata suyasqankumantaña, manapuni llojsimojtintaj astawan llakikuyta qallarerqanku. Llaveta jap'ispataj kicharerqanku, chaypitaj reyninkutaqa pampapi wañusqata rikorqanku.

²⁶ Reypa kamachisnin suyakunankukamaqa Aodqa ayqerikaporqaña, Gilgal chaypi lantista pasaytawanñaqa Seiratpi Aodqa pakakorqa.

²⁷ Israel jallp'aman chayaspañaqa, Efraín orqosnimpi putututa waqacherqa israelitasta wajyaspa. Tukuynin israelitastaj chay orqosmanta uraykamorqanku, Aodtaj ñaupaqenkuta rerqa.

²⁸ Aod nerqa payta qhatinankuta, Señortaj atipachinanta enemigosninku moabitasmanta. Chaypacha Aodta qhaterqanku Jordán mayoj ch'ajchasnintataj jap'ikaporqanku, manataj ni pita chayninta chimpajta saqerqankuchu.

²⁹ Chay kutipeqa chunka waranqa moabitasta wañucherqanku, tukuy chaykunaqa kallpasniyoj wapu soldados karqankupis, ni uj puchuyojta wañuracherqanku.

³⁰ Ajinamin karqa israelitasqa Moabta atipaykusqankoqa. Chaymanta qhepamanqa pusaj chunka watasta jina allin tiyasqallapi kausakorqanku chay jallp'apeqa.

Samgar kacharichin israelitasta filisteospa atiyninmanta

³¹ Qhepan atipachej wapu runaqa karqa Anatpa wawan Samgarñataj. Payqa wañucherqa sojta pachaj filisteosta, bueyesta t'ojsina k'aspillawan. Samgar Israel aylluta kacharichillarqataj.