Jueces 20 - Qheshwa Biblia DC

Israelitas oqharikunku Gabaapi chay wañuy kasqanmanta

¹ Chaypacha tukuy israelitasqa Danmantapacha Beersebakama jinataj Galaadkama uj runa jinalla Señorpa ñaupaqempi tantaykukorqanku Mizpa llajtapi.

² Israel tukuy ayllusmanta kurajkunasninku chaypi kasharqanku, Diospa ayllunmanta kajkunataj tawa pachaj waranqa soldados chakipi purejkunamanta karqanku.

³ Benjamimpa ayllunmanta kajkunaqa yacharqanku israelitasmanta waj ayllusqa Mizpapi tantasqas kashasqankuta. Israelitastaj chay levitata tapurerqanku imaynapichus chay warminta wañuchisqankuta.

⁴ Wañojpa qharin levitataj nerqa: Warmiywan noqa chayarqani Benjamimpa ayllumpi Gabaa llajtaman, chay ch'isi chaypi qhepakunaykupaj.

⁵ Chay ch'isipachataj chay llajtamanta runasqa puñusharqayku chay wasiman muyuykamorqanku wañuchiwayta munaspa, jinamantari mana munashajta warmiyta abusarqanku wañuchinankukama.

⁶ Chantá warmiypa ayanta khuchuspa t'aqararqani, chay t'aqastataj tukuy Israel aylluman aparacherqani. Jinamanta tukuyniykichej yachanaykichejpaj kay p'enqay wañuchiymanta.

⁷ Kunanqa qankuna israelitas jina parlarikuychej, niychejtaj imatachus ruwana kasqanta.

⁸ Uj runa jinalla tukuyninku sayarikuspa nerqanku: Ni mayqenninchej carpasninchejman chayri wasisninchejman kutiripusunchu.

⁹ Kunanqa suerteta choqananchej kanqa yachanapaj piskunachus Gabaaman maqanakoj rinankuta.

¹⁰ Tukuy ayllusmanta, sapa chunkamanta ujta t'aqaychej, paykunaqa mink'asqas kanqanku soldadosman mikhunata apanankupaj; chay ujkunataj Gabaapi kajkunawan maqanakamonqanku chay millay juchata Israelpi ruwasqankurayku.

¹¹ Tukuy israelitas uj runa jinalla tantaykukorqanku chay llajtawan maqanaqamunankupaj.

¹² Benjamimpa ayllumpa tukuy jallp'amantaj willarachimorqanku nispa: Ima millay ruwaytataj qankunamanta wakinkuna ruwarqankichejri?

¹³ Apamuwayku wañuchinaykupaj chay sajra ruwajkuna runasta, Gabaapi kashanku chaykunata, jinamanta Israelta chay juchamanta llimphuchanapaj. Jinapis Benjaminmanta kajkunaqa mana kasorqankuchu israelita ayllusninkutaqa.

¹⁴ Benjaminmanta kajkunaqa tukuynejmanta Gabaapi tantakorqanku rispa maqanakamunankupaj chay ujkuna israelita masisninkuwan.

¹⁵ Benjamín aylloj llajtasninmanta soldados wakichikojkunaqa iskay chunka sojtayoj waranqa karqanku, Gabaapi qanchis pachaj sumaj ajllasqasqa wajlla karqanku.

¹⁶ Chay tukuyninku ukhupi wajpuni kallarqankutaj qanchis pachaj lloq'es nisqa, paykunaqa warak'awan lloq'e kaj makiwan rumita warak'aspa uj chujchamampis jap'ichejpuni kaj kanku, mana jayk'aj pantaspa.

¹⁷ Chay jawa, chay ujkuna israelitaspis tantakorqanku tawa pachaj waranqa, guerrapi sumajta maqanakojkunas karqanku.

Benjamín aylloj contrampi maqanaku

¹⁸ Israelitasqa Betelman rerqanku, chaypitaj Diosta tapurerqanku ima aylluchus Benjaminwan ñaupajta maqanakoj rinanta. Señortaj kutichispa nerqa Judaraj ñaupajta rinanta.

¹⁹ Israelitasqa tutamanta jatarikorqanku, Gabaa chimpapitaj jarakorqanku.

²⁰ Benjaminmanta kajkunajpa contrampi rerqanku, Gabaa chimpanman maqanakunaman yaykunankupaj wakichisqas.

²¹ Benjaminmanta kajkunaqa llojsispa llajtamanta chay p'unchaypi iskay chunka iskayniyoj waranqa israelitasta wañucherqanku.

^22-24 Chayrayku israelitasqa Betelman rerqanku Señorpa ñaupaqempi jik'un jik'unta waqarikoj inti yaykunankama. Tapullarqankutaj Benjaminmanta kajkuna ayllu masisninkuwan watejmanta maqanakunankuchus kanqa manachus chayta. Señortaj kamacherqa rinallankutataj, q'ayantintaj paykunaqa kallpachakullarqankutaj Benjaminmanta kajkunawan maqanakoj kutinankupaj, rerqankutaj maypichus chay ñaupaj p'unchaypi maqanakamorqanku chayman.

²⁵ Qhepan kutipiwan Benjaminmanta kajkunaqa llojserqanku Gabaamanta maqanakunankupaj, chaypitaj chunka pusajniyoj waranqa israelita soldadostawan wañucherqanku.

²⁶ Chaypacha Israelmanta tukuy soldados tukuy Israel ayllupis watejmanta Betelman rillarqankutaj Señorpa ñaupaqempi waqamunankupaj. Chaypitaj tukuy p'unchayta mana mikhusqas karqanku, chanta Señorman jaywarqanku q'olachinasta, chantá allinyakuna jaywanastawan.

^27-28 Jaqay tiempospeqa Diospa Trato Cajonnenqa Betelpi kasharqa, sacerdotenkutaj Finees karqa, payqa Eleazarpa wawan karqa Aarompa allchhintaj. Israelitastaj Señorta tapurerqanku: Watejmanta maqanakoj atiykumanchu riyta Benjamín ayllumanta masisniykuwan, chayri atipasqas jinachu qhepakusqayku, nispa. Señortaj paykunaman nerqa: Maqanakoj rillaychej, q'aya noqa atipachisqaykichej.

²⁹ Chaypacha israelitasmanta wakin soldadosqa Gabaa qayllasnimpi pakaykukorqanku.

³⁰ Chaykamataj wakin israelitasqa rerqanku chay kinsa kaj p'unchaypi Benjaminmanta kajkunajpa contrampi maqanakunankupaj jina, churakorqankutaj qhepan qhepampi Gabaa llajtaj chimpampi, chay ñaupaj kutispi jina.

³¹ Uj kutitawan Benjaminmanta kajkunaqa llajtamanta llojsimorqanku, chaymanta karunchakuspa israelitaswan maqanakunankupaj. Chay kutitaj kinsa chunka israelitasta jina wañucherqanku Betelman chantá Gabaaman rina ñankunaspi, chay camposnimpi ima.

³² Benjaminmanta kajkunaqa creerqanku israelitasqa paykunamanta ayqeshasqankuta atipasqas kaspa ñaupaj kutispi jina. Israelitasrí, llajtamanta karunchakusharqanku chay llajtayojkuna enemigos qhatiykunankupaj ñankunaskama.

³³ Jinallamanta israelitasqa maypichus kasharqanku chaymanta llojsimorqanku, maqanakunankupaj jinataj churakorqanku Baal-tamarpi, jinallataj chay pastorara pampasnimpi pakasqas kasharqanku Gabaa llajtaj muyuynimpi chaykunapis llojsimullarqankutaj.

³⁴ Tukuynin israelitasmanta aswan allin maqanakojkuna soldadosnin Gabaa llajtata jap'ikapoj yaykorqanku. Maqanakoyqa sinch'i karqa, Benjaminmanta kajkunataj mana yachasharqankuchu atipachikusharqankutaña.

³⁵ Señor qorqa atipayta Israelitasman Benjaminmanta kajkunawan maqanakuypi. Chay p'unchaypi israelitasqa wañucherqanku iskay chunka phishqayoj waranqa pachajniyoj soldadosta Benjamín ayllumanta kajkunata.

³⁶ Chaypacha Benjaminmanta kajkunaqa reparakorqanku atipaykuchikusqankuta. Israelitasqa ayqerikorqanku Benjaminmanta kajkunawan maqanakusqankumanta, Gabaa qayllapi pakaykukorqanku chaykunaman atienikusqankurayku.

³⁷ Chay runasqa ujllata Gabaaman yaykuykorqanku, espadaswan t'ojsiraspataj wañuracherqanku tukuy llajtapi qhepakojkunata.

³⁸ Llajta qayllapi pakasqas kasharqanku chaykunawan karupi kasharqanku chay israelitaswanqa yachachinaykukusqanku; maypachachus llajtapi nina q'oshñita rikuspa yachanankupaj llajtata jap'ikapusqankutaña.

³⁹ Chaypacha ayqekojkuna israelitasqa, q'oshñita rikuytawan kutirikamuspa Benjaminmanta kajkunawan maqanakoj churakunankupaj. Benjaminmanta kajkunaqa kinsa chunka israelitasta jina wañuracherqanku, yuyarqankutaj tukuypi atipaykusqankuta chay ñaupaj kutipi jina.

⁴⁰ Jinallamanta rikorqanku llajtamanta q'oshñita llojsejta, Benjaminmanta kajkunapis qhepata qhawarispa rikorqanku nina larwayta q'oshñitawan pataman oqharikushajta.

⁴¹ Chaypacha israelitasqa maqanakoj churakorqanku, Benjaminmanta kajkunataj q'ewayayta qallarerqanku llajtankuwan chay llakiy qhatirishasqanmanta.

⁴² Israelitasmanta ayqeyta qallarerqanku ch'in pampaman rej ñanninta, manataj ayqeyta aterqankuchu imaraykuchus llajtamanta llojsimojkuna soldados paykunata wañuracherqanku.

⁴³ Benjaminmanta kajkunaqa israelitaswan muyuykusqas rikhurerqanku, paykunataj qhatiykuspa Menuhamantapacha Gabaaj inti llojsimuynejkama t'ustita ruwaykorqanku.

⁴⁴ Ajinata wañorqanku chunka pusajniyoj waranqa Benjamimpa ayllunmanta kaj soldadosqa.

⁴⁵ Chay wakintaj kutirispa ch'in pampanejta ayqekorqanku, Rimón chhanka chaynejman. Phishqa waranqa jinataj kutipusqankupi jina ñankunaspi wañurachisqas karqanku. Israelitastaj qhatiykullarqankupuni wañurachispa iskay waranqatawan jina.

⁴⁶ Tukuyninkupi chay p'unchaypeqa wañorqanku iskay chunka phishqayoj waranqa Benjamimpa aswan sumachaj soldadosninmanta.

⁴⁷ Jinapis sojta pachaj jinaraj Benjaminmanta kajkunaqa ayqeqorqanku ch'in pampanejman, Rimón chhankapitaj tawa killasta qhepakorqanku.

⁴⁸ Israelitasqa oqharikullarqankutaj Benjaminmanta puchoj runaspa contrampi, tukuy llajtasman chayasqankupitaj cuchillowan t'ojsiraspa wañucherqanku, ajinallatataj tukuy uywas tarisqankutapis wañuchillarqankutaj, tukuy llajtastapis rupharacherqanku.