Jueces 2 - Qheshwa Biblia DC

Señorpa angelnin Boquimpi

^1-2 Señorpa angelnin rerqa Gilgalmanta Boquinman, israelitasmantaj nerqa: Noqa Egiptomanta orqhomorqaykichej qankunata, ñaupa tatasniykichejman qosqaykichej nerqani chay jallp'akama pusamorqaykichej, chaypacha paykunaman nerqani: Mana jayk'ajpis qankunawan tratoyta p'akisajchu, sichus qankuna chay llajtayojkunawan waj tratota mana ruwankichejchu chayqa, manachayqa altaresninkuta phirinkichej nerqani. Qankunataj mana kasuwarqankichejchu. Imaraykutaj jinata ruwarqankichejrí?

³ Chayrayku kunan niykichej: Mana ñaupaqeykichejmanta chay llajtayojkunata wijch'usajchu, paykunaqa chantá chay lantisninkupis uj tojlla jina qankunapaj kanqanku.

⁴ Señorpa angelnin parlayta tukojtinkamataj tukuynin israelitas sinch'i qhapariywan waqayta qallarerqanku.

⁵ Chayrayku chay lugarta suticharqanku Boquim nispa, chayllapitaj Señorman uywa ñak'asqasta jaywarqanku.

Josuejpa wañupuynin

⁶ Josué israelitasta kacharapusqanmantaña, sapa ujninku rerqanku chay chayaqenku jallp'asninkuta jap'ikapoj.

⁷ Josué kausanankama jinataj paywan kajkuna kurajkunas kausanankukamapis israelitasqa Señorta yupaychallarqankupuni, chay kurajkunaqa t'ukuna imasta israelitaspaj Señor ruwasqanta rikusqanku.

⁸ Chanta Josueqa wañuporqa, pachaj chunkayoj watasnimpi.

⁹ P'amparqanku paypa jallp'allampitaj Timnatsera nisqapi, chayqa kashan Efraimpa orqosnimpi, chay Gaas orqomanta patanejpi.

¹⁰ Jinallatataj Josuejpa mit'anmanta kajkuna israelitaspis wañupullarqankutaj. Ajinamantari chay qhepamanña nacekojkunaqa mana yacharqankuchu Señormanta nitaj imastachus israelitasman kutisqata ruwasqasnintapis.

Israelitasqa Señorta saqerparinku

¹¹ Israelitasqa ruwarqanku imaschari mana allinchu Señorman rijch'arqa chaykunata, Baalman rijch'akojkuna tukuy laya lantistataj yupaychayta qallarerqanku.

¹² Saqerparerqankutaj ñaupa tatasninkoj Señor Diosninkuta, pichus Egiptomanta paykunata orqhomojta, chay qayllapi tiyakojkunajpa dioskunasninkuta yupaychaymantaj qokaporqanku, Señorta sinch'ita phiñachispa.

¹³ Señorta saqerparerqanku Baalta yupaychanankupaj, Astartej tukuy laya lantisninta ima.

¹⁴ Chayrayku Señorqa israelpa contrampi sinch'ita phiñakorqa, tukuy kapuyninkuta suwaswan qhechurparicherqa, chay qayllasninmanta kaj enemigosnintaj maqanakupi atipaykorqanku, paykunataj mana kutichikuyta aterqankuchu.

¹⁵ Sapa kuti maqanakuman purirejtinku Señorqa contrankupi sayaykorqa, manapunitaj allinchu paykunata qhatirerqa, imaynatachus Señor ñaupajmantaña nisqanman jina. Jinamanta Señorqa, israelitasta sinch'i llakiykunasman churarqa.

¹⁶ Chaypachataj Señorqa, kuraj runasta jataricherqa, chay pischus suwajta munajkunamanta israelitasta kacharichinankupaj.

¹⁷ Chaywampis israelitasqa mana kasorqankuchu chay kuraj runastaqa, manachayqa Señorta saqerparispa waj dioskunastataj yupaycharqanku. Ñaupa tatasninkoqa kasusqanku Señorpa kamachisqasninta, paykunataj mana tatasninku jinachu ruwasqanku.

¹⁸ Señorqa sapa kuti jatarichej uj kuraj runata chantá yanapajtaj. Chay kuraj runa kausashajtintaj israelitasta kacharichejpuni enemigosnimpa makisninmanta, sinch'i ñak'ariypi waqasqasninkuta uyarispataj paykunata khuyakoj.

¹⁹ Kuraj runanku wañupojtintaj, watejmanta paykunaqa juchaman urmallajtaj kanku, ñaupa tatasninkumanta astawanraj, sirvispa yupaychaspataj waj dioskunata. Manataj t'aqakorqankuchu millay ruwaykunasninkumanta nitaj wampu jina kausayninkumantapis.

²⁰ Chayraykumin Señorqa Israelpa contrampi sinch'ita phiñakorqa, nerqataj: Kay runasqa, ñaupa tatasninkuwan tratota ruwasqayta p'akinku, manataj kasuwayta munankuchu.

²¹ Chayrayku mana ñaupaqenkumanta qharqosajchu ni mayqen llajtasta, mayqenkunachus Josué wañupusqanmanta qhepakorqankuraj chaykunata.

²² Kay imaswan Señorqa rikuyta munasharqa, israelitasqa Señorpa ñanninta qhatinkumanchus manachus chayta, imaynatachus ñaupa tatasninku qhaterqanku ajinata.

²³ Chayrayku Señorqa mana qharqorqachu chay nacionesta, mayqenkunatachus Josué kausashaspa manaraj qharqorqachu chaykunata, mana chayqa saqellarqa qhepakunankuta.