Jueces 19 - Qheshwa Biblia DC

Levita runa, tanta warminwan

¹ Maypachachus Israel ukhupi manaraj rey kashajtin, uj levita runa tiyakorqa Efraimpa aswan karu orqosnejpi, paytaj oqharikorqa uj warmita Judá jallp'api Belén llajtamanta, mana casaraspallataj kausarqa chay warmiwan.

² Chay warmitaj qosanta wasanchaspa riporqa Belén llajtaman tatampa wasinman. Tawa killastataj chaypi qhepakorqa.

³ Levitaqa warminta mask'amoj rerqa, paywan tiyakapoj kutipunanta parlanampaj. Payqa aparqa uj kamachita iskay burrostawan ima, warmintaj tatampa wasinman pusaykorqa.

⁴ Ajinallatataj warmej tatampis recibillarqataj kusiywan, nerqataj paykunawan qhepakunanta. Chay levita runaqa kamachinwan ima, kinsa p'unchayta suegrompa wasimpi qhepakorqa, mikhuspa, ujyaspa, puñuspataj.

⁵ Tawa kaj p'unchaypeqa tuta tutamanta jatarikorqanku ripunankupaj. Ripushajtinkuñataj warmej tatanqa chay tolqanman nerqa: Manaraj puririshaspa uj chhika t'antallatapis mikhuykuypuni chaywan kallpachakunaykipaj.

⁶ Iskayninkutaj khuska tiyaykukorqanku mikhoj ujyaj, warmej tatantaj mañarqa chay ch'isitawan qheparikunanta astawan kusirikunankupaj.

⁷ Levitaqa jatarikorqa ripunampaj, chaywampis qhepakorqapuni suegron kutin kutinta qhepakunanta mañasqanrayku.

⁸ Phishqa p'unchayninmantaj levitaqa tutamanta jatarikorqa ripunampaj, suegrontaj nerqa manaraj ripushaspa mikhurikunanta, astawan kallpata jap'inampaj; jinamanta khuska mikhorqanku chaykamataj tardeyaykorqa.

⁹ Maypachachus levita runa ripunampaj jatarikorqa chay warmiwan chantá kamachinwan ima, chay suegronqa nerqa tardeña kasqanta, ch'isiyamushasqantañataj, watejmanta nillarqataj uj ch'isitawan kusiypi qhepakunanta, q'ayantintaj tutamanta ripunanta.

^10-11 Chaywampis levita runaqa manañapuni uj ch'isitawan qhepakuyta munarqachu, mana chayqa riporqapuni warminwan, kamachinwan chantá iskaynin sillasqa burrosninwan ima. Jebusman chayri Jerusalenmanña qayllaykushajtinkoqa ch'isiyaykusharqaña, chayrayku levita runaman chay kamachin nerqa: Imaynataj rijch'asunkiman kay jebuseospa llajtankupi kunan ch'isi qhepakunanchej?

¹² Levitataj kuticherqa: Mana Israelmanta kaj llajtamanqa mana chimpaykusunchu. Rinanchej tiyan Gabaakama.

¹³ Levitaqa nillarqataj: Jaku Gabaakama chayri Ramakamapis chaypi puñukamunapaj.

¹⁴ Ajinaqa rerqanku ñaupajman, inti yaykushajtinñataj chayarqanku Gabaaman chaytaj karqa Benjamín aylloj llajtan.

¹⁵ Chaypacha ñanmanta t'aqakuspa yaykorqanku Gabaa llajtaman, chay ch'isitaj chaypi qhepakunankupaj. Levita runataj llajtaj plazanman rispa tiyaykukorqa, mana pipis wasinman wajyarikusqanrayku.

¹⁶ Jinapis ña allin tutañaqa uj machu runa campopi llank'asqanmanta kutimpusharqa chaynintataj pasarqa. Chay machu runaqa Efraimpa orqosninmanta karqa, chaypitaj tiyakorqa waj llajtayoj runa jinalla, chaywampis Gabaapi tiyakojkunaqa tukuyninku karqanku Benjamimpa ayllunmanta.

¹⁷ Levitata plazapi tiyashajta rikuspa chay machu runaqa payta tapurerqa: Maymantataj jamushanki, maymantaj rishankiri?, nispa.

¹⁸ Levita runataj kuticherqa: Pasaj jinalla samarishayku. Judapi Belenmanta jamorqayku, rishaykutaj Efraimpa karu kaj orqosninman, maypichus tiyakuni chayman. Belempi karqani, kunantaj wasiyman kutipushani manataj ni pi kanchu kunan ch'isi wasinman wajyarikuwaj.

¹⁹ Burrosniykupaj tiyapuwayku ajawan q'achuwan, noqaykupajtaj tiyapuwayku t'antawan vinowan ima, warmiypaj, kamachiypaj, noqapaj ima. Mana imapis pisiwaykuchu.

²⁰ Chay machu runaqa kuticherqa: Walejta jamorqanki. Noqa tukuy necesitasqaykipi qhawarisqayki. Mana saqesqaykichu plazapi kay ch'isi puñunaykitaqa.

²¹ Chay machu runaqa paykunata wasinman pusarqa, chakisninkuta mayllakunankukama, mikhunankukama, ujyanankukamataj burrosninkuman mikhucherqa.

²² Sinch'i kusiypi karishajtinkutaj, chay llajtamanta aswan sajra runas kajkuna wasita muyuykorqanku, punkutataj takayta qallarerqanku, nerqankutaj chay wasiyoj machu runata: Chay chayaqamoj runata orqhomuy! Paywan puñuyta munayku!, nispa.

²³ Chay wasiyoj runataj llojsispa nerqa: Khuyawaychej ari, kausaqesníy, ama chay millay sajrataqa ruwaychejchu kay chayakamuwajniywan.

²⁴ Kaypi kashanku warmi waway, payqa manaraj qharita rejsinchu, kay runaj warmimpis, paykunawan imatachus munasqaykichejta ruwaychej. Jinapis kay runawanqa ama chay millaytaqa ruwaychejchu.

²⁵ Chaywampis chay runasqa mana kasorqankuchu chay wasiyojtaqa, jinamanta chay levitaqa chay warmita jawaman orqorqa, chay sajra runastaj kallpankuman atienikuspa mana munashajta chay warmita qhechacherqanku chay tutantinta sut'iyamunankama, Chaymantaraj saqerqanku.

²⁶ Sut'iyaytañataj chay warmeqa machu runaj wasinman kutiporqa, qharin kasharqa chayman, chay punkunejpitaj wañusqa choqakorqa.

²⁷ Sut'iyaytataj qharenqa ñanninta ripunampaj punkuta khicharerqa, chaypitaj rikorqa punku chaypi warminta wijch'urayashajta punkoj k'aspisnin pataman makisnin churaykusqata.

²⁸ Chaypachataj nerqa: Sayarikuy, ripunachej. Warmintaj mana uyarerqachu. Chaymanta payqa chay ayata ujnin burroman chajnaykorqa, wasinmantaj riporqa.

²⁹ Wasinman chayaspañaqa, cuchillota oqharikorqa chay warmejpa ayantataj chunka iskayniyojman t'aqarqa, chay tukuy Israel jallp'amantaj apacherqa.

³⁰ Tukuy rikojkunaqa nerqanku: Egiptomanta israelitas llojsimusqankumantapacha, mana jayk'ajpis kayman rijch'akojqa karqarajchu. Sumajta umachakunanchej tiyan, kayman jina imatachus ruwananchejta.