Jueces 17 - Qheshwa Biblia DC

Micaiajpa lanti yupaychana wasin

¹ Efraimpa orqosnimpi tiyakorqa uj runa Micaía sutiyoj.

² Paytaj mamanman rimarerqa: Noqa suwarqayki chay waranqa pachajniyoj qolqeta. Noqa chayta jap'ishani, qantaj pichus jap'ejta maldicerqanki. Mamantaj kuticherqa: Dios tata bendicisuchun wawáy, nispa.

³ Micaiataj chay waranqa pachajniyoj qolqeta mamanman kuticherqa. Mamantaj nerqa: Cheqamanta chay qolqetaqa Señorpaj t'aqarqani, chanta ruwachipunaypaj uj lantita sumajta qolqewan lluch'isqata. Qanqa qhepakuyta atinki chay qolqewan.

⁴ Chaywampis Micaiaqa kutichiporqapuni chay qolqeta mamanman, chantá mamanqa aparqa lanti ruwajman iskay pachaj qolqesta, chaykunamanta ruwanampaj uj lantita qolqewan lluch'isqata, chaytataj churarqa Micaíaj wasinman.

⁵ Micaiaqa t'aqarqa wasimpi uj lugarta lantista yupaychanapaj. Ruwakorqataj uj efod p'achata chantá wasi lantistawan ima, ujnin kaj wawantataj sacerdoteta jina t'aqarqa.

⁶ Chay tiempospeqa Israelpi mana karqachu rey, sapa ujninku ruwaj kanku munayninkuman jina.

⁷ Judá jallp'api Belén llajtamanta uj wayna karqa, payqa Judá ayllumanta levita karqa, waj llajtayoj jinataj chaypi tiyakusharqa.

⁸ Kay waynaqa Belén llajtamanta llojsimporqa mask'aspa sumaj kausayta waj lugarpi, purispataj chayarqa Efraimpi tarikun chay orqosman, Micaíaj wasinman.

⁹ Maymanta jamushankirí? nispa, tapurerqa Micaiaqa. Waynataj kuticherqa: Belenmanta jamuni, levita kani, un lugartataj mask'ashani chaypi tiyakunaypaj, nispa.

¹⁰ Micaiataj nerqa: Noqawan qhepakuy ari, sacerdotey kanaykipaj, uj tatay jinataj. Sapa wata pagasqayki chunka qolqesta, chay jawa qollasqaykitaj p'achatawan mikhunatawan ima.

¹¹ Levitamanqa allin rijch'arqa Micaiawan tiyakunan, paypajtaj ujnin wawan jina karqa.

¹² Micaiaqa sacerdotempaj jina churarqa, paytaj chaypi tiyakapoj qhepakorqa.

¹³ Chaypacha Micaiaqa yuyasharqa cheqamanta Diospa bendicionesnin jamunanta, uj sacerdoteta levitasmanta wajyakusqanrayku.