Jueces 15 - Qheshwa Biblia DC

Sansón chajrasta ruphachin

¹ Uj mashkha p'unchaykunasmanta trigota oqharina tiempopi, Sansón rerqa warminta waturikoj uj cabritota apariykukuspa, nerqataj: Warmiypa wasinman yaykuyta munani paywan karikoj. Chaywampis suegronqa mana yaykojta saqerqachu.

² Warmej tatantaj nerqa: Noqaqa yuyarqani manaña munakusqaykita, chayrayku ujnin kaj kausaqeykiman qoporqani. Chaywampis paypa sullk'anqa aswan k'achitaraj, kurajnimpa cuentamanta warmiykipaj jap'ikapuy ari, nispa.

³ Sansón payman kuticherqa: Kunanqa mana juchayojchu kasaj ima llakiytachus filisteosta ruwasaj chaymantaqa.

⁴ Chaypacha rispa kinsa pachaj atojkunasta jap'imorqa, chupasninkuta t'inkiykuspataj iskaymanta iskay, chay chupasninku chaupiman uj nina k'anchayta wataykorqa.

⁵ Chaymantaqa nina k'anchanasta jap'iykuchispataj filisteospa chajra tarpusqasninkuman kachaykorqa. Jinamanta ruphaykucherqa erapiña kaj trigosta jinataj ruthunapaj kasharqa chaykunatapis. Chanta ruphaykuchillarqataj uvas sach'asta, olivo sach'astapis.

⁶ Filisteostaj nerqanku: Pitaj kayta ruwanri? Kuticherqankutaj: Timnateoj tolqan Sansón kaytaqa ruwan, warminta waj kausaqe masinman qopusqanrayku. Jinamanta filisteosqa rispa ruphaykuchimorqanku chay warmita tatantawan ima.

⁷ Chaypacha Sansonqa nerqa: Qankuna chay jinata ruwasqaykichejrayku, juraykichej mana kayqa pasakunanta, mana chayqa qankunamanta vengakusajpuni.

⁸ Jinamanta paykunata may sinch'ita maqarqa, ashkhastataj wañucherqa. Chay qhepantataj rerqa tiyakoj Etam chhankapi uj jusk'u karqa chayman.

Sansón burro quijadawan wañurachin

⁹ Filisteos jamorqanku Judáj jallp'ampitaj jarakorqanku, rerqankutaj Lehi nisqa chaynejkama.

¹⁰ Judamanta runastaj tapurerqanku: Imaraykutaj noqaykuwan maqanakoj jamunkichejri?, nispa. Filisteostaj kuticherqanku: Sansonta jap'ej jamorqayku chay sajra ruwasqasninmanta pagachikunaykupaj.

¹¹ Kayta uyarispataj Judá ayllumanta kinsa waranqa runas Etam chhanka jusk'uman rerqanku, chaypitaj Sansonman nerqanku: Manachu yachanki filisteospa kamachimpi kashasqanchejta? Imatataj kayta ruwawaykuri? Sansón paykunaman kuticherqa: Imaynatachus paykuna ruwawarqanku jinallatataj noqapis ruwani.

¹² Chantá paykunaqa nerqanku: Noqaykoqa qanta jap'ej jamuyku filisteospa makisninman jaywasunaykupaj. Sansontaj paykunaman kuticherqa: Jurawaychej mana wañuchinawaykichejta.

¹³ Paykunataj nerqanku: Mana, mana wañuchisqaykuchu, manachayqa jap'ispa filisteosman jaywamuyta munayku. Chaypacha iskay mosoj waskhaswan watasqata chay pakakunamanta orqhomorqanku.

¹⁴ Lehiman chayamojtintaj filisteosqa kusiywan qhaparkachaspa payta taripaj llojserqanku. Señorpa Espirituntaj Sansonman jamorqa, paytaj makisnimpi chay watasqa waskhasta t'ipirarerqa uj ruphasqa linomantapis ruwasqas kankuman karqa jinata.

¹⁵ Chantaqa manaraj allin ch'akisqa burro quijadata oqharikorqa, chaywantaj uj waranqa filisteosta wañuracherqa.

¹⁶ Chaymantataj Sansón nerqa: Uj burro quijadawan uj qolluta, iskay qollustapis ruwarqani; uj burro quijadawan uj waranqa runasta wañucherqani.

¹⁷ Chayta niytawantaj chay burro quijadata wijch'urparerqa, chayrayku chay lugarpata sutin Ramat-lehi.

¹⁸ Chaypacha Sansonqa sinch'ita ch'akichikusharqa, Señormantaj qhaparikorqa, nispa: Imaraykutaj kay jatun atipayta qowarqanki kunantaj qampi mana creejkunaj makimpi yaku ch'akiywan wañuchinawaykipaj?

¹⁹ Chaypacha Dios kicharerqa Lehipi yaku juturita, Sansontaj chay pujyumanta yaku llojsimojta ujyarqa, watejmanta kallpata jap'illarqataj. Chayrayku chay jutureqa sutichasqa karqa En-hacore nisqa, chayqa kunankama Lehipi kashan.

²⁰ Sansonqa iskay chunka watasta Israelpa atipachejnin karqa, filisteos chay jallp'asta chay tiempospi kamachishajtinku.