Jueces 13 - Qheshwa Biblia DC

Sansompa nacekusqan

¹ Israelitasqa watejmanta ruwallarqankutaj Señorpa mana munasqan imasta, chayrayku Señor jaywaykorqa filisteospa makinman tawa chunka watata.

² Sorapi Dampa ayllun ukhupi uj runa Manoa sutiyoj karqa. Warmenqa mana jayk'ajpis wawayojchu karqa, wawata mana rejsej warmi kasqanrayku.

³ Señorpa angelnin payman rikhurispa nerqa: Qanqa mana jayk'ajpis wawayojchu karqanki, kunanrí wijsallisqa rikhurinki, qhari wawatataj nacechikunki.

⁴ Ama vinota ujyankichu, nillataj waj poqosqa ujyanastapis, nitaj ni ima ch'ichipaj qhawasqa mikhunastapis.

⁵ Uj qhari wawayki tiyapusonqa, chay wawaykej chujchantaqa ama k'utuchinkichu, imaraykuchus chay wawaqa Señorpaj t'aqasqa kanqa nazareo jina manaraj nacekusqanmantapacha. Paymin israelitasta filisteospa kamachiyninmanta kacharichiyta qhallarenqa, nispa.

⁶ Chay warmeqa qosanman willaspa kay jinata nerqa: Diospa uj runan noqaman jamuwarqa, payqa may mancharina karqa, imaraykuchus Señorpa kikin angelninman rijch'awarqa. Mana taporqanichu pichus kasqanta, nitaj paypis willawarqachu.

⁷ Pay niwarqa uj qhari wawayoj kanayta, kunanmantapachataj mana ujyanayta vinota, ni ima poqosqa ujyanasta, nillataj mikhunayta ch'ichipaj qhawasqa mikhunasta, imaraykuchus wawaqa Señorpaj t'aqasqa kanqa nazareo jina manaraj nacekusqanmantapacha wañupunankama.

⁸ Chanta Manoaqa oraciompi Señorman nerqa: Mañarikuyki Señor ujtawan kachamunaykita chay runata ujtawan willarinawaykupaj imastachus ruwanaykuta nacenqa chay qhari wawawan, nispa.

⁹ Diosqa uyarerqa Manoaj mañakusqanta, campopi kashajtintaj Señorpa angelnin ujtawan rikhurillarqataj chay warmiman. Qosan Manoataj mana paywanchu kasharqa.

¹⁰ Chaypacha chay warmeqa usqhayta qosanman rerqa, nerqataj: Uyariway! Qanimpa rikhuriwarqa chay runa watejmanta rikhurillawantaj!, nispa.

¹¹ Manoaqa jatarikuytawan warmimpa qhepanta rerqa, maypichus chay runa kasharqa chayman, paymantaj kay jinata nerqa: Qanchu kanki qanimpa p'unchaypi warmiyman parlaj runa? Chay runataj kuticherqa: Arí, noqa kani, nispa.

¹² Chaypacha Manoaqa nerqa: Qampa niwasqayku junt'akonqa chaypachaqa, imaynatataj chay wawata uywasqaykuri? Imatataj paywan ruwanayku kanqari?, nispa.

^13-14 Señorpa angelnintaj payman kuticherqa: Warmiyki junt'achun chay tukuy nisqasniyta: Ama ujyachunchu vinota, nitaj vinomanta ruwasqa kaj waj imastapis, nillataj poqosqa ujyanastapis, amallataj mikhuchunchu ch'ichipaj qhawasqa mikhunastapis. Tukuy kamachisqayta junt'akuchun.

^15-16 Manoaqa mana yacharqachu chay runaqa Señorpa angelnin kasqanta, paymantaj nerqa: Noqaykuwan qheparikuy mikhunaykipaj uj cabritomanta mikhuyta wakirqochisqayku chayta. Angeltaj kuticherqa: Qhepakuyman chaypis mana noqaqa qankunawan mikhuymanchu. Jinapis atiwaj chay cabritota q'olachispa Señorman jaywayta.

¹⁷ Manoataj angelman nerqa: Sutillaykitapis niwayku ari, kay niwasqasniyku junt'akojtin qanta honrasunaykupaj.

¹⁸ Señorpa angelnintaj kuticherqa: Imapajtaj sutiyta yachayta munankiri? Suteyqa may t'ukuna pakasqa sutimin.

¹⁹ Manoaqa cabritota chantá poqoykunasmanta ofrendatawan jap'ispa Señorman jaywarqa chhanqa patapi q'olachispa. Chaypacha Señorqa may t'ukuna imata ruwarqa Manoaj rikuynimpi warmimpa rikuynimpipis:

²⁰ Altarmanta nina pataman oqharikojtinkama, Manoawan warminwan ima, Señorpa angelninta rikorqanku chay ninaj larwaynin chaupita cieloman oqharikapojta. Chaypachataj umankuta pampaman k'umuykorqanku.

²¹ Jinamanta Manoaqa yacharqa chay runaqa Señorpa angelnimpuni kasqanta, manañataj ujtawan jayk'ajpis rikhurerqañachu payman nitaj warminmampis.

²² Manoataj warminman nerqa: Cheqamanta wañusumpunichá Diosta rikusqanchejrayku.

²³ Warmintaj kuticherqa: Sichus Señor wañuchiyta munawasunman karqa chayqa, manachari q'olachisqanchejta nitaj ofrendanchejtapis jap'iwasunmanchu karqa, nillataj kay imasta rikuchiwasunmanchu karqa. Nillataj kay tukuyta willawasunmanchu karqa.

²⁴ Chay warmeqa uj wawata nacechikorqa, sutintataj churarqa Sansonta. Wawataj wiñarqa, Señortaj bendicerqa.

²⁵ Señorpa Espirituntaj Sansonman jamuspa kallpachayta qallarerqa Dampa jarampi kashajtin, chaytaj kashan Zorawan Estaolwan chay chaupinejpi.