Jueces 12 - Qheshwa Biblia DC

Jefteqa Efraín aylluwan maqanakun

¹ Efraimpa ayllunmanta runasqa tantaykukuspa Jordán mayuta chimparqanku Zafón chaynejman, Jeftemantaj nerqanku: Imaraykutaj noqaykuman mana willaspalla amonitaswan maqanakoj rerqankiri? Noqaykoqa qanwan riykuman karqa. Kunanqa qanta wasiykitawan ruphaykuchisqayku.

² Jeftetaj kuticherqa: Noqa, chantá runasniypiwan ima amonitaswan uj jatun phiñanakuypi karqayku, noqataj qankunata wajyakorqaykichej, qankunataj mana jamuwarqaykuchu jark'akoj.

³ Qankuna yanapaj mana jamuwasqaykuta rikuspa, noqa kikiy maqanakupi ñak'ayta wañuymanta llusp'erqani amonitaswan maqanakuspa, Señortaj paykunata atipachiwarqa. Imaraykutaj qankunaqa noqawan maqanakoj jamuwankichejri?

⁴ Chaypacha Jefteqa Galaadmanta tukuy runasta tantaykorqa, Efraimpa ayllunwantaj maqanakorqa atipanankama. Efrainmanta kajkunaqa nerqanku: Efraín aylloj jinataj Manasés aylloj qayllampi tiyakojkuna galaaditasqa, Efrainmanta ayqekojkuna kankichej.

^5-6 Galaadmanta kajkunaqa Jordán mayoj ch'ajchasnimpi sayaykukorqanku, Efrainmanta kajkuna mayqellampis ayqekuspa pasachinankuta mañarikojtaqa, paykunaqa tapurej kanku Efrainmantachus manachus kasqanta. Mana kanichu nejtataj, kay jinata parlachej kanku: Shibolet, nispa. Pichari mana sut'ita nejchu, mana chayqa Sibolet nispalla parlaj chaytaqa jap'iytawankama kikimpi wañurparichej kanku chay Jordán mayu chimpanas chaynejpi. Chay kutipi Efraín ayllumanta tawa chunka iskayniyoj waranqapuni wañorqanku.

⁷ Jefteqa, israelitaspa sumaj atipachej runanku karqa sojta wata junt'ata. Wañupojtintaj Galaadmanta ujnin kaj llajtapi p'amparqanku.

Israelpa kinsa atipachejkunasnimpiwan

⁸ Jeftéj qhepantaqa Belenmanta Ibzan, Israelpa atipachejnin karqa.

⁹ Ibzampata kinsa chunka qhari wawasnin karqa, kinsa chunka warmi wawasnimpiwan, tukuyninkutataj casaracherqa mana ayllunkumanta kaj runastawan. Ibzanqa qanchis watata Israelpa atipachejnin karqa.

¹⁰ Wañupojtintaj Belempi p'amparqanku.

¹¹ Paypa qhepantataj, Zabulomps ayllunmanta Elonñataj chunka wata junt'ata Israelpa atipachejnin karqa.

¹² Wañupojtintaj Ajalón llajtapi p'amparqanku, paypa ayllunmanta kaj jallp'api.

¹³ Paypa qhepantataj Piratón llajtamanta Hielpa wawan Abdón Israelpi kamacherqa.

¹⁴ Abdompata tawa chunka wawasnin karqa, kinsa chunka allchhisnintaj, tukuyninkutaj burrospi purej kanku. Abdonqa Israelpi pusaj watata kamacherqa.

¹⁵ Pay wañupojtintaj Piratón llajtampi p'amparqanku, Efraín ayllu jallp'api, Amalec orqosnejpi.