Jueces 11 - Qheshwa Biblia DC

Jeftéj ruwasqasnin

¹ Jefteqa, Galaad jallp'amanta wapu maqanakoj runa karqa. Payqa karqa uj qhencha warmej wawan, tatantaj Galaad karqa.

² Galaadpata kikin warmimpi aswanraj wawasnin karqa. Chay wawasnintaj runayaykuytawanña Jefteta wasinmanta wijch'orqanku, nerqankutaj: Mana ima chayaqetapis tataykumanta jap'inkichu, waj warmimpi wawan kasqaykirayku, nispa.

³ Chaypacha Jefteqa ayqerikorqa chay hermanosninmanta, Tob jallp'amantaj tiyakamoj riporqa, chaypitaj mana kaj runasta tantaykorqa paywan purimunankupaj.

^4-6 Qhepan p'unchaykunasmantaj amonitasqa israelitasman maqanakoj yaykorqanku, maqanakuta qhallarejtinkutaj Galaadmanta kurajkunasqa rerqanku Tob jallp'aman Jefteta pusamunankupaj, Jeftemantaj nerqanku: Jaku ari noqaykuwan, amonitaspa contrampi maqanakupi kamachejniyku kanaykipaj.

⁷ Jeftetaj kuticherqa: Manachu qankunaqa chejninakuwarqankichej tataypa wasinmantapis qharqowarqankichej? Imaraykutaj kunanqa llakiypi rikukuspallaña mask'aj jamuwankichejri?

⁸ Paykunataj kuticherqanku: Chayrayku llakiykunas jamuwajtiyku qanta mask'aj jamuyku. Mañayku noqaykuwan rinaykita amonitaspa contrampi maqanakoj, tukuy Galaadpi tiyakojkunajpa kuraj kamachejninku kanaykipaj.

⁹ Jeftetaj kuticherqa: Sichus qankuna munankichej amonitaspa contrampi maqanakoj kutinayta chayqa, Señortaj atipayta qowanman chayqa, noqa kamachejniykichej kasaj, nispa.

¹⁰ Chay kurajkunataj ajina kananta nerqanku: Señor rikumushan, ruwasqaykutaj imaynatachus munasqaykiman jina.

¹¹ Jinamanta Jefteqa paykunawan rerqa, Israel ayllutaj wapu kamachejninkupaj jina churarqa. Jefteqa, ñaupajpi Mizpapi Señorpa ñaupaqempi nisqanta nillarqataj.

¹² Chaymantataj willajkunata kacharqa amonitaspa reyninkuman, tapurinankupaj kay jinata: Imataj tiyan noqaykoj contraykupi, kay jallp'aykuman kunan maqanakoj jamunaykipajri? nispa.

¹³ Amonitaspa reyninkutaj chay kachasman kuticherqa: Qankuna israelitas Egiptomanta llojsimushaspa jallp'asniykuta qhechuwarqayku, Arnón mayumantapacha Jaboc mayukama jinataj Jordán mayukama. Kunanqa ama phiñakuspalla kutichipuwayku.

^14-15 Chaypacha Jefteqa waj willajkunastañataj kacharqa amonitaspa reyninman, kay jinata willachispa: Jefteqa kay jinata nimun: Noqayku israelitasqa jallp'asta mana qhechuraykuchu moabitasmanta nitaj amonitasmantapis.

¹⁶ Maypachachus Egiptomanta llojsimorqanku chaypacha, puka mar qochakama ch'in pampanta chimpamorqanku, Cadeskamataj chayamorqanku.

¹⁷ Chaypacha kacharqanku willajkunata Edompa reyninman chay jallp'annejta pasajta saqenankuta, chaywampis payqa mana saqerqachu pasajta, Moabpa reyninmampis kachallarqankutaj, paypis manallataj munarqachu. Chayrayku Cadespi qhepakorqayku.

¹⁸ Chay qhepantarí chay ch'in pampasnejta purispa Edompa jallp'asninta, jinataj Moabpa jallp'asnintapis muyuykorqanku. Chayamorqankutaj Moab jallp'aj inti llojsimuynejman, chaypitaj jarakorqanku chay Arnón mayoj ladon chimpapi. Manataj chimparqankuchu imaraykuchus Moabpa jallp'asninña kasqanrayku.

¹⁹ Chaypacha willajkunata kacharqanku Hesbonman amorreokunaj reyninku Sehonman, mañachispa chay jallp'asninkunejta pasaytawan jallp'ankuman ripunankupaj.

²⁰ Jinataj Sehonqa mana saqerqachu chayninta pasanankuta; manachayqa soldadosninta tantaykorqa, Jahaza chaynejman jarakuspataj israelitaswan maqanakorqanku.

²¹ Israelpa Señor Diosnenqa atipacherqa Sehonta jinataj soldadosnintapis, jinamanta jap'ikaporqanku chay cheqapi amorreokunaj jallp'asninkuta:

²² Chay amorreospa jallp'asninkuta jap'isqankoqa karqa: Arnón mayumantapacha Jabockama, chay ch'in pampanmantapacha Jordán mayukama.

²³ Kunanqa Israelpa Señor Diosnin amorreosmanta ñaupaqeykupi qhechuspa noqaykumantaj qopuwarqayku chay jallp'atachu qhechuyta munawayku?

²⁴ Sichus diosniyki Quemos imatapis qosunkiman, chaytataj qampata kasqanta ninki. Manachu jina? Ajinallatataj noqaykupis imastachus Señorqa ñaupaqeykupi qhechuspa qowasqaykutaqa noqaykojta kasqanta qhawayku.

²⁵ Qanqa yuyankichu Moabmanta rey Siporpa wawan Balacmanta aswan allin kasqaykitachu. Jinapis payqa mana noqaykoj contraykupichu maqanakoj jamorqa.

²⁶ Kinsa pachaj watasña kanqa Hesbompi ranchosnintimpi noqaykoj tiyakusqaykoqa, chantá Aroerpi jinataj chay qaylla ranchosnimpi, ajinallatataj chay Arnón mayoj qaylla llajtaspipis. Imaraykutaj mana aswan ñaupajmanta chay jallp'asmanta mana parlarerqankichejchuri?

²⁷ Mana noqaqa ni ima sajra kajtapis ruwaykichu. Qanmá mana allintachu ruwashanki noqaykuwan maqanakoj jamuspa. Señormin Juezqa, paymin cheqanchanqa israelitasta jinataj amonitastapis.

²⁸ Chaywampis amonitaspa reyninkoqa Jeftej willachisqanta mana kasorqachu.

Jeftéj imatachus Diosman qosaj nisqan

²⁹ Chaypacha Señorpa Espíritun Jefteman jamorqa, Jeftetaj pasarqa Galaadnejta, Manasesnejta, Galaadpi Mizpaman, Mizpamantataj amonitaspa jallp'asninkuman yaykorqa.

^30-31 Jeftetaj Señorman qosqayki nerqa kay jinata: Sichus amonitasta atipachiwanki chayqa, qampaj jaywanata q'olachipusqayki pichari ñaupajta wasiymanta taripamoj llojsimuwanqa chayta.

³² Chaypacha Jefteqa amonitaspa jallp'asninkuman yaykorqa paykunawan maqanakoj, Señortaj payta atipacherqa.

³³ Jefteqa ashkha runasta wañucherqa, atiparqataj iskay chunka llajtasta, Aroermanta Minitkama, jinataj Abel-keraminkama. Jinamanta israelitasqa amonitasta k'umuykachacherqanku.

³⁴ Maypachachus Jefté Mizpapi wasinman kutiporqa chaypacha uj k'ata warmi wawan karqa chay llojsimorqa taripamoj pandereta tocana jap'irisqa phinkiykacharispa. Pay k'atalla wawanqa karqa.

³⁵ Ajinaqa payta rikuytawankama p'achanta llik'ikorqa may llakikuywantaj kay jinata nerqa: Ay, wawáy, may chhika llakiyta apamuwanki! Qannejta may llakiypi rikhurisaj! Uj promesata Señorman ruwarqani kunantaj junt'anay tiyan.

³⁶ Chay warmi wawantaj kuticherqa: Tatáy, noqamanta Señorman imata nisqaykitaqa junt'allay. Payqa nisusqanta junt'asorqa jaqay enemigosniyki amonitasta atipachisuspa.

³⁷ Chaywampis mañarikuyki kachanawaykita iskay killapaj jaqay orqosnejta warmi kausaqesniywan khuska puririkamunaypaj, chaypitaj waqamusaj manaraj casarakushaspa wañunay kasqanmanta.

³⁸ Jefté qorqa iskay killasta, chay tiempotataj orqosnejta waqaspa purerqa warmi kausaqesninwan khuska, manaraj piwan casarakushaspa wañunan kasqanmanta.

³⁹ Chay tiempo junt'akojtintaj tatampaman kutimporqa, paytaj junt'arqa Señorman imatachus qosaj nerqa chayta. Jeftéj sipas warmi wawanqa wañorqa mana ni pi qharita qosampaj rejsispa.

⁴⁰ Chayrayku uj costumbre karqa israelitas ukhupi, sapa wata sipaskuna Jeftéj ususinman waqaj rinanku tawan p'unchaykunasta jina.