Judas 1 - Qheshwa Biblia DC

Apóstol Judas creejkunaman cartata apachin

¹ Noqa Judas, Jesucristoj kamachin, Santiagoj wauqentaj, wajyasqasman escribimuni, Dios Tatapi llimphuchasqasman, Jesucristopitaj waqaychasqas kajkunaman.

² Qankunapi khuyakuy, sonqo tiyakuy, munakuypis ashkhayachun.

Llullata yachachejkuna

³ Munasqa hermanosníy, maytapuni munarqani tukuypa salvacionninchejmanta escribimuyta. Chayrayku kunanqa, escribimunaypuni karqa qankunata sonqochaspa, sinch'ita sayanaykichejpaj feniykichejrayku. Chaytaj uj kutillata ayllasqasninman qosqa karqa.

⁴ Wakin runasqa pakayllamanta yaykumorqanku. Paykunamantaqa ñaupajmantapachaña Escrituras willarqanku juiciopaj juchachasqas kasqankuta. Paykunaqa mana manchachikuyniyoj kanku, Diosninchejpa khuyakuynintapis millay kausayninkuman tukuchinku. Kamachej sapan Diosta, Señorninchej Jesucristotapis qhesachanku.

⁵ Uj kuti yachasqaykichejmanta munani yuyarikunaykichejta; imaynatachus Diosninchej Israel aylluta Egiptomanta orqhomuspa salvasqanta, mana creejkunatataj wañurachisqanta.

⁶ Jinallatataj angelesta, ñaupaj jatun kayninkuta mana waqaychasqankurayku; astawanqa janaj pacha tiyanankuta saqesqankurayku, jaqay jatun p'unchay juiciopaj watasqasta, laqhayay ukhupi, wiñaypaj waqaycharqa.

⁷ Jinallatataj, Sodoma, Gomorra llajtas, chay qayllapi kajkunapis qhenchachakorqanku cuerponkoj contranta juchallispa; chayrayku paykunaqa wiñaypaj nina larwayta ñak'arerqanku. Chayqa wananapaj churasqa karqa.

⁸ Chaywampis, kikillantataj chay mosqokojkunapis ukhunkuta khuchichanku, kamachejkunatapis qhesachanku, janaj pachapi atiykunapajpis sajrata rimanku.

⁹ Arcángel Miguelpis, supaywan churankuspa, Moisespa cuerpon jawa, mana munarqachu juiciopaj juchachayta. Payqa nillarqa: Señor k'amisuchun, nispa.

¹⁰ Chay runakunarí, mana imata rejsisqankupaj sajrata rimanku; imastachus rejsisqankupirí, mana yuyayniyoj uywas jina, wañuyman rinku.

¹¹ Ay paykunamanta! Caimpa ñanninta purerqanku, qolqerayku Balaampa pantasqanman urmarqanku, Coréj oqharikusqampitaj wañorqanku.

¹² Paykunaqa, munasqa qarakusniykichejta ch'ichichanku. Mana manchachikuspa qankunawan khuska mikhunku, paykuna kikinkuta michikuspa. Paykunaqa kanku mana yakuyoj phuyus, wayraj apaykachasqasnin, poqoy tiempopi mana poqoyniyoj sach'as, iskay kuti wañusqas, saphinmantapacha t'irasqas.

¹³ Phiñarisqa mar qochaj yakusnin, paykunaqa kikin p'enqayninkuta phosoqonku, ch'eqerasqa purej qoyllurkuna, pikunapajchus laqhayaypa tutayaynin wiñaypaj waqaychasqa kashan.

^14-15 Chay runakunamantaqa Enoc, Adanmantapacha qanchis kaj karqa, kay jinata nerqa: Qhawaychej, Señorqa waranqa waranqa ajllasqasninwan jamushan, tukuyninkuta juzgaj, juchachajtaj Diosta mana yupaychajkunata, sajra ruwasqasninkuwan juchallisqankurayku. Juchachallanqataj tukuy jatuchaj phiña palabraswan paypaj rimasqankumanta. Kaykunaqa juchasapas kanku, mana Diosniyoj runas.

¹⁶ Paykunaqa wasa rimakus kanku. Phiñanachejkunataj, munayninkuman jinataj purinku. Siminkoqa may jatun kasqankumanta parlan, runastataj llunk'unku qolqerayku.

Creejkunapaj kamachiykuna

¹⁷ Munasqa hermanosníy, qankunaqa yuyarikuychej imatachus Señorninchej Jesucristoj apostolesnin ñaupajmantapacha niwarqanchej, chayta.

¹⁸ Paykuna nisorqachej: Qhepa p'unchaykunapi asipayajkuna jamonqanku, sajra munayninkuman jinataj purenqanku.

¹⁹ Chaykunaqa t'aqanachejkuna kanku; aychaman jina purinku, mana Espirituyoj kaspa.

²⁰ Munasqa hermanosníy, qankunaqa kallpachanakuspa wiñaychej allin sumaj llimphuchasqa feniykichejpi, Diosmanta mañakuspataj Santo Espiritunejta.

²¹ Diospa munakuynimpi waqaychakuychej, Señor Jesucristoj khuyakuyninta suyaspa, wiñay kausayta jap'inaykichejpaj.

²² Wakin iskayrayajkunata khuyakuywan unanchachiychej.

²³ Wakintarí salvaychej, ninamanta ayqechispa; wakintataj manchachikuywan khuyakuychej, chejniychejtaj aychampa ch'ichichasqan p'achatapis.

Diosta yupaychana

²⁴ Kunanqa yupaychay kachun atiyniyojman, pichus pay k'atalla atin mana juchayojta qankunata waqaychayta; ajinallatataj atin qankunata janaj pacha k'anchayninman mana juchayojta, may kusiywan pusayta.

²⁵ Yachayniyoj uj k'ata Dios Salvadorninchejman Señorninchej Jesucristonejta yupaychay kachun, jatun kay, atiy, kamachiy, kunanmantapacha wiñaypa wiñayninkama. Amén.