San Juan 9 - Qheshwa Biblia DC

Ciegota Jesús thañichin

¹ Jesús rishaspa rikorqa uj runata nacisqanmantapacha ciegota.

² Yachachisqasnintaj payta taporqanku: Maestro, imajtintaj kay runaqa ciego nacikorqa? Tatasninchu juchallerqanku, chayrí paychu?

³ Jesustaj kuticherqa: Mana paychu juchallikorqa, nitaj tatasninchu, astawanqa chay jina nacerqa, Diospa ruwanasnin paynejta rikuchisqas kanankupaj.

⁴ P'unchayraj kashajtin, kachamuwajniypa ruwanasninta ruwanaypuni tiyan; tutaqa chayamushanña, chaypachataj ni pi llank'ayta atenqachu.

⁵ Mundopi kanaykamaqa mundoj k'anchaynin kani.

⁶ Chayta niytawan, thoqayninwan uj chhika t'uruta ruwaspa, ciego runaj ñawisninman jawiykorqa.

⁷ Chantá payman nerqa: Kunanqa riy, Siloé estanquepi mayllakamuy; Siloé niyta munan kachasqa. Ciego runataj rispa mayllakamorqa, qhawashajtaj kutimorqa.

⁸ Chantá kausaqesnin, tukuy payta ciego kashajtillanraj rejsejkuna nerqanku: Manachu kayqa, tiyakuspa mañakoj karqa?

⁹ Wakin runas nerqanku: Arí, paypuni. Wakintaj nerqanku: Mana paychu. Wajkunataj, payman rijch'akun nerqanku. Paytaj nerqa: Arí, noqa kani.

¹⁰ Chaymantá taporqanku: Imaynamantataj ñawisniyki kicharikorqankuri?

¹¹ Paytaj kutichispa nerqa: Chay Jesús sutiyoj runa, t'uruta ruwaspa ñawisniyman jawiykuwarqa, niwarqataj: Siloeman rispa mayllakamuy. Rispataj mayllakamorqani, chay kikimpachataj qhawarerqani.

¹² Chantá taporqanku: Kunan maypitaj chay runari? Paytaj kuticherqa: Mana yachanichu, nispa.

Fariseos tapunku qhawarej ciegota

¹³ Ciego karqa chay runata, fariseospa ñaupaqenkuman pusarqanku.

¹⁴ Samakuna p'unchay karqa, maypachachus Jesús, t'uruta wakichispa ciego runaj ñawisninta qhawaricherqa chaypacha.

¹⁵ Fariseos ujtawan payta tapullarqankutaj imaynamantachus ñawisnin qhawarisqanta. Paytaj kuticherqa: T'uruwan ñawisniyman churaykuwarqa, chantá mayllakamorqani, kunantaj rikuni, nispa.

¹⁶ Chaypacha wakin fariseos nerqanku: Chayta ruwaj runaqa mana Diosmantachu kanman; payqa samakuna p'unchayta mana waqaychanchu. Wakintaj nisharqanku: Imaynatataj uj juchasapa runa, chay jina milagrosta ruwanmanri? Ajinamanta paykunapurapi t'aqanakuy karqa.

¹⁷ Chantá ujtawan ciego karqa chay runata tapullarqankutaj: Qanrí, ima ninkitaj, ñawisniykita qhawaricherqa chay runamanta? Paytaj nerqa: Noqa nini profeta kasqanta.

¹⁸ Judiostaj mana creerqankuchu, chay runa ñaupajta ciego kasqanta, imaynamantachus rikusqanta ima; chayrayku tatanta mamantawan wajyacherqanku.

¹⁹ Paykunatataj taporqanku: Kaychu ciego nacikorqa ninkichej chay wawaykichejqa? Imaynamantataj kunan rikunri?

²⁰ Tatasnintaj kutichispa nerqanku: Arí, ciego nacikorqa. Chay wawayku payqa.

²¹ Mana yachaykuchu imaynamantachus kunan pay rikun, chayrí pichus ñawisninta kicharerqa. Payqa machu runaña. Payta tapuychej, willasonqachejtaj pay kikinmanta.

²² Jinata tatasninku nerqanku, judiosta manchachikuspa. Judíos parlanakorqankuña, pillapis Jesusta Mesías kasqanta ninman chaytaqa, sinagogamante wijch'unankuta.

²³ Chayrayku tatasnin nerqanku: Payqa machu runaña, payta tapuychej, nispa.

²⁴ Judiostaj watejmanta wajyarqanku ciego karqa chay runata, nerqankutaj: Diosta yupaychay; noqayku yachayku chay runaqa juchasapa kasqanta.

²⁵ Chaypacha pay kutichispa nerqa: Noqa mana yachanichu, juchasapachus manachus kasqanta. Ujta yachani: Ñaupajta ciego karqani, kunantaj qhawariniña.

²⁶ Ujtawan tapullarqankutaj: Imanasorqataj? Imaynamantataj ñawisniykita kicharerqa?

²⁷ Paykunamantaj kuticherqa: Willarqaykichejña, qankunataj mana uyariwarqankichejchu. Imapajtaj ujtawan willanayta munankichejri? Qankunapis yachachisqasnin kaytachu munankichej?

²⁸ Chantá payta k'amerqanku, nerqankutaj: Qanmá chay runaj yachachisqan kanki; noqaykoqa Moisespa yachachisqasnin kayku.

²⁹ Noqayku yachayku Moisesman Dios parlasqanta; chay runamantarí, mana yachaykuchu maymantachus kasqanta.

³⁰ Ciego karqa chay runataj nerqa: Chayqa t'ukunapaj jina; qankuna mana yachankichejchu maymantachus chay runa kasqanta; paytaj noqaj ñawisniyta kichariwarqa.

³¹ Allinta yachaychej, Diosqa juchasapasta mana uyarisqanta. Pichus Diosta yupaychan, munaynintataj ruwan, chayta pay uyarin.

³² Qallariymantapacha, mana jayk'ajpis uyarikorqachu uj ciego nacikojpa ñawisninta pipis kicharisqan.

³³ Manachus Diosmanta chay runa kanman chayqa, mana imatapis ruwayta atinmanchu karqa.

³⁴ Paykunataj kutichispa nerqanku: Qanqa juchawan junt'asqa nacerqanki, qanchu noqaykuman yachachiwasqayku? Jawamantaj payta qharqorqanku.

Espiritupi ciegos kajkuna

³⁵ Jesustaj uyarerqa chay runata jawaman qharqosqankuta. Taripaytawantaj payman nerqa: Creenkichu Runaj Churimpi?

³⁶ Chay runataj kutichispa nerqa: Señor, pitaj payri, paypi creenaypaj?

³⁷ Jesustaj kuticherqa: Ñapis rikunkiña. Noqa kani, qanwantaj parlashani.

³⁸ Paytaj: Creeni, Señor, nispa; Jesuspa ñaupaqempi qonqoriykukorqa.

³⁹ Jesustaj nerqa: Kay mundoman jamorqani juiciopaj, mana rikojkuna rikunankupaj, rikojkunataj ciegoyanankupaj.

⁴⁰ Paywan kasharqanku chay fariseosmanta, wakin chayta uyarispa nerqanku: Chantá noqaykupis ciegosllatajchu kayku?, nispa.

⁴¹ Jesús kutichispa nerqa: Ciegos kawajchej chayqa, mana juchayojchu kawajchej; astawanqa rikuyku nisqaykichejrayku juchaykichej qankunapi kashan.