San Juan 8 - Qheshwa Biblia DC

Qhenchachakoj warmi

¹ Jesustaj Olivos orqoman rerqa.

² Q'ayantintaj sut'iyayta temploman Jesús kutirerqa, llajtamanta tukuy runastaj qayllarqanku. Jesustaj tiyaykukuspa chay runasman yachachiyta qallarerqa.

^3-4 Leymanta yachachejkunataj, fariseoswan, payman pusamorqanku qhenchachakuypi taripasqa warmita, chaupipi sayaykuchispataj, Jesusman nerqanku: Maestro, kay warmeqa qhenchachakushaspa jap'ichikun.

⁵ Moisespa leynimpi kamachiwayku, chay jina juchayoj warmista rumiwan ch'anqaspa wañuchinaykuta; qanrí ima ninkitaj?

⁶ Chayta nerqanku imaynatachus Jesús kutichinanta, chayman jina payta ch'ataykunankupaj. Jesustaj k'umuykuspa pampapi dedonwan escriberqa.

⁷ Anchatapuni runas payta tapojtinkutaj, sayaykuspa paykunaman nerqa: Mayqenchá qankunamanta mana juchayoj kaj, ñaupajta chay warmita ch'anqachun.

⁸ Jesustaj watejmanta k'umuykuspa pampapi escribillarqapuni.

⁹ Runastaj chayta uyarispa, sonqonkupi juchayoj kasqankuta yachakuspa, ujmanta uj llojsiraporqanku, machu runasmanta qallarispa. Jesustaj sapallan qhepakorqa, jinallataj chaypi kasharqa chay warmipis.

¹⁰ Jesustaj k'umuykusqanmanta sayarispa warmiman nerqa: Maytaj chay ch'atasojkunari? Manachu mayqempis juchachasorqanku?, nispa.

¹¹ Warmitaj nerqa: Mana mayqempis, Señor. Jesustaj payman nerqa: Noqapis mana juchachaykichu; kunanqa ripuy, amataj ujtawan juchallikunkichu.]

Jesusqa mundoj k'anchaynin

¹² Jesús uj kutitawan runasman parlallarqataj: Noqa kay pachaj k'anchaynin kani; pillapis noqata qhatikuwajqa, mana laqhapi purenqachu, astawanqa kausay k'anchayniyoj kanqa.

¹³ Chantá, fariseos payman nerqanku: Qan kikiykimanta willakushanki, chay willakusqaykitaj mana cheqachu kashan.

¹⁴ Jesús paykunaman kutichispa nerqa. Noqallamanta willakuni chayqa, cheqapuni kashan willasqayqa. Yachani maymantachus jamusqayta, maymantajchus rishasqayta. Qankunarí mana yachankichejchu maymantachus jamusqayta, nitaj maymanchus rishasqaytapis.

¹⁵ Qankunaqa, aychaj munasqanman jinalla juchachankichej. Noqataj mana pitapis juchachanichu.

¹⁶ Noqaj juzgasqayqa cheqa. Mana sapallaychu kashani, astawanqa kachamuwaj Tataywan ima.

¹⁷ Leyniykichejpi pis escribisqa kashan; iskay runachus kikinta ninku chayqa, cheqapuni.

¹⁸ Noqa kikiymanta willakuni, kachamuwajniy tataypis noqallamantataj willan.

¹⁹ Chantá taporqanku: Maytaj Tataykiri?, nispa. Jesustaj paykunaman nerqa: Qankuna mana rejsiwankichejchu, manallataj Tataytapis rejsinkichejchu. Noqatachus rejsiwankichejman chayqa, Tataytapis rejsillawajchejtaj.

²⁰ Jesustaj kay imasta nerqa, templopi yachachishaspa ofrendata churana cheqapi; manataj pipis payta jap'iykorqachu, imaraykuchus manaraj horan chayamorqachu.

Noqa ripusaj chayman mana jamuyta atinkichejchu

²¹ Jesús uj kutitawan nillarqataj: Noqa ripojtiytaj qankuna mask'awankichej, chaywampis juchaykichejpi wañunkichej; noqa rishani chayman mana jamuyta atinkichejchu.

²² Judiostaj nerqanku: Pay kikinchu wañuchikonqa? Chayraykuchu nishawanchej: Maymanchus rishani chayman qankuna mana jamuyta atiwajchejchu?, nispa.

²³ Jesús paykunaman nerqa: Qankuna kay uramanta kankichej, noqataj patamanta kani. Qankunaqa kay mundomanta kankichej, noqarí mana kay mundomantachu kani.

²⁴ Chayrayku nerqaykichej juchaykichejpi wañunaykichejta. Noqapi mana creenkichejchu chayqa, juchaykichejpi wañunkichej.

²⁵ Chaypachataj paykuna tapurerqanku: Pitaj qan kankiri?, nispa. Chantá Jesús paykunaman nerqa: Qallariymantapachaña willarqaykichej pichus kasqayta.

²⁶ Qankunamanta ashkha imasta parlanay, juchachanaytaj tiyan; noqata kachamuwajqa cheqamin; noqataj paymanta uyarisqayta kay pachapi willashani.

²⁷ Paykunataj mana yachayta aterqankuchu Dios Tatamanta willasqanta.

²⁸ Chayrayku Jesús paykunaman nerqa: Maypachachus Runaj Churinta pataman oqharinkichej, chaypacharaj noqa kasqayta rejsiwankichej; yachankichejtaj mana imatapis sapallaymanta ruwasqayta. Jinallatataj yachankichej Dios Tataj yachachiwasqanta, parlawasqantapis.

²⁹ Kachamuwaj Tatayqa noqawan kashan, mana sapayta saqerpayawanchu. Paypa munaynillanta ruwani.

³⁰ Jesús kay imasta nisqantawan ashkha runa paypi creerqanku.

Pischus Diospa wawasnin kanku

³¹ Chantá, Jesús nerqa paypi creej judiosman: Palabrayman jinachus sayankichej chayqa, cheqamanta yachachisqasniy kankichej.

³² Cheqa kajta rejsinkichej, cheqa kajtaj kacharichisonqachej.

³³ Paykunataj kuticherqanku: Noqaykoqa Abrahampa mirayninmanta kayku, mana jayk'ajpis mayqempa kamachinchu karqayku. Imamanta qan nishanki kacharisqas kanaykuta?

³⁴ Jesús paykunaman nerqa: Cheqamanta, cheqamanta niykichej; tukuy juchallikojqa, juchaj kamachin.

³⁵ Kamacheqa mana wiñaypajchu wasipi qhepakun; churitaj wiñaypaj wasipi qhepakun.

³⁶ Chayrayku, Churichus kacharichisunkichej chayqa, cheqamanta kacharisqas kankichej.

³⁷ Noqa yachani Abrahampa mirayninmanta kasqaykichejta; chaywampis qankunaqa wañuchiwayta munashankichej, palabrayta sonqoykichejpi mana jap'isqaykichejrayku.

³⁸ Noqataj Dios Tataj qayllampi rikusqaymanta parlani, qankunataj ruwashankichej imatachus tataykichejmanta uyarisqallaykichejta.

³⁹ Paykuna kuticherqanku. Noqaykoj tataykoqa Abraham. Jesustaj paykunaman nerqa: Abrahampa wawasninchus kawajchej chayqa, paypa ruwasqasninta ruwawajchej.

⁴⁰ Qankunaqa wañuchiyta munawankichej, qankunaman cheqa kajta willajta. Chaytataj Diosmanta uyarerqani, Abrahamtaj mana jayk'ajpis jinata ruwarqachu.

⁴¹ Qankunaqa ruwashankichej tataykichejpa ruwasqanta. Paykunataj nerqanku: Mana noqaykoqa qhenchachakojpa wawasninchu kayku; uj tatayojlla kayku, chaytaj Dios.

⁴² Chaypacha Jesús nerqa: Cheqamantachus tataykichej Dios kanman chayqa, noqata munakuwankichejman. Diosmanta kay pachaman jamorqani; manataj sapallaymantachu, manachayqa Dios kachamuwarqa.

⁴³ Imaraykutaj parlasqayta mana unanchankichejchu? Parlasqaytaqa mana uyariyta atinkichejchu.

⁴⁴ Qankunaqa tataykichej supaymanta kankichej; chay tataykichejpa munaynintataj junt'ayta munankichej. Payqa runa wañuchipuni qallariymantapacha karqa, manataj jayk'ajpis cheqapeqa sayarqachu, nitaj cheqa kajqa sonqompichu karqa. Llullata parlaspaqa, paypa kayninmanta parlan; imaraykuchus payqa llulla, llullakuypa tatan kasqanrayku.

⁴⁵ Noqatarí cheqata parlasqayrayku, mana creewankichejchu.

⁴⁶ Mayqentaj qankunamanta ima juchallamantapis uyanchawankichejman? Cheqa kajtachus nini chayqa, imaraykutaj mana creewankichejchu?

⁴⁷ Diospa wawasnenqa, Diospa palabranta uyarinku. Qankunataj mana uyariyta munankichejchu; mana Diospa wawasninchu kankichej.

Manaraj Abraham kashajtin Cristo karqaña

⁴⁸ Chaymanta judíos kutichispa nerqanku: Manachu noqaykoqa allinta niyku, samaritano, supayniyojtaj kasqaykita?

⁴⁹ Jesustaj kuticherqa: Mana supayniyojchu kani, astawanqa Tatayta jatunchani; qankunataj pisipi qhawawankichej.

⁵⁰ Mana jatumpi qhawachikuytachu mask'ashani; wajtaj jatumpi kanayta mask'aj tiyan, paytaj juzganqa.

⁵¹ Cheqamanta, cheqamanta niykichej: Pillapis palabrayta waqaychajqa mana jayk'ajpis wañuyta rikonqachu.

⁵² Judiostaj Jesusman nerqanku: Yachaykuña kunanqa supayniyoj kasqaykita. Abrahamqa wañorqa, jinallataj profetaspis; qantaj nishanki: Palabrayta waqaychajqa mana wiñaypaj wañonqachu, nispa.

⁵³ Abraham tataykumanta aswan kurajchu qan kanki? Payqa wañorqa, profetaspis wañullarqankutaj. Pi kasqaykitataj qan yuyankiri?

⁵⁴ Jesustaj judiosman nerqa: Noqachus jatunchakuyman chayqa, qhasilla kanman. Tatay noqataqa jatumpi qhawawan. Qankunapis payllatataj Diosniyku ninkichej.

⁵⁵ Qankunaqa mana payta rejsinkichejchu, noqataj rejsini. Noqachus mana rejsinichu niyman chayqa, qankuna jina llulla kayman. Noqa payta rejsini, palabrantataj waqaychani.

⁵⁶ Ñaupa tataykichej Abrahamqa kusikorqa p'unchayniyta rikuyta munaspa, rikuspataj mayta kusikorqa.

⁵⁷ Judiostaj Jesusman nerqanku: Manaraj phishqa chunka watayojpischu kashanki, chaychu Abrahamta rejsiwaj karqa?

⁵⁸ Jesús paykunaman nerqa: Cheqamanta, cheqamanta niykichej: Manaraj Abraham kashajtin, noqa kaniña.

⁵⁹ Chaypacha judíos, rumista oqharikorqanku Jesusta ch'anqanankupaj. Jesustaj paykunaj ñawisninkumanta pakakorqa; templomantataj llojsiporqa.