San Juan 7 - Qheshwa Biblia DC

Jesuspa wauqesnin

¹ Chay imas qhepata Galileapi Jesús purisharqa, manataj Judeapi puriyta munarqañachu; imaraykuchus judíos payta wañuchiyta munasharqanku.

² Judiospa qhochukunman qayllaña karqa; ch'ujllas qhochuku nisqa karqa.

³ Jesusmantaj wauqesnin nerqanku: Ripuy kaymanta Judeaman, yachachisqasniykipis ruwasqasniykita rikunankupaj.

⁴ Pillapis runasman rejsichikuyta munaspaqa, mana imatapis pakayllapi ruwanmanchu. Ruwashanki chay imastaqa, tukuypa rikunanta ruway ari.

⁵ Wauqesnimpis Jesuspi mana creerqankuchu.

⁶ Chantá, Jesús paykunaman nerqa: Noqapajqa hora mana chayamushanrajchu; qankunapajtaj mayqen horapis walejlla kashan.

⁷ Kay mundopi kajkunaqa, qankunata mana chejnisunkichejmanchu. Noqatarí chejniwanku, sajra ruwasqasninkuta paykunaman rikuchisqayrayku.

⁸ Qankuna riychej chay qhochukuman. Noqaqa mana risajchu, imaraykuchus horayqa manaraj junt'akushanchu.

⁹ Chay imasta niytawantaj, Jesús qhepakorqa Galileapi.

Jesuspis qhochukupi kasharqa

¹⁰ Wauqesnin risqankutawan, Jesuspis rillarqataj chay qhochukuman, runaswan mana rikuchikuspa pakayllamanta.

¹¹ Judiosqa qhochukupi Jesusta mask'arqanku, nerqankutaj: Maynejpitaj chay runa kashanri?, nispa.

¹² Chay runa ukhupitaj Jesusmanta parlasharqanku. Wakin nerqanku: May k'acha chay runaqa. Wakintaj nerqanku: Mana allinchu, imaraykuchus ashkha runasta ch'aukiyashan.

¹³ Manataj mayqempis Jesusmanta sut'ita parlajchu, judiosta manchachikuspa.

¹⁴ Khuskan qhochuku kashajtinña Jesusqa temploman yaykuspa, yachacherqa.

¹⁵ Judiostaj t'ukorqanku, nerqankutaj: Kay runa imaynamanta chhika yachayniyoj rikhurimunri, mana imata yachachikuspallari?

¹⁶ Jesustaj kuticherqa: Yachachishani chay yachacheyqa, mana noqajtachu, kachamuwajniypata.

¹⁷ Diospa munayninta ruwayta munajqa, yachachiyninta rejsenqa Diosmantachus, chayrí noqallamantachus kasqanta.

¹⁸ Pillapis pay kikinmanta parlajqa, mask'an paylla runaswan jatumpi qhawachikuyta. Kachamojninta jatumpi qhawachiyta munajta, cheqanta parlan, manataj paypi ima llullapis kanchu.

¹⁹ Manachu Moisés qankunaman leyta qosorqachej? Manataj mayqempis chay leyta junt'ankichejchu. Imaraykutaj wañuchiwayta munashankichejri?

²⁰ Runakunataj kutichispa nerqanku: Supayniyoj kanki; pitaj wañuchisuyta munashanri?

²¹ Jesustaj paykunaman nerqa: Uj allin imata ruwasqayrayku qankunaqa t'ukushankichej.

²² Moisés qosorqachej circuncidanapaj leyta, mana paypata kajtachu, ñaupa tatasninchejpata kajta. Chayman jinataj runata circuncidankichej samakuna p'unchaypi.

²³ Sichus samakuna p'unchaypi runata circuncidankichej, Moisespa leyninta mana p'akiyta munaspa chayqa, imaraykutaj noqapaj phiñakushankichej, onqosqa runata samakuna p'unchaypi thañichisqaymantari?

²⁴ Ama rijch'ayninman jinallachu juzgaychej. Cheqan kajman jina juzgaychej.

Jesús willan pichus pay kasqanta

²⁵ Wakin runas Jerusalenmanta kajkuna nerqanku: Manachu kay runata wañuchinankupaj mask'ashanku?

²⁶ Qhawariychej, tukuypa rikunanta parlashan, nitaj pipis imata nishanchu. Ichapis llajtapi kamachejkuna rejsinkuña Cristopuni kasqanta.

²⁷ Noqanchejqa yachanchej maymantachus pay jamusqanta. Cristo chayamojtintaj, ni pi yachanqachu maymantachus chayamusqanta.

²⁸ Chayta uyarispa Jesusqa, templopi yachachishaspa sinch'ita parlarerqa: Noqata rejsiwankichej, yachankichejtaj maymantachus kasqayta; manataj sapaymantachu jamuni. Kachamuwarqa chaytaj cheqapuni, qankunataj payta mana rejsinkichejchu.

²⁹ Noqarí rejsini, imaraykuchus paymanta kani, paytaj kachamuwarqa.

³⁰ Chaymantataj Jesusta presochayta munarqanku; manataj mayqempis jap'iykuyta aterqachu, imaraykuchus manaraj horan chayamusharqachu.

³¹ Ashkha runastaj Jesuspi creerqanku, nerqankuta: Jamonqa chay Cristo, ruwanmanchu kay milagrosmanta astawan?

Jesusta presochayta munanku

³² Fariseos uyarerqanku Jesusmanta runas rimasqankuta. Paykunataj kuraj sacerdotes ima, soldadosta kacharqanku Jesusta presochanankupaj.

³³ Chaypacha Jesús nerqa: Pisi p'unchayllatawanña qankunawan kasaj, chantá, kachamuwajniypaman kutipusaj.

³⁴ Qankunaqa mask'awankichej, manataj tariwankichejchu; imaraykuchus maypichus kasaj, chayman jamuyta mana atinkichejchu.

³⁵ Chaypacha judíos tapunakorqanku: Maymantaj kay runa renqa, noqanchej payta mana tarinanchejpajri? Ch'eqerasqa judiospamanchu renqa, gentilesman yachachimoj?

³⁶ Ima niyta munan chay jinata parlasparí: Noqata mask'awankichej, manataj tariwankichejchu; maypichus kasaj chaymantaj jamuyta mana atinkichejchu, nispari?

Kausaj yakuyoj mayu

³⁷ Qhochuku tukukuy jatun p'unchaypitaj, Jesús sayariytawan sinch'ita parlaspa nerqa: Pichus ch'akichikojqa, noqaman jamuchun, ujyachuntaj.

³⁸ Noqapi creejqa, escribisqaman jina, ukhunmanta kausay yaku mayus puririmonqanku.

³⁹ Chayta Jesús nerqa sutimpi creejpa sonqonman Santo Espíritu jamunanmanta; chaywampis Santo Espiritoqa manaraj jamorqachu, Jesús Tatampaman manaraj wicharisqanrayku.

Runakuna t'aqanakunku

⁴⁰ Chayta uyarispa wakin runasqa nerqanku: Cheqamanta kayqa, jamunan karqa chay profeta.

⁴¹ Wakintaj nerqanku: Kaypuni Cristoqa. Wajkunataj nerqanku: Galileamantachu Cristoqa jamunman?, nispa.

⁴² Manachu Cristomantaqa yachanchej escribisqaman jina, Davidpa mirayninmanta, Belén llajtamantataj jamunanta?

⁴³ Ajinata ninakuspa, Jesusrayku iskayman t'aqanakorqanku.

⁴⁴ Paykunamanta wakin munarqanku Jesusta jap'iykuyta, manataj mayqenninkupis makisninkuta churaykorqankuchu.

Jesuspi mana creerqankuchu

⁴⁵ Soldadostaj kutirimorqanku, maypichus kuraj sacerdotes, fariseos ima kasharqanku chayman. Paykunataj taporqanku: Imaraykutaj chay runata mana pusamunkichejchu?

⁴⁶ Soldadostaj nerqanku: Mana jayk'aj pi runapis parlarqachu chay runa jinaqa!

⁴⁷ Fariseostaj paykunaman nerqanku: Qankunapis chay runaj ch'aukiyasqallantaj chu kankichej?

⁴⁸ Mayqentaj kamachejkunamanta, chayrí fariseosmanta paypi creenkuri?

⁴⁹ Chay runas, Moisespa leyninta mana yachajkunaqa, maldicisqas kanku.

^50-51 Fariseosmanta Nicodemo, pichus Jesusta tuta watukoj rerqa, chaytaj nerqa: Leyninchejman jina, mana pillatapis juchachayta atisunmanchu, manaraj parlasqanta uyarishaspaqa, nitaj ima ruwasqanta yachashaspapis.

⁵² Chaymantaj paykuna kuticherqanku: Galileamantachu qampis kanki? Escribisqapi allinta qhaway, chaypi allinta yachanki Galileamanta ni pi profeta jatarisqanta. [

⁵³ Chaymantataj sapa uj wasinkuman riporqanku.