San Juan 18 - Qheshwa Biblia DC

Jesusta presochanku

¹ Kay imasta niytawan, Jesús llojserqa yachachisqasninwan Cedrón wayq'o chimpaman; chaypi uj huerta karqa. Chaymantaj Jesús yaykorqa yachachisqasninwan.

² Jesusta jap'ichej Judaspis chay cheqata rikullarqataj, imaraykuchus Jesusqa yachachisqasninwan ashkha kutista tantakoj chaypi.

³ Chaypacha Judas chayamorqa, uj t'aqa soldados pusarisqa, kuraj sacerdotespata, fariseospatawan kamachisninku ima. Paykunataj karqanku k'anchasniyoj, lamparasniyoj, armasniyoj ima.

⁴ Jesustaj yacharqaña tukuy chay ima payman chayamunanta, ñaupaykuspataj nerqa: Pitataj mask'ashankichej?, nispa.

⁵ Paykunataj: Nazareno Jesusta mask'ashayku, nerqanku. Jesustaj kuticherqa: Noqa kani. Jesusta jap'ichej Judaspis paykunawan kasharqa.

⁶ Noqa kani nejtinkamataj, qhepaman kutirispa pampaman urmararqanku.

⁷ Jesús ujtawan tapullarqataj: Pitataj mask'ashankichej? Paykunataj: Nazareno Jesusta mask'ashayku, nerqanku.

⁸ Jesús paykunaman kutichispa nerqa: Noqa kani nerqaykichejña. Noqatachus mask'ashawankichej chayqa, saqeychej kaykuna ripunankuta.

⁹ Chaymin karqa Jesuspa nisqan junt'akunampaj, imaraykuchus pay nerqa: Tatáy, qowarqanki chaykunamanta, mana ujtapis chinkacherqanichu.

¹⁰ Chaypacha Simón Pedroqa espadayoj kasharqa, sik'ispataj kuraj sacerdotej kamachimpa paña ningrinta wajtaspa qholurparerqa; chay kamachitaj Malco sutiyoj karqa.

¹¹ Jesustaj chaypacha Pedroman nerqa: Espadaykita waqaychananman churaykapuy. Manachu Tataypa qowasqan vasomanta ujyayman?

Jesús jatun sacerdotej ñaupaqempi

¹² Chaypacha t'aqa soldadospa capitannin, judiospa runasnin ima, Jesusta presocharqanku, watarqankutaj.

¹³ Pusarqankutaj ñaupajta Anaspa wasinman. Anasqa Caifaspa suegron karqa. Caifastaj chay wataqa kuraj sacerdote kasharqa.

¹⁴ Caifastaj judiosman yuyayta qorqa: Walej kanman tukuy runasrayku uj runalla wañunan, nispa.

Pedro mana Jesusta rejsejman tukun

¹⁵ Pedrotaj, ujnin yachachisqawan Jesuspa qhepanta rerqanku. Chay ujnin yachachisqantaj jatun sacerdotej rejsisqan karqa; chayrayku kuraj sacerdotej pationman Jesuswan yaykorqa.

¹⁶ Pedrotaj jawa punkupi qhepakorqa. Jatun sacerdotej rejsisqan yachachisqataj, llojsimuspa punku qhawaj warmita parlapayarqa, Pedrotataj pusaykorqa.

¹⁷ Chay warmitaj Pedroman nerqa: Manachu qampis chay runaj yachachisqan kanki?, nispa. Pedrotaj nerqa: Mana noqachu kani.

¹⁸ Chirejtintaj kamachis, judiospa runasnin ima, ninata jap'ichispa chaypi q'oñikusharqanku. Pedropis paykunawan sayasqa q'oñikushallarqataj.

Jatun sacerdote Anasqa Jesusta tapun

¹⁹ Jatun sacerdotetaj Jesusta taporqa yachachisqasninmanta yachachiyninmanta wan.

²⁰ Jesustaj payman kuticherqa: Tukuypa rikunanta mundopi parlarqani. Yachacherqanitaj sinagogapi, templopi ima, maypichus judíos tantakunku chaypi; manataj imatapis pakaypi parlarqanichu.

²¹ Imarayku noqata tapuwankiri? Parlasqayta uyariwajkunata tapuy ari; paykuna yachanku imatachus parlasqayta.

²² Chayta nisqantawan, Caifaspa soldadon Jesuspa uyampi laq'arqa: Ajinatachu jatun sacerdoteman kutichinki?, nispa.

²³ Jesustaj payman nerqa: Sajratachus parlani chayqa, niway ari mayqen parlasqaychus mana allin kasqanta. Sichus allin chayqa, imaraykutaj laq'awankiri?

²⁴ Anastaj watasqata Jesusta pusacherqa, jatun sacerdote Caifaspaman.

Pedro ujtawan Jesusta mana rejsejman tukun

²⁵ Pedro sayasqa q'oñikushajtin, payman nerqanku: Manachu qampis chay runaj yachachisqan kanki? Pedrotaj nerqa: Mana yachachisqanchu kani.

²⁶ Chantá jatun sacerdotej ujnin kamachin, mayqempatachus Pedro ningrinta qholurparerqa, pichus ayllun karqa chay runajpata, Pedroman nerqa: Manachu qanta huertapi paytawan rikorqayki?

²⁷ Pedro ujtawan, mana rejsinichu nisqantawantaj, gallo waqarqa.

Jesús, Pilatoj ñaupaqempi

²⁸ Jesusta pusarqanku Caifaspamanta, pretorio nisqa wasiman. Sut'iyamuytataj chay pusajkunaqa, mana pretorioman yaykorqankuchu, mana ch'ichichakuyta munaspa; ajinamanta Pascua mikhuyta mikhunankupaj.

²⁹ Chaypacha Pilato llojsimuspa, paykunata taporqa: Imamantataj kay runata ch'atankichejri?, nispa.

³⁰ Paykunataj kutichispa nerqanku: Manachus sajrata ruwanman karqa chayqa, mana qanman pusamuykumanchu karqa.

³¹ Chantá Pilato paykunaman nerqa: Pusaychej, leyniykichejman jinataj juzgaychej. Judiostaj payman nerqanku: Noqayku judiosqa mana pitapis wañuchiyta atiykumanchu.

³² Chayta nerqanku Jesuspa nisqan junt'akunampaj, ima wañuywanchus wañunan kasqanta.

³³ Chaypacha Pilato kutiykorqa pretorioman, Jesusta wajyaspataj taporqa: Judiospa Reyninchu kanki?, nispa.

³⁴ Jesustaj payman kuticherqa: Qanllamantachu chayta ninki, chayrí wajkunachu noqa kasqayta nisunku?

³⁵ Pilato Jesusman kuticherqa: Judiochu noqa kani? Llajta masisniyki, kuraj sacerdotes ima kayman pusamusunku. Imatataj ruwarqankiri?

³⁶ Jesús kuticherqa: Reinoyqa mana kay mundomantachu. Reinoychus kay mundomanta kanman karqa chayqa, kamachisniy noqarayku maqanakunkuman judioswan ama jap'ichisqa kanaypaj; kunanrí reinoyqa mana kay mundomantachu.

³⁷ Chaypacha Pilato payman nerqa: Chantá qan reychu kanki? Jesustaj kuticherqa: Qan ninki noqa rey kasqayta. Noqaqa chaypaj nacerqani, chaypajtaj kay mundoman jamorqani, cheqa kajmanta willanaypaj. Tukuy cheqa kajmanta kajrí, parlasqayta uyarin.

³⁸ Pilato tapullarqataj: Imataj chay cheqa kajri?, nispa. Chayta tapuytawan, Pilatoqa uj kutitawan llojsispa, judiosman nerqa: Chay runapeqa mana ima juchatapis tarinichu.

Jesusta juchachanku wañunampaj

³⁹ Qankuna usuykichejman jina yachankichej, Pascuapeqa uj presota kacharinapuni kasqanta. Munankichejchu judiospa reyninta kacharinayta?

⁴⁰ Chaypacha ujtawan qhaparerqanku, nispa: Chay runataqa ama, Barrabasta kachariy! Barrabastaj suwa karqa.