San Juan 17 - Qheshwa Biblia DC

Jesús mañapun yachachisqasnimpaj

¹ Jesús kay tukuy imata parlarqa, janaj pachata qhawarispataj, nerqa: Tatáy, hora chayamunña; Churiykita jatunchay, qantapis Churiyki jatunchasunampaj.

² Churiykiman atiyta qorqanki, tukuy runasta kamachinampaj; wiñay kausaytataj paykunaman qonampaj, pikunatachus payman qorqanki, chaykunaman.

³ Kaymin chay wiñay kausayqa: Qan k'ata cheqa Diosta rejsisunanku, kachamusqayki Jesucristotapis.

⁴ Noqa kay pachapi alabarqayki, tukuchaniñataj ruwanasta qowasqaykitaqa.

⁵ Kunantaj Tatáy, qayllaykipi jatunchaway, jaqay janaj pacha k'anchaywan, mayqenchus tiyapuwarqa qanwan kashajtiy, manaraj mundo ruwakushajtin.

⁶ Sutiykita rejsicherqani mundomanta qowasqayki runasman. Qampata karqanku, qopuwarqankitaj, paykunataj palabraykita waqaycharqanku.

⁷ Kunanqa yachankuña, tukuy ima qowasqaykeqa qanmanta kasqanta.

⁸ Chay palabrasta qowasqaykitaqa paykunaman qorqani, paykunataj jap'ikorqanku. Qanmanta jamusqantapis cheqamanta yachanku, creenkutaj qan kachamuwasqaykita.

⁹ Noqa paykunarayku mañakuni; mana mundoraykuchu, astawanqa, qan qowarqanki chaykunarayku. Paykunaqa qampata kanku.

¹⁰ Tukuy noqajta kajtaj qampata. Qampata kajtaj noqajta. Paykunanejtataj jatunchasqa kani.

¹¹ Noqa manaña mundopichu kasaj. Paykunataj mundopi qhepakonqanku, noqataj qanman jampusaj. Sumaj Tatáy, noqapi creejkunata sutiykipi waqaychay, paykuna uj sonqolla kanankupaj, qanwan noqawan ujlla kanchej, ajinata.

¹² Kay mundopi paykunawan kashaspaqa, sutiykipi paykunata waqaycharqani; pikunatachus qowarqanki chaykunata. Manataj mayqempis chinkarqachu, chinkanampaj churasqalla chinkarqa, Escritura junt'akunampaj.

¹³ Kunanqa qanman jamushani; mundopi kashaspa kay imasta parlani, paykuna kusiywan junt'asqas kanankupaj.

¹⁴ Palabraykita paykunaman willarqani; mundotaj paykunata chejnerqa, imaraykuchus paykuna mana mundojtachu kanku, noqapis manallataj mundojtachu kani.

¹⁵ Mana mañakunichu paykunata mundomanta pusakapunaykita, astawanqa mañakuni paykunata sajramanta waqaychanaykita.

¹⁶ Paykuna mana mundojtachu kanku, noqapis manallataj mundojtachu kani.

¹⁷ Paykunata llimphuchay cheqa kajpi; palabraykeqa cheqapuni.

¹⁸ Imaynatachus qan mundoman kachamuwarqanki, ajinallatataj paykunata mundoman kacharqani.

¹⁹ Paykunarayku noqa kikiyta qanman entregakuyki, paykunapis cheqa kajpi qanman entregakusunankupaj.

^20-21 Mana paykunallapajchu mañakuni, astawanqa paykunaj palabranrayku, noqapi creenqanku chaykunapajpis. Mañakuyki tukuyninku ujlla kanankupaj; imaynatachus, Tatáy, qan noqapi kashanki, noqataj qampi, ajinata paykunapis noqanchejwan ujlla kanankupaj; chay jinamanta kay mundo qan kachamuwasqaykita creenampaj.

²² Allin k'anchayta qowasqaykita paykunaman qopuni, ujlla kanankupaj noqanchej jina.

²³ Noqa paykunapi kashani, qantaj noqapi; paykuna uj yuyayllawan allin junt'asqas kanankupaj; mundo yachanampaj qan kachamuwasqaykita, paykunatataj munakusqaykita, imaynatachus noqatapis munakuwanki ajinata.

²⁴ Tatáy, munani qowasqayki yachachisqasqa, maypichus noqa kashani, chaypi noqawan kanankuta. Janaj pacha k'anchayta qowasqaykitapis rikunankupaj. Kay mundo manaraj ruwasqa kashajtin, munakuwarqankiña.

²⁵ Cheqan kaj Tatáy, mundoqa mana rejsisorqachu, noqataj rejsiyki, paykunataj yachankuña qan kachamuwasqaykita.

²⁶ Paykunaman sutiykita rejsicherqani, astawanraj rejsichisajpis, ima munakuywanchus munakuwarqanki, chay munakuy sonqonkupi kanampaj, noqataj paykunapi.