San Juan 16 - Qheshwa Biblia DC

¹ Kay imasta nerqaykichej ama misk'anaykichejpaj.

² Sinagogasmanta wijch'usonqanku; hora qayllamushanña maypachachus pillapis qankunata wañuchispa yuyanqa Diospaj allinta ruwashasqanta.

³ Chayta ruwanqanku, imaraykuchus Dios Tatata, noqatapis mana rejsiwaykuchu.

⁴ Chay imasta nerqaykichej, chay hora chayamojtin yuyarikunaykichejpaj imastachus nisqaymanta. Qallariypeqa kay imasta mana nerqaykichejchu, imaraykuchus qankunawan kasharqani.

Santo Espíritoj ruwaynin

⁵ Kunantaj rishani kachamuwajniyman; manataj mayqenniykichejpis tapuwankichejchu: Maymantaj rishanki?, nispa.

⁶ Astawanqa kay imasta nisqayrayku, sonqoykichejman llakiy junt'aykun.

⁷ Noqataj cheqata niykichej: Qankunapaj allin kanqa noqa rinayqa, imaraykuchus mana riyman chayqa, sonqochaj Espíritu mana jamunmanchu qankunaman. Ripusaj chayqa, payta kachamusqaykichej.

⁸ Pay jamuspaqa mundopi kaj runasta juzganqa juchamanta, cheqa kajmanta, juiciomantawan.

⁹ Juchamanta, imaraykuchus juchayoj kanku noqapi mana creesqankurayku.

¹⁰ Cheqa kajmanta, imaraykuchus Tatayman ripushani, manañataj qankuna ujtawan rikuwankichejchu.

¹¹ Juiciomanta, imaraykuchus kay pachapi kamachejqa juchachasqaña.

¹² Ashkha imastawanraj qankunaman ninay tiyan, manataj chaykunata unanchayta atiwajchejchu kunanqa.

¹³ Chay cheqa Espíritu chayamojtin, pay cheqa kajman pusasonqachej; imaraykuchus mana payllamantachu parlanqa, astawanqa Dios Tatamanta tukuy uyarisqanta nenqa. Qankunamantaj willasonqachej imaschus qhepata jamunankuta.

¹⁴ Paytaj jatunchawanqa, imaraykuchus noqajmanta jap'enqa, yachachisonqachejtaj.

¹⁵ Tukuy ima Tataypata kajqa noqajllatataj; chayrayku noqajmanta jap'enqa nerqani, qankunamantaj yachachisonqachej.

¹⁶ Uj chhikamanta manaña rikuwankichejchu; uj chhikamantataj, watejmanta rikullawankichejtaj; imaraykuchus Dios Tataman rishani.

Phutikoyqa kusiyman tukun

¹⁷ Chaypacha wakin yachachisqasnin tapunakorqanku: Imatataj niyta munawanchej: Uj chhikamanta mana rikuwankichejchu; uj chhikamantataj ujtawan rikuwankichej, imaraykuchus Tataypaman rishani, nispari?

¹⁸ Ima niytataj munan uj chhikamantawan nispari? Mana unanchayta atinchejchu imatachus nisqanta.

¹⁹ Jesustaj yachaspa tapukuyta munasqankuta, paykunaman nerqa: Uj chhikamantawan manaña rikuwankichejchu; uj chhikamantataj ujtawan rikullawankichejtaj, nisqayraykuchu, tapunakushankichej?

²⁰ Cheqamanta, cheqamanta niykichej: Waqankichej, llakikunkichejtaj; kay mundopi runastaj kusikonqanku. Chaywampis llakiyniykichejqa kusikuyman tukonqa.

²¹ Onqoj warmeqa, wachakunan p'unchay chayamojtin llakikun; imaraykuchus horan chayamun; wawata wachakuytawantaj chay nanaymanta qonqapun, kusikuywan kay mundopi wawata nacichikusqanrayku.

²² Ajinata qankunapis kunan llakikushankichej. Uj kutitawan rikusqaykichej, sonqoykichejtaj kusikonqa; manataj pipis chay kusiyta qankunamanta qhechuyta atenqachu.

²³ Chay p'unchaypitaj mana imata tapuwankichejchu. Cheqamanta, cheqamanta niykichej: Dios Tataqa, tukuy imata sutiypi mañakojtiykichejqa qosonqachej.

²⁴ Kunankama mana imatapis sutiypi mañakorqankichejchu; kunanqa mañakuychej, jap'inkichejtaj, kusikuyniykichej junt'asqa kanampaj.

Jesucristo mundota atipan

²⁵ Kay tukuy imasta rijch'anachina palabraswan parlarqaykichej. Hora qayllamushanña, chaypachataj mana rijch'anachinaswan chu parlasqaykichej, astawanqa, sut'ita Dios Tatamanta willasqaykichej.

²⁶ Jaqay p'unchaypeqa sutiypi mañakunkichej; manataj niykichejchu Dios Tatamanta mañapusqaykichej, nispa.

²⁷ Kikin Dios Tata munakusunkichej, qankuna noqata munakuwasqaykichejrayku, creenkichejtaj Dios Tatamanta jamusqayta.

²⁸ Dios Tatajmanta llojsimorqani, mundomantaj jamorqani; kunantaj mundota saqespa Dios Tatajman kutishani.

²⁹ Yachachisqasnin nerqanku: Kunan sut'ita parlanki, manataj rijch'anachina palabraswanchu.

³⁰ Kunanqa yachayku tukuy imata yachasqaykita, manataj pipis imata tapusunan kanchu; chayrayku creeyku Dios Tatamanta jamusqaykita.

³¹ Jesustaj paykunaman kuticherqa: Kunanqa creenkichejchu?, nispa.

³² Kayqa hora chayamushanña, chayamunñapis, chaypachataj ch'eqerasqas kankichej; sapa ujpis munasqaykichejman jina ripunkichej, noqata sapayta saqerparispa; manataj sapaychu kashani, imaraykuchus Tatay noqawan kashan.

³³ Kay tukuy imasta niykichej, noqapi sonqo tiyasqas kanaykichejpaj. Mundopeqa ñak'arinaykichej tiyan; chaywampis sonqochakuychej, imaraykuchus mundota noqa atipaniña.