San Juan 13 - Qheshwa Biblia DC

Jesús mayllan yachachisqasnimpa chakisninta

¹ Pascuaman qayllaña kashajtin, Jesús yacharqa horan chayamusqantaña, kay mundomanta Dios Tataman ripunampaj. Imaynatachus kay mundopi paypata kajkunata munakorqa, ajinata paykunataqa tukukuykama munakorqa.

² Cenata mikhushajtinku, Simompa churin Judas Iscariotej sonqonman supay yuyaycharqa Jesusta jap'ichinampaj.

³ Jesustaj yacharqa Dios Tatamanta jamusqanta, Diosmantaj kutipushasqanta. Yachallarqataj Dios tukuy atiyta payman qosqanta.

⁴ Chayrayku cenapi kashaspa sayarerqa, pata p'achanta orqhokuspa, uj toallata cinturanman warkhuykukorqa.

⁵ Uj ch'illamipi yakuta jich'arqospataj, yachachisqasnimpa chakisninta mayllayta qallarerqa. Cinturampi karqa chay toallawantaj chakisninkuta ch'akicherqa.

⁶ Simón Pedroman qayllaykojtintaj, Pedro nerqa: Señor, qanchu chakisniyta mayllawanki?

⁷ Jesús payman kuticherqa: Kay ruwasqayta mana yachankirajchu, qhepamanraj entiendenki.

⁸ Pedrotaj nerqa: Mana jayk'ajpis chakisniyta mayllawankichu. Jesustaj kuticherqa: Manachus mayllasqayki chayqa, mana noqawan chayaqeyojchu kanki, nispa.

⁹ Simón Pedro nerqa: Jina kajtenqa, ama chakisnillaytachu; makisniyta, umaytawan mayllaway.

¹⁰ Jesús payman nerqa: Pichus mayllasqa kashan chayqa, tukuy ukhun llimphuña, chakisnillanta mayllana tiyan. Qankunaqa llimphuña kankichej, manapis tukuyniykichejchu.

¹¹ Jesús yacharqa mayqenchus Payta jap'ichinan karqa chayta; chayrayku nerqa: Manapis tukuyniykichejchu llimphu kankichej.

¹² Chakisninkuta mayllayta tukuytawantaj, Jesús churaykukorqa p'achanta. Chantá ujtawan mesaman tiyaykukuspataj nerqa: Yachankichejchu imapajchus chakisniykichejta mayllasqayta?

¹³ Qankuna noqata sutichawankichej Maestro, Señor nispa; walejta niwankichej, imaraykuchus chay noqa kani.

¹⁴ Noqachus Maestro, Señortaj kaspa, chakisniykichejta mayllarqaykichej chayqa, kikillantataj qankunapis chakisniykichejta mayllanakuychej.

¹⁵ Chayta noqa ruwani, qankunapis noqa jina ruwanaykichejpaj.

¹⁶ Cheqamanta, cheqamanta niykichej: Kamacheqa patronninmanta mana aswanchu, nitaj kachasqapis kachajninmanta aswan kurajchu.

¹⁷ Chay imastachus entiendespa ruwayta yachankichej chayqa, kusikuyniyoj kankichej.

¹⁸ Mana tukuyniykichejmantachu kayta nini; noqa yachani pikunatachus ajllasqayta. Chaywampis Escritura junt'akunan tiyan: Noqawan t'antata mikhojqa contray rikhurin.

¹⁹ Kunanmantapacha niykichej, chay imas manaraj junt'akushajtinku, junt'akojtin creenaykichejpaj noqa kasqayta.

²⁰ Cheqamanta, cheqamanta niykichej: Kachasqayta wajyarejqa, noqata wajyariwan; noqata wajyariwajtaj, kachamuwajniyta wajyarin.

Jesús nin Judas payta jap'ichinanta

²¹ Chay imasta niytawan, Jesús sonqonta nanachikorqa, sut'inchaspataj nerqa: Cheqamanta, cheqamanta niykichej; qankunamanta ujniykichej jap'ichiwankichej.

²² Yachachisqasnintaj qhawanakorqanku, yachayta munaspa pimantachus chayta nisqanta.

²³ Yachachisqasninmanta ujnin kaj, pitachus Jesús munakoj, chay qayllampi kasharqa.

²⁴ Simón Pedrotaj señaswan payman nerqa: Tapuriy pimantachus parlashan chayta.

²⁵ Paytaj Jesuspa qayllampi kaspa taporqa: Señor, pitaj chayri? nispa.

²⁶ Jesús kuticherqa: Pimanchus t'antata chhapuspa jaywasaj, chay kanqa. Chantá Jesús jaywarqa Judas Iscarioteman, Simompa churinman, t'antata chhapuspa.

²⁷ Judas Iscariotej sonqonman, Satanás yaykorqa t'antata mikhuykusqantawan. Chaypachataj payman Jesús nerqa: Ruwanayashanki chaytaqa usqhayta ruway, nispa.

²⁸ Mikhusharqanku chaykunaqa mana unanchayta aterqankuchu imaraykutaj Jesús jinata nisqanmanta.

²⁹ Wakin yuyasharqanku Judas Iscariote qolqe wayaqata jap'isqanrayku payman Jesús nisqanta: Rantimuy imachus qhochukupaj mana kanchu chayta, chayrí wajchasman imallatapis qomuy, nispa.

³⁰ Judastaj mikhuyta tukuytawan llojsiporqa; tutañataj karqa.

Mosoj kamachiy

³¹ Judas llojsejtintaj Jesús nerqa: Kunanqa Runaj Churin jatunchasqaña, Diospis jatunchasqallataj paynejta.

³² Sichus Dios Churipi jatunchasqa chayqa, Diospis pay kikimpi Churita jatunchallanqataj. Kikimpachataj chayta ruwanqa.

³³ Wawitasníy, pisillantaña qankunawan kasaj, mask'awankichejtaj. Judiosman nerqani ajinallatataj qankunamanqa niykichej: Maymanchus noqa rishani, chayman riyta mana atinkichejchu.

³⁴ Uj mosoj kamachiyta qoykichej: Purajmanta munanakunaykichejta. Imaynatachus noqa munakorqaykichej, ajinallatataj qankunapis purajmanta munanakuychej.

³⁵ Qankunachus munanakunkichej chayqa, tukuy runas yachanqanku yachachisqasniy kasqaykichejta.

Jesús willan Pedro qhesachananta

³⁶ Simón Pedro Jesusta taporqa: Señor, maymantaj rishanki? Jesustaj payman kuticherqa: Maymanchus rishani chaymanqa, kunan mana qhatiwayta atiwajchu; qhepamanraj qhatiwanki.

³⁷ Pedrotaj nerqa: Señor, imaraykutaj kunan mana qanwan riyta atiymanchu? Kausayniyta churasaj qanrayku.

³⁸ Jesús payman nerqa: Churawajchu kausayniykita noqarayku? Cheqamanta, cheqamanta niyki: Manaraj gallo waqashajtin, qanqa kinsa kutikama, noqata mana rejsiwasqaykita ninki.