San Juan 10 - Qheshwa Biblia DC

Oveja t'aqamanta yachachiy

¹ Cheqamanta, cheqamanta niykichej: Pichus oveja kanchaman mana punkuntachu yaykun, wajnejta wasaykun chayqa, suwa saltea.

² Pichus oveja kanchaman punkunta yaykun chayqa, chaymá ovejasta michejqa.

³ Kancha punkuta qhawajtaj paypaj punkuta kicharin. Ovejastaj michejpa vozninta rejsinku; paytaj sutisninmanta wajyaspa kanchamanta orqhon.

⁴ Tukuy ovejasninta qharqoytawantaj, michejqa ovejaspa ñaupaqenta rin; ovejastaj qhepanta rinku, vozninta rejsisqankurayku.

⁵ Mana rejsisqatarí, mana qhatinkuchu, astawanqa paymanta ayqenku, wajkunaj parlasqanta mana rejsisqankurayku.

⁶ Jesusqa chay rijch'anachinawan parlarqa; paykunataj mana entiendeyta aterqankuchu, paykunaman nisharqa chayta.

Sumaj michejqa Jesús

⁷ Jesús uj kutitawan paykunaman nillarqataj: Cheqamanta, cheqamanta niykichej: Noqa punku kani.

⁸ Noqamanta ñaupajta jamorqanku chay tukoyqa, suwas karqanku, salteajkunataj; ovejastaj paykunata mana uyarerqankuchu.

⁹ Noqa punku kani: Noqanejta yaykojqa salvasqa kanqa; yaykonqataj, llojsenqataj, pastostataj tarenqa.

¹⁰ Suwaqa jamun suwanallampaj, wañuchinampaj, chinkachinampajtaj. Noqarí jamuni kausayniyoj kanankupaj, aswan junt'a kausayniyoj kanankupajtaj.

¹¹ Noqa sumaj michej kani. Sumaj michejqa kausayninta qon ovejasrayku.

¹² Qolqeraykulla michejqa mana cheqa michejchu. Ovejas mana paypata kasqanrayku, atoj jamojtinkama ayqepun, atojtaj ovejasta jap'iraspa ch'eqerachin.

¹³ Ajinata qolqeraykulla michejqa ayqen, manataj ovejasta allinta michinchu.

¹⁴ Noqa sumaj michej kani: Ovejasniyta rejsini, noqajta kajkunataj rejsiwanku.

¹⁵ Imaynatachus Dios Tata rejsiwan, ajinallatataj noqapis payta rejsini; kausayniytataj ovejasrayku churani.

¹⁶ Waj ovejas tiyapullawantaj. Chaykunaqa mana kay t'aqamantachu kanku. Chay ovejastapis pusamunallaytaj tiyan. Paykunata wajyajtiy uyariwanqanku. Uj t'aqalla kanqanku, uj k'ata michejniyojtaj.

¹⁷ Chayrayku Dios Tata munakuwan. Noqa kausayniyta qoni watejmanta jap'ikapunaypaj.

¹⁸ Kausayniytaqa mana pipis qhechuwanmanchu, astawanqa noqa kikiymanta qoni. Atiyniy tiyan kausayniyta qonaypaj, jinallataj watejmanta jap'ikapunaypaj. Kay kamachiytaqa Tataymanta jap'erqani.

¹⁹ Judiostaj chay nisqanta uyarispa, ujtawan paykunapura churanakorqanku.

²⁰ Paykuna ukhupi ashkhas nerqanku: Kay runaqa supayniyoj, manataj paypichu kashan, imapajñá uyarishankichejri?, nispa.

²¹ Wakinkunataj nerqanku: Kay palabrasqa mana supayniyojpatachu. Atinmanchu supayqa ciegospa ñawinta kichariyta?

Judiosqa Jesusta qhesachanku

²² Jerusalempitaj temploj diachakunta ruwasharqanku; chiri tiempoñataj karqa.

²³ Chaypacha Jesús puriykachasharqa templonejta, Salomón punkupi.

²⁴ Judiostaj payta muyuykuspa nerqanku: Mayk'ajkamataj sonqoykuta iskayrayachinki? Cristo kanki chayqa, sut'ita willawayku.

²⁵ Jesustaj kutichispa nerqa: Willarqaykichejña, qankunataj mana creenkichejchu. Tataypa sutimpi milagrosta ruwasqasniy, pichus noqa kasqayta sut'inta willasunkichej.

²⁶ Qankuna mana creenkichejchu imaraykuchus mana ovejasniymantachu kankichej.

²⁷ Noqa ovejasniyta rejsini, paykunataj vozniyta uyariwanku, qhepaytataj jamunku.

²⁸ Noqa paykunaman wiñay kausayta qoni; manataj jayk'ajpis chinkanqankuchu, makisniymantapis mana pipis qhechuwanqachu.

²⁹ Chay ovejasta qowaj Tatayqa, tukuymanta aswan jatun. Tataypa makinmanta mana pipis qhechuyta atinmanchu.

³⁰ Noqawan, Dios Tatawanqa ujlla kayku.

³¹ Chaypi judíos ujtawan rumista oqharikorqanku, Jesusta ch'anqaykunankupaj.

³² Jesustaj paykunaman kuticherqa: Tataypa ashkha sumachaj ruwasqasninta rikucherqaykichej; kunanqa, mayqenmantataj ch'anqawankichej?

³³ Judiostaj kuticherqanku: Allin ruwasqasmantaqa mana ch'anqasqaykuchu, manachayqa Dios jina parlasqaykimanta; runa kashaspa Dioswan khuskachakusqaykimantataj.

³⁴ Jesustaj kuticherqa: Leyniykichejpi Diospa palabran escribisqa kashan: Noqa nini dioskuna kasqaykichejta.

³⁵ Sichus paykunata dioskuna nispa suticharqa chayqa, pikunamanchus Diospa palabran jamorqa chay Escrituraqa, mana pantanmanchu.

³⁶ Pitachus Dios Tata ajllarqa, kay pachamantaj kachamorqa; qankunataj ninkichej Dios jina parlan, nispa. Chaytaqa Diospa Churin kani nisqayraykuchu niwankichej?

³⁷ Sichus Tataypa ruwanasninta mana ruwanichu chayqa, ama creewaychejchu.

³⁸ Chaykunatachus ruwashani chayrí, amapis noqapi creeychejchu, ruwasqasnillayta creeychej; yachanaykichejpaj, rejsinaykichejpaj taj Dios Tata noqapi kasqanta, noqataj Dios Tatapi.

³⁹ Chantá ujtawan jap'iykuyta munarqanku; Jesustaj makisninkumanta riporqa.

⁴⁰ Chaymanta uj kutitawan rerqa Jordán mayu chimpaman, maypichus ñaupajta Juan bautizasharqa chaynejman; chaypitaj qhepakorqa.

⁴¹ Payta watukojtaj ashkhas rerqanku, nerqankutaj: Cheqamanta Juanqa mana ima milagrostapis ruwarqachu; Jesusmanta nisqantaj cheqa karqa.

⁴² Chaypitaj ashkhas Jesuspi creerqanku.