San Juan 1 - Qheshwa Biblia DC

Diospa Palabran runaman tukun

¹ Tukuy imaj qallariynimpi Palabraqa karqapuni. Chay Palabraqa Dioswan kasharqa, Palabrataj Dios karqa.

² Kaymin qallariypeqa Dioswan karqa.

³ Tukuy imas paypa ruwasqan kashan. Mana paywanqa, mana imapis ruwasqachu karqa ruwasqamantaqa.

⁴ Kausayqa paypi kasharqa. Chay kausaytaj runaspaj k'anchay karqa.

⁵ K'anchayrí laqhapi lliphipin. Laqhataj k'anchayta mana atiparqachu.

⁶ Uj runa karqa Diospa kachamusqan. Paypa sutintaj Juan.

⁷ Payqa k'anchaymanta willanampaj jamorqa, paynejta tukuy runas Diospi creenankupaj.

⁸ Mana Juanchu chay k'anchayqa karqa. Payqa k'anchaymanta willanampaj kachamusqa karqa.

⁹ Cheqa k'anchayqa, kay pachapi tukuy runasman k'anchanampaj jamorqa.

¹⁰ Palabraqa kay pachapiña kasharqa. Kay mundotaj paynejta ruwasqa karqa. Kay mundopi kaj runastaj payta mana rejserqankuchu.

¹¹ Paypata kajkunaman jamorqa. Paykunataj mana uyariyta munarqankuchu.

¹² Sutimpi creespa, tukuy payta recibejkunaman atiyta qorqa, Diospa wawasnin kanankupaj.

¹³ Paykunaqa mana yawarmantachu kanku, nitaj aychaj munayninmantachu, nillataj qharej munayninmantachu; astawanqa Diosmanta.

¹⁴ Chay Palabrataj aychallikorqa. Noqanchej ukhupitaj tiyakorqa. Jatun k'anchayninta rikorqanchej, Tata Diospa uj k'ata Churimpa k'anchayninta jina; payqa junt'a karqa munakuywan, cheqa kaywantaj.

¹⁵ Paymanta Juanqa qhaparispa willarqa: Kaymá chay qhepayta jamojqa. Payqa noqamanta ñaupajmin. Manaraj nacishajtiy karqañapuni.

¹⁶ Paypa jatun qhapaj kayninmanta tukuypis jap'inchej qhasimanta Diospa yanapayninta; chaytaqa ñaupajta qowarqanchejña, kunantaj astawan qowanchej.

¹⁷ Moisesnejta leyqa qosqa karqa; Diospa khuyakuynin cheqawan, Jesucristonejta chayamuwanchej.

¹⁸ Mana pipis Diostaqa jayk'ajpis rikorqachu; uj k'ata churi, Dios Tatawan kajlla paytaqa rejsicherqa.

Juan Bautista willan Jesucristomanta

¹⁹ Kaytaj Juampa willasqan, maypachachus Jerusalenmanta judíos kacharqanku sacerdotesta, levitasta, payta tapoj: Pitaj qan kanki?, nispa.

²⁰ Paytaj sut'ita willarqa: Mana noqachu Cristo kani, nispa.

²¹ Tapullarqankutaj: Pi kankiri? Qanchu Elías kanki? Juantaj nerqa: Mana paychu kani. Nerqankutaj: Jamunan kaj profetachu kanki? Kutichillarqataj: Manapuni, nispa.

²² Chantá nerqanku: Pipunitaj qan kankiri? Niwayku ari, kachamuwarqayku chaykunaman willanaykupaj. Imatataj ninki qanmanta.

²³ Juantaj nerqa: Noqa kani ch'innejpi qhaparej: “Señorpa ñanninta cheqanyachiychej”, nispa, profeta Isaiaspa nisqanman jina.

²⁴ Chaykunataqa fariseos kacharqanku.

²⁵ Tapullarqankutaj, nispa: Sichus mana Cristochu kanki, nitaj Eliaschu, nillataj profetachu chayqa; imaraykutaj bautizankiri?

^26-27 Juan paykunaman kuticherqa: Noqa yakupi bautizani; qankuna ukhupitaj uj runa kashan pitachus mana rejsinkichejchu. Chaymá qhepayta jamojqa. Noqaqa paypa ujut'asnillantapis mana phaskanaypaj jinachu kani.

²⁸ Kay imas karqa Betaniapi, chaytaj Jordán mayu chimpapi; chaypi Juanqa runasta bautizasharqa.

Jesús Diospa Corderon

²⁹ Juantaj q'ayantin, Jesusta payman jamushajta rikuspa, nerqa: Kaymá Diospa Corderon, runaspa juchanta qhechojqa.

³⁰ Paymanta noqaqa nerqani, payqa noqamanta ñaupaj, imaraykuchus manaraj nacishajtiy karqañapuni.

³¹ Noqaqa payta mana rejserqanichu; astawanqa israelitas payta rejsinankupaj jamorqani, runasta yakupi bautizaspa.

³² Juan willallarqataj nispa: Santo Espirituta palomata jina janaj pachamanta uraykamojta rikorqani; chaytaj Jesuspa patannejpi kakorqa.

³³ Noqaqa payta mana rejserqanichu; pichus yakuwan bautizajta kachamuwaj niwarqa: Pejpa patanmanchá Santo Espíritu uraykamuspa kakonqa, chaymá kanqa Santo Espirituwan bautizajqa.

³⁴ Noqataj ajinata rikuni, rejsichinitaj payqa Diospa Churin kasqanta.

Jesuspa ñaupa yachachisqasnin

³⁵ Q'ayantintaj Juanqa chayllapitaj kasharqa, iskay yachachisqasninwan.

³⁶ Juantaj, chaynejpi Jesús purishajtin, payta rikuspa nerqa: Kayqa, Diospa Corderon kaypi kashan.

³⁷ Iskay yachachisqastaj parlajta uyarispa, Jesusta qhatikorqanku.

³⁸ Jesustaj, qhepanta jamushasqankuta rikuspa taporqa: Imata mask'ashankichej?, nispa. Paykunataj kuticherqanku: Maestro, maypi tiyakunki?

³⁹ Jesustaj nerqa: Jamuychej rikunaykichejpaj. Yachachisqastaj rerqanku; rikorqankutaj maypichus Jesús tiyakusqanta. Chay p'unchaypitaj paywan qhepakorqanku, imaraykuchus ch'isiyasharqaña.

⁴⁰ Juampa nisqanta uyarispa Jesuswan rerqanku; chay iskaymanta ujnintaj Andrés karqa, Simón Pedroj wauqen.

⁴¹ Pay ñaupajta wauqen Simonta tarerqa, nerqataj: Mesiasta tariyku. Chaytaj Cristo niyta munan.

⁴² Chaymantá, Jesuspaman Simonta pusarqa. Jesusrí, allinta qhawarispa payman nerqa: Qan kanki Simón, Jonaspa churin; kunanmanta sutiykeqa Cefas kanqa. Chaytaj, Pedro niyta munan.

Jesús wajyan Felipeta Natanaeltawan

⁴³ Q'ayantintaj, Jesusqa Galileaman llojsishaspa, Felipeta tarerqa, nerqataj: Qhatiway.

⁴⁴ Felipeqa Betsaida llajtamanta karqa. Andreswan Pedrowampis chayllamantataj karqanku.

⁴⁵ Felipetaj, Natanaelta taripaspa nerqa: Josejpa churin Jesús nazarenota tariyku. Paymantaqa, Moisés escriberqa leypi, ajinallatataj profetaspis.

⁴⁶ Natanael nerqa: Atinmanchu Nazaretmanta allin imapis llojsimuyta? Felipetaj nerqa: Jamuy ari, rikunki.

⁴⁷ Jesustaj, Natanaelta payman qayllaykushajta rikuspa, nerqa: Kaymá cheqa israelitaqa, paypitaj ni ima llullakuypis kanchu.

⁴⁸ Chantá, Natanael taporqa: Maypitaj noqata rejsiwarqankiri? Jesustaj kuticherqa: Manaraj Felipe wajyashasojtin, higo sach'a urapi kashajtiykiña rikorqayki.

⁴⁹ Chaymantataj Natanael nerqa: Maestro, qanqa Diospa Churin kanki, Israelpa Reynin.

⁵⁰ Jesustaj kutichispa nerqa: Higo sach'a urapi kashajtiyki rikorqayki, nisusqayraykuchu creenki? Aswan jatuchaj imastaraj rikunki.

⁵¹ Jesús nillarqataj: Cheqamanta cheqamanta niykichej: Kunanmanta ñaupajmanqa, janaj pachata kichasqata rikunkichej; Diospa angelesnintataj, Runaj Churinman uraykamushajta, wicharishajtataj.