Josué 8 - Qheshwa Biblia DC

Israelitas Hai llajtata jap'inku

¹ Señorqa Josueman nerqa: Ama manchachikuychu, nitaj iskayrayaychu. Tukuy soldadosniykita pusariykukuspa Hai llajtaman wichariy, noqa Hai llajtaj reyninta, runasnintawan makisniykiman jaywasqayki. Chaymantaqa jallp'asninku, llajtanku imataj qampata kanqa.

² Qanqa Hai llajtata, reynintawan chinkachinki, imaynatachus Jericó llajtata ruwarqanki ajinata. Chaywampis kay kutipeqa qankunapaj kanqa atipachikojkunanta imasninkuchus tiyan chaykuna, uywasninku ima. Ujllata atipanaykichejpajqa sumajta wakichikuychej, llajtaj wasanman soldadosqa lip'iykuspa pakaykukuchunku.

^3-4 Josueqa wakichikorqapacha tukuy soldadosninta pusarikuspa Hai llajtaman wicharinampaj. Ajllarqa kinsa chunka waranqa soldadosta, paykunatataj tutallan kacharqa, kay jinata kamachispa: Allinta uyariychej. Qankunaqa llajtaj wasanman riychej, chaypitaj pakaykukuychej, phinkimunaykichejpaj pachataj wakichisqalla suyaychej.

⁵ Wakin soldadoswantaj llajtaj ñaupajninmanta qayllamusqayku. Maypachachus llajtamanta llojsiykamonqanku noqaykuwan maqanakoj chayqa, noqayku ñaupaqenkuta ayqekusqayku ñaupaj kutipi jina.

⁶ Ajinata llajtamanta ayqekojtiykoqa qhepaykuta qhatiykamuwasqayku, ayqechishawasqaykuta yuyaspa.

⁷ Chaykamataj qankunaqa pakakusqaykichejmanta llojsimuytawan llajtata jap'inkichej, imaraykuchus Señor Diosniykichej makisniykichejman jaywasonqachej.

⁸ Llajtaman phinkikuytawantaj ninawan ruphaykuchiychej Señorpa nisqanman, jina. Kayqa uj kamachiymin.

⁹ Chaymanta Josueqa kacharqa, paykunataj wicharispa pakaykukorqanku Betelwan, Haiwan kashan chay chaupinejpi, Haimanta inti yaykuynejpi; chaykamataj Josueqa jarallankupiraj chay ch'isi qhepakorqa.

¹⁰ Q'ayantintaj Josueqa tutamanta jatarispa soldadosninta watorqa wakisqañachus kashanku manachus chayta, jinaytawantaj soldadosnimpa ñaupaqenta puririn, israelitaspa kurajkunasninwan khuska Hai llajtayojkunawan tinkumunankupaj.

¹¹ Wicharispataj Josueqa tukuy soldadosninwan llajtaj ñaupaqenmanta qayllaykorqanku, jarakorqankutaj Hai llajtamanta patanejpi. Paykuna kasharqanku chay cheqawan, Hai llajtawan tinkuypitaj valle karqa.

¹² Josueqa phishqa waranqa qharista pakaykorqa Betelwan Haiwan kashan chay chaupipi, llajtamanta inti yaykuynejpi.

¹³ Ajinaqa, soldados iskayman t'aqasqas karqanku; uj t'aqaqa pakasqa karqa llajtamanta inti yaykuynejpi, ujtaj jarasqa karqa llajtamanta patanejpi. Chay tuta Josueqa qayllaykorqa khuskan vallekama.

¹⁴ Hai llajtamanta reyqa ajina kasqanta rikuytawan usqhay usqhayta soldadosninwan tutamanta llojserqa Jordán valleman israelitaswan maqanakamoj, mana yachaspa llajta wasapi wakin israelitas pakasqa kashasqankuta.

¹⁵ Josueqa tukuy soldadosninwan ayqej ayqejlla tukorqanku, ch'in pampaman rishan chay ñannejta.

¹⁶ Tukuy Haimanta kaj soldadostaj kamachisqas karqanku israelitasta qhatiykunankupaj. Josueta qhatiykuspataj llajtamanta karunchakorqanku.

¹⁷ Mana uj qharillapis qhepakorqachu Haipi, nitaj Betelpi mana llojsimuspeqa israelitasta qhatiykunankupaj. Tukuyninku israelitasta wañurachimuyta munasqankurayku llajta punkuta kichasqata saqerparerqanku.

¹⁸ Señortaj Josueman nerqa: Makiykipi kashan chay espadata Hai llajta cheqaman oqhariy, noqa chay llajtata makiykiman jaywasqayki nispa. Jinata nejtintaj Josueqa makimpi kasharqa chay espadata oqharerqa Hai llajtaman yaykunankupaj.

¹⁹ Oqharejta rikuytawantaj pakasqa kasharqanku chay soldadosqa llajtaman yaykorqanku, llajtaman yaykuytawantaj ninawan jap'iykucherqankupacha.

²⁰ Haimanta runastaj qhepankuta qhawarimuspa rikorqanku q'osñi manchayta cielokama wicharishajta. Manaña ni mayman ayqeyta aterqankuchu, imaraykuchus ñaupaqenkuta ch'innejman ayqesharqanku chay israelitasqa ujllata kutirimunku paykunawan tinkoj.

²¹ Josuetaj tukuy israelitaswan, chay pakasqa kaj israelitas llajtaman yaykuspa ninawan kanaykusqankuta rikuspa, paykunapis Haimanta kaj soldadoswan maqanakorqanku.

²² Chaymantataj llajtaman yaykojkuna llojsimorqanku. Jinamanta Haimanta kajkunaqa chaupipi rikhurerqanku, israelitastaj purajmanta tukuyninkuta wañuracherqanku mana ujniyojta.

²³ Reyllata mana wañucherqankuchu, kausashajta jap'ispa Josueman apamorqanku.

²⁴ Chaymantaqa Haimanta soldados israelitasta qhatiykorqanku chaykunata tukuyninta espadawan wañuracherqanku, chaymantataj Hai llajtaman kutiykuspa puchojkunata wañuracherqanku.

²⁵ Chay p'unchaypi Haimanta kajkuna chunka iskayniyoj waranqa qharis wañorqanku warmis ima.

²⁶ Josueqa kamachillarqapuni chay llajtayojkunata tukuyninta wañurachinankukama.

²⁷ Israelitasqa jap'ikorqanku uywasta, imaschus llajtapi karqa chaykunata, imaynatachus Señorqa Josueman kamachisqanman jina.

²⁸ Josuetaj Hai llajtata ruphaykucherqa, wiñaypaj laqayapachata saqerparerqa, kunankama jina kashan.

²⁹ Chaymantaqa Hai reyta uj sach'aman warkhuykorqa ch'isiyanankama. Inti yaykuytataj kamacherqa chay ayanta uraykuchinankuta uraykuchispa llajta yaykuyman wijch'umunankuta, patanmantaj rumiswan qontuykunankuta. Chay rumi qontutaj kunankama kashan.

Josueqa uj leyta Ebal orqopi leen

³⁰ Chaymanta Josueqa Israelpa Señor Diosnimpaj Ebal orqopi uj altarta ruwaporqa.

³¹ Chayta ruwarqa, imaynatachus Señorpa kamachin Moisés israelitasman kamachisqanman jina, imaynachus Moisespa ley librompi qelqasqa kashan chayman jinataj. Chanta uj altarta ruwarqanku mana ch'eqosqa rumismanta. Chay altar patapi israelitasqa ruphachinasta Señorman jaywarqanku, chayllapitaj jaywarqanku uj rikuchikuta Señorwan allinyakunankupaj.

³² Chaymantaqa israelitas qhawashajtinku Josueqa chay altar rumisman qelqarqa Moisespa qosqan leyta.

³³ Chaymantaqa tukuy israelitas, Israelmanta mirajkuna, chantá karu llajtayojkuna, kurajkuna, soldadosta kamachejkuna, cheqanchajkuna ima, muyuykorqanku Señorpa trato ruwasqan cajompa ladosninman, sacerdote levitas chay cajonta lijrasninkupi wantusharqanku chaykunaj ñaupaqenkupi. Chay karqa Israel ayllu bendicisqa kanampaj, khuskanqa sayamorqanku Gerizim orqo ladomanta, khuskantaj qhawamusharqanku Ebal orqo ladomanta, unaymantapuni Señorpa kamachin Moisés ajinata kamachisqanman jina.

³⁴ Chaymanta Josueqa leymanta qelqasqa libromanta sapa uj palabrata leerqa, bendicionesmanta, jinallataj maldicionesmantapis.

³⁵ Moisespa kamachisqasninmanta tukuy palabrasta Josueqa tukuy tantasqa israelitasman warmisman, wawasman, chanta karu llajtayojkuna paykunawan tiyakorqanku chaykunamanwan.