Josué 7 - Qheshwa Biblia DC

Acampa juchan

¹ Judáj ayllunmanta ujnintaj Acán sutiyoj, Carmej wawan Zabdej allchhin, Zaraj allchhimpa wawan, wakin imasta pakaykorqa Señorman jaywasqa phirikuman kasharqa chay imasmanta. Chaynejta tukuynin israelitas juchayoj rikhurerqanku Señorpa ñaupaqempi, phirikunan imasta oqharisqankumanta. Chayrayku Diospa phiñakuynenqa paykunaj contrankuta k'ajarerqa.

Uj runaj juchanrayku israelitas atipachikunku

² Josueqa Jericomantapacha runasta kacharqa Hai llajtata qhawamunankupaj; Chay llajtataj kashan Betelpa inti llojsimuynimpi, Bet-aven qayllapi. Paykunaman nerqa imaynatachus chay jallp'asta qhawaramunankuta. Paykunataj rispa sumajta Haita qhawaramorqanku.

³ Kutimuspataj Josueman nerqanku: Hai llajtata atipanapajqa mana tukuy aylluschu rinanchej tiyan, iskay waranqa, chayri kinsa waranqa runaslla rinanku tiyan, paykunaqa pisislla kasqanku, nispa.

⁴ Jinataj kinsa waranqa runas jinalla wicharerqanku Hai llajtata jap'imunankupaj. Haimanta kajkunataj israelitastaqa atipaykorqanku, imata jina ayqecherqanku.

⁵ Chaypacha wañucherqanku kinsa chunka sojtayoj israelitasta. Wakintataj qhatiykorqanku llajta punkumanta canteraskama, wakintataj chay tukuy uraypi mayta waqacherqanku. Chayrayku israelitasqa maytapuni q'ewakorqanku, manaña maqanakuyta munarqankuchu.

⁶ Josuewan, israelitaspa kurajkunasninkuwantaj llakiywan p'achasninkuta llik'ikorqanku, umankumantaj ñut'u jallp'awan jich'akorqanku llakisqa kasqankuta rikuchinankupaj. Chaymantataj qonqoriykukorqanku Señorpa trato ruwasqan cajonnimpa ñaupaqenman, pampaman umankuta chayachinankukama, ch'isiyaykunankamataj.

⁷ Josueqa nerqa: Ay, Señorníy! Imapajtaj kay runasta Jordán mayuta chimpachichimorqanki, amorreosman jaywanawaykupajchu, paykuna tukuchinawaykupajchu? Walej kanman karqa Jordán mayu chimpallapi qhepakunayku.

⁸ Ay, Señorníy! Ima nisajtaj kunanri? Israelitasqa enemigosninkumanta ayqekamunku nisajchu?

⁹ Kunanqa kay imasmanta yachanqanku cananeos, tukuy kaynejpi tiyaj runas ima; ujllaman tantaykukuspataj jamuwasqayku, chinkachiwasqaykutaj mana ujniyojta, mana kanqachu yuyarikunallapajpis. Chantá imataj kanqa chay jatun sutiykimantari?

¹⁰ Señortaj Josueman katicherqa: Sayariy. Sayariy, imatataj qan ruwashanki pampaman umaykita chayachispari?

¹¹ Israelitasqa juchallikunku, paykuna trato ruwasqayta p'akinku. Pakaykunku imaschus phirikunan chaymanta, suwanku, chayqa mana allin ruwana kasqanta yachashaspa, maypichus imasninkupis kashan chayman pakaykunku.

¹² Chayrayku israelitasqa enemigosninkuta mana atipayta atenqankuchu, paykunaqa ayqechimullanqankupuni, imachus ruphachisqa kanan karqa chayta jap'isqankumanta. Manachus usqhayta phirinkichej chayqa, mana noqapis qankunawanñachu kasaj.

¹³ Sayarispa israelitasta tantachimuy, llimphuchachimuytaj. Niy, q'aya ñaupaqeyman chimpamunankupaj wakichikunankuta; imaraykuchus noqa Señor, Israelpa Diosnin ajinata nini: Qankuna israelitas imachus phirikunan kajta mana phirichinkichejchu. Manachus tukuyninta phirinkichej, manatajchus qanmanta jawaman wijch'unki chayqa, manapuni enemigosniykichejta atipayta atinkichejchu.

¹⁴ Q'aya ayllumanta ayllu chimpamunkichej, ima ayllutachá noqa nisaj, chay ayllutaj sapa familiata chimpachenqa. Ima familiatachá noqa nisaj chaytaj sapa uj jarayojta chimpachenqa; ima jaratachá noqa nisaj chaytaj sapa qharita chimpachenqa, sapa ujta sutinmantakama.

¹⁵ Pejpa makimpichá rikhurenqa, imaschus phirisqa kanan karqa chay imas chayqa, chay runa ruphachisqa kanqa tukuy famlianwan, imasninchá tiyapun chaykunasninwan ima, Señorpa trato ruwasqanta p'akisqanrayku Israel ukhupi sajrata ruwasqanraykutaj.

Acanqa jasut'ichikun

¹⁶ Josueqa q'ayaynitin paqarin tutamanta jatarispa sapa ayllumanta ayllu chimpacherqa. Chaypitaj Señorqa Judá aylluta rikucherqa.

¹⁷ Judá aylluta qayllachispataj Josueqa Zeraj familianta ajllarqa; Zeraj ayllunmantataj ajllarqa Zabdej familianta.

¹⁸ Zabdej familianmanta ujmanta uj chimpajtinkutaj, Acán juchayoj rikhurerqa. Payqa karqa Carmej wawan, Zabdej allchhin, Zaraj wawampa allchhin, Judá ayllumanta.

¹⁹ Chaymanta Josueqa Acanman nerqa: Wawáy, Israelpa Señornin Diosta jatunchaspa yupaychay ari. Willaway imatachus ruwasqaykita, ama pakaspa sut'inta.

²⁰ Acantaj payman nerqa: Arí, cheqamanta noqa juchallikuni Israelpa Señornimpa contranta. Kay jinata ruwarqani:

²¹ Jericopi chay tukuy imas ukhupi, uj k'achitu babilonia mantata rikorqani, iskay pachaj qolqeta, khuskan kilo kuraj jina sayt'u p'alta qoritawan. Chaykunata anchata munasqayrayku pakaykorqani, apaspataj jaray uraman p'ampaykorqani, qolqetataj aswan uraman churaykuspa.

²² Josueqa kikimpacha runasta kacharqa Acampa jaranman, paykunataj correspa tarimorqanku imaschus pakasqa kasharqa chayta, qolqetapis aswan ukhupi.

²³ Chay imasta orqhoytawantaj Josueman, israelitasmanwan rikuchimorqanku, chaymantataj Señorman jaywaporqanku.

²⁴ Kikimpachataj Acantaqa Acor valleman pusarqanku, mantata, sayt'u p'alta qorita, qolqe pakasqantawan khuska, chanta qhari wawasnintawan, warmi wawasnintawan, wakasnintawan, burrosnintawan, ovejasnintawan, jarantawan, imasninchá tiyaporqa chaytawan khuska.

²⁵ Chaypitaj Josueqa taporqa: Ima nispataj qanqa kay tukuy llakiykunastaqa apamuwaykuri? Kunanqa qampa pataykimanñataj urmachimuchun Señor kay tukuy llakiykunasta. Chayta nisqantawan tukuynin israelitas Acantaqa rumiwan ch'anqaspa wañorparicherqanku, tukuy imasnintawan khuska; jinaytawantaj ninawan ruphaykucherqanku.

²⁶ Chaymantataj patanman ashkha rumiswan qontuykorqanku, chay rumi qontoqa kunankama kashan. Chayrayku chay cheqataqa Acor valle nispallapuni sutichashanku. Ajinamanta Israelpa contrampi Señorpa k'ajaj phiñakuynenqa thasnukorqa.