Josué 6 - Qheshwa Biblia DC

Jericoman yaykunankupaj wakichikunku

¹ Chaypacha mana pipis Jericoman yaykuyta aterqachu, imaraykuchus llajta punkustaqa sumajta wisq'amusqanku israelitasmanta jark'akunankupaj. Chayrayku ni pipis yaykojchu, nitaj llojsejchu.

² Señortaj Josueman nerqa: Noqa makiykiman jaywayki Jericó llajtata, reyninta, soldadosnintawan.

³ Jericó llajtata tukuy Israel soldados uj kutita diapi muyuyninta muyurinkichej. Kaytaqa ruwankichej sojta p'unchayta.

⁴ Qanchis sacerdotes renqanku, Señorpa trato ruwasqan cajompa ñaupaqenta, sapa ujninkutaj renqanku carnerospa wajrasninmanta pututusniyoj. Qanchis kaj p'unchaypitaj qanchis kutita llajtata muyurinkichej, sacerdotestaj chaykama pututusninkuta tocanqanku.

⁵ Carnero wajrasta waqajta uyariytawan, tukuy kallpawan qhapariychej, llajtaj perqasnintaj ujllata pampaman urmanqanku. Chaymantataj sapa ujniykichej llajtaman phinkikuychej, nispa.

⁶ Josuetaj sacerdotesta wajyaspa nerqa: Señorpa trato ruwasqan cajonta apaychej, chaypa ñaupaqentataj qanchis sacerdotes richunku carnero wajrasmanta pututusniyoj.

⁷ Chaymantaqa israelitasmanñataj nerqa: Rispa Jericó llajtata muyumuychej. Tukuy maqanakunankupaj wakichisqas kajkuna, Señorpa trato ruwasqan cajompa ñaupaqenta richunku, nispa.

⁸ Josué ajinata kamachejtinkama, qanchis sacerdotes pututusninkuta waqarichispa, Señorpa trato ruwasqan cajompa ñaupaqenta purirerqankupacha, qhepankutataj Señorpa cajonnin rerqa.

⁹ Maqanakupaj wakichisqa qharistaj pututusniyoj sacerdotespa ñaupaqenta rerqanku, wakin soldadostaj Señorpa cajonnimpa qhepanta rerqanku, chaykamataj sacerdotesqa pututusninkuta mana ch'inyayta waqacherqanku.

¹⁰ Soldadosmantaj Josueqa kamacherqa mana ch'ajwaspa ch'inllamanta rinankuta, mayk'ajchus qhapariychej nejtillan sinch'ita qhaparinankuta.

Jericó llajtata jap'inku

¹¹ Josueqa Señorpa trato ruwasqan leyniyoj cajonta, Jericó llajtaj muyuyninta ujta muyurinanta diapi. Chaymantaqa jarankuman kutimporqanku, chay ch'isitaj chaypi puñorqanku.

¹² Q'ayantin paqarenqa Josué tutamanta jatarerqa, sacerdotespis Señorpa trato ruwasqan cajonta oqharikorqankupacha.

¹³ Señorpa cajonnimpa ñaupaqentataj qanchis sacerdotes rerqanku mana sayarispa, carnerospa wajrasninmanta pututusninkuta waqarichispa. Maqanakupaj sumaj wakichisqa runastaj risharqanku wakin ñaupajta, wakintaj Señorpa trato ruwasqan cajonnimpa qhepanta. Chaykamataj pututustaqa mana samarispa waqachillarqankupuni.

¹⁴ Q'ayantin kikinta muyurimullarqankutaj Jericó llajtaj muyuyninta, chaymantataj jarasninkuman kutimporqanku. Chay jinata sojta p'unchayta kikillantapuni ruwarqanku.

¹⁵ Qanchis kaj p'unchaynimpitaj tutamanta jatariytawan, kikillantataj llajtaj muyuyninta muyurimorqanku ñaupaj kutispi jina. Chay p'unchaypeqa qanchis kutita muyurimorqanku.

¹⁶ Qanchis kuti sacerdotes pututusninkuta waqachejtinku, chaypacha Josueqa israelitasman nerqa: Qhapariychej! Señormin llajtataqa makisniykichejman jaywasunkichej.

¹⁷ Llajta, chaypi imaschá tiyan chaykunasnintin phirikonqa, tukuynintaj Señorman rikuchiku jina jaywasqa kanqa. Chay mana allin puriyniyoj warmi Rahabpa kausaynillanta perdonankichej, pininchus wasimpi pakakojkunatawan, imaraykuchus payqa kachamorqanchej chay wateqajkunata wasimpi pakaykorqa.

¹⁸ Qankunaqa llajtapi imaschus kashan chaykunata, ama pakankichejchu, ni llujchirillankichejpischu, chay tukuy imasqa chinkachisqas kananku tiyan, Señorman rikuchiku jina jaywasqa, manachus jinata ruwankichej chayqa, Israel jaraman maldicionta apamunkichej, mana allin kaylla pejtu kanqa.

¹⁹ Chantaqa, qori, qolqe, imaschus broncemanta kajkuna, fierromantawan imasqa, Señorman qosqa kanqa. Chaykunaqa maypichus qolqes churakun chayman yaykonqa, nispa.

²⁰ Runasqa jatunmanta qhaparerqanku, sacerdotespis pututusninkuta waqacherqanku, Israelitastaj chay pututus waqamusqanta uyariytawan, kunkankoj atisqanta qhapariyta qallarerqanku. Llajtaj kancha perqasnintaj pampaman loqhekorqanku. Chaymantataj llajta cheqanta phinkiykorqankupacha, chanta jap'irarqankutaj.

²¹ Chaymantaqa espadawan wañuracherqanku qharista, warmista, waynasta, machu runasta, chaymantá wakasta, ovejasta, burrosta ima. Tukuy ima kajta phirerqanku.

²² Josuetaj pichus ñaupajta chay jallp'ata qhawaj rerqanku chaykunaman nerqa: Kunanqa riychej mana allin puriyniyoj Rahabpa wasinman, orqhomuychejtaj, payta, pininchus wasimpi kashan chaykunatawan, imatachus payman nisqaykichejman jina.

²³ Paykunataj rispa orqhomorqanku Rahabta, tatanta, mamanta, turasninta, pi ayllusninchus paywan kasharqanku chaykunatawan; pusarqankutaj allin waqaychasqata, israelitaspa jarasninkumanta jawaman.

²⁴ Chaypachetaj israelitasqa chay llajtata ruphaykucherqanku, tukuy chaypi kaj imastawan. Kay imasllata orqhomorqanku: Qolqeta, qorita, imaschá broncemanta, fierromanta ima kajtawan, chaytataj Señorpaj qolqe jallch'anaman churarqanku.

²⁵ Josueqa Rahabpa kausayninta, tukuy ayllumpatawan perdonarqa, imaraykuchus pay pakaykusqa Jericota wateqajkunata Josué kacharqa chaykunata. Chaymantapacha Rahabpa miraynenqa israelitas ukhupi kausanku.

²⁶ Chaypacha Josueqa uj juramentota ruwarqa: Maldicisqa kanqa Señorpa ñaupaqempi, pichus watejmanta Jericó llajtata sayarichiyta munajqa. Pichus sayarichiyta munajqa kuraj wawampa patampi sayarichichun, punkustataj sullk'a wawampa patampi, nispa.

²⁷ Josuetaqa Señor maytapuni yanaparqa. Josué may mentasqa kasqantataj tukuy chay jallp'api uyarerqanku.