Josué 5 - Qheshwa Biblia DC

Gilgalpi israelitas jarakunku

¹ Tukuynin amorreospa reyesninku Jordanmanta inti yaykuynejpi kasharqanku. Cananeospa tukuy reyesninkutaj mar qocha qayllapi kasharqanku; paykuna yacharqanku Señorqa imaynatachus Jordán mayu yakuta ch'akichisqanta israelitas chayninta chimpanankukama, maytataj mancharikorqanku, mana munarqankuchu israelitaswan maqanakuyta.

² Chaypi Señorqa Josueman nillarqataj: Rumimanta cuchillosta ruwakuy, israelitasta watejmanta circuncidanaykipaj.

³ Josuetaj Señorta kasuspa cuchillosta ruwarakorqa, chaywantaj israelitasta circuncidarqa Aralot orqopi.

⁴ Josué chayta ruwarqa, imaraykuchus tukuy qharis Egiptomanta llojsimorqanku chaykuna wañurarqankuña chay ch'in pampaspi.

⁵ Chaywampis Egiptomanta llojsimojkunaqa tukuyninku circuncidasqa karqanku. Chaymantaqa chay purisqankupi nacejkunaqa mana circuncidasqachu karqanku.

⁶ Chaykama israelitasqa tawa chunka watasta purisqanku ch'in pampaspi. Chaykunaspi wañupusqanku Egiptomanta llojsimoj tukuynin israelitas soldado mitayoj llojsimojkuna. Chay qharisqa Señorta mana kasusqankuchu, chayrayku Señorqa juraspa nerqa paykunaman, lechewan misk'iwan correshaj jallp'ata tatasninkuman qonanta nerqa, chayman ama chayanankuta.

⁷ Chayrayku Josueqa chay wañoj runaspa wawasninta circuncidarqa, niyta munan paykunata churasqa tatasninkoj cuentanmanta. Paykunaqa manaraj circuncidasqaschu karqanku ñan puriypi kasqankurayku.

⁸ Maypachachus tukuyninku circuncidachikuytawantaj jarasninkupi qhepakorqanku thañinankukama.

⁹ Chaymanta Señorqa Josueman nerqa: Kay circuncisión ruwakusqanwanqa egipciospa p'enqakuyninta qhechuykichej, nispa. Chayrayku chay cheqaqa kunankama Gilgal nisqa sutiyoj.

¹⁰ Israelitasqa Gilgalpi jarakorqanku; chay killapi chunka tawayoj p'unchay ch'isiyaytataj, Pascua mikhuyta mikhorqanku Jericó pampaspi.

¹¹ Chay kikin p'unchayllapitaj mana levadurayoj t'antata mikhorqanku; q'ayantintaj chay jallp'api poqojtaña mikhorqanku.

¹² Chaymantapacha Maná nisqa t'antaqa manaña karqachu. Israelitasqa, chay Canaán jallp'api poqojllataña chay watapi mikhorqanku.

Josué parlan Señorpa soldadosninta kamachejwan

¹³ Uj p'unchay, Josué Jericó qayllapi kashaspa ñaupaqempi rikorqa uj runata makimpi espadayojta. Josuetaj qayllaykuspa taporqa: Qanqa noqaykojmantachu kanki, chayrí enemigosniykojmantachu?, nispa.

¹⁴ Chay espadayojtaj nerqa: Ni mayqenmanta; noqaqa jamuni Señorpa soldadosinta kamachejnin jina. Chaymanta Josueqa pampaman umanta chayachinankama k'umuykukorqa, taporqataj: Imatataj kunan Señorniy kamachishan kamachinmanri?, nispa.

¹⁵ Señorpa soldadosninta kamachejtaj nerqa: Zapatosniykita chakisniykimanta lluch'ukuy, maypichus kashanki chayqa llimphumin. Josuetaj kasuspa kikinta ruwarqa.