Josué 4 - Qheshwa Biblia DC

Chunka iskayniyoj mayu rumista oqharerqanku

¹ Chaymanta tukuyña Jordán mayuta chimpajtinku Señorqa Josueman nerqa:

² Chunka iskayniyoj qharista israelitasmanta ajllay, sapa ayllumanta ujta.

³ Niytaj chunka iskayniyoj rumista oqharinankuta Jordán mayumanta, maypichá sacerdotespa chakisnin sayashanku chaymanta apaspataj, kunan ch'isi maypichá jarakunkichej chayman churankichej, nispa.

^4-5 Chaymanta Josueqa chay chunka iskayniyoj ajllasqan runasta wajyaspa, nerqa: Yaykuychej mayu chaupikama, maypichá Señor Diosniykichejpa cajón kashan chaynejkama. Chaymanta sapa ujniykichej uj rumitakama lijrariykukuspa apamuychej, sapa uj Israel ayllupaj uj rumitakama, ajinamanta tukuynimpi chunka iskayniyoj rumis kanampaj.

⁶ Chaykuna qhepaman uj señal kanampaj, mayk'ajchus wawasniykichej tapusojtiykichej: Ima niytataj munan kay rumisri?, nispa.

⁷ Chaypacha qankuna ninkichej: Mayk'ajchus Señorpa trato ruwasqan cajón Jordán mayuta chimpamorqa. Yakutaj chay cajompa ñaupaqempi iskayman p'itikorqa. Kay tauqasqa rumisqa kashan kaypi imachus kasqanta yuyarikunankupajpuni.

⁸ Israelitasqa kikinta ruwarqanku Josuejpa kamachisqanman jina. Mayumanta chunka iskayniyoj rumista oqharerqanku Jordán mayumanta, ujtakama sapa uj Israel aylluman jina. Chayta aparqanku jarankukama; chaypitaj chay rumista churarqanku imaynatachus Señorqa Josueman kamachisqanman jina.

⁹ Josuepis chunka iskayniyoj rumista oqharispa tauqallarqataj Jordán mayupi, maynejpichus sacerdotes sayarqanku Señorpa trato ruwasqan cajón oqharisqa chaypi. Chay rumisqa kunankama chaypi kashallanrajpuni.

¹⁰ Señorpa trato ruwasqan cajonta apaj sacerdotes Jordán mayu chaupipi sayarqanku, israelitas imatachus Josueman Señorpa kamachisqanta ruwayta tukunankukama. Tukuy ima ruwakorqa Moisés imaynatachus Josueman kamachisqanman jina. Israelitastaj usqhay usqhayta mayuta chimparqanku.

¹¹ Tukuy chimpapiña kajtinkutaj, Señorpa cajonninwan sayasharqanku chay sacerdotespis chimpaman chimpallarqankutaj, tukuy Israel aylluspa ñaupaqenman churakorqanku.

¹² Chaymanta paykunawan khuska chimpallarqankutaj maqanakunankupaj sumaj wakichisqas Rubempa ayllunmanta, Gadmanta, Manasespa khuskan ayllun ima. Paykuna israelitaspa ñaupaqenkuta rerqanku Moisespa kamachisqanman jina.

¹³ Yaqha tawa chunka waranqa kuraj qharis karqanku, tinkunankupaj sumaj wakichisqas. Chantaqa sinrulla Señorpa ñaupaqenta rerqanku Jericó pampakama.

¹⁴ Chay p'unchaypitaj Señorqa israelitasman rikucherqa Josueqa may sumaj runa kasqanta, jinamanta allin runapaj qhawanankupaj, imaynatachus Moisestapis kausashajtin allimpaj qhawarqanku, ajinata.

¹⁵ Chaymanta Señorqa Josueman nerqa:

¹⁶ Señorpa trato ruwasqan cajonta apashajkuna sacerdotesta kamachiy Jordán mayumanta llojsimunankuta, nispa.

¹⁷ Josuetaj sacerdotesta kamacherqa Jordanmanta llojsimunankuta.

¹⁸ Sacerdotes Jordanmanta llojsimusqankutawan, ch'aki jallp'aman chakisninkuta churaykusqankutawankama, yakoqa maychus rinanta ririkaporqa ñaupajta jina, cantosninman phullchirishaj.

¹⁹ Israelitasqa Jordán mayuta chimpaspa llojserqanku ñaupaj killaj chunka p'unchaynimpi, rispataj Gilgalpi jarakorqanku, Jericój inti llojsimuyninnejpi.

²⁰ Chay Gilgalpi Josueqa tauqarqa Jordán mayumanta apamusqanku chunka iskayniyoj rumista.

^21-23 Israelitasmantaj nerqa: Kunanmanta qhepaman wawasniykichej tapusonqachej kay imasmanta: Ima niytataj munan kay rumisri?, nispa chayqa, paykunaman willankichej imaynatachus kay Jordán mayuta ch'akipi Israel llajta chimpamusqanta, imaynatachus Señorqa Jordán mayu yakuta ch'akichisqanta chayninta chimpanaykichejkama; jinallatataj Puka Mar qochatapis ch'akichisqanta chayninta chimpananchejta, chayta.

²⁴ Ajinapi kay mundopi tukuy llajtas yachanqanku Señorqa may jina atiyniyoj kasqanta; qankunapis Señor Diosniykichejtaqa manchachikuychejpuni.