Josué 23 - Qheshwa Biblia DC

Josueqa israelitasman parlan

^1-2 Israelitasman Señorqa sonqo tiyakuyta unay watastaña qosqanmanta, Josueqa machuña kashaspa, unay watasniyojñataj kashaspa, payqa israelitasta tantachimorqa, kurajkunasnintinta, kurajkunapaj churasqas karqanku chaykunata, juecesta, kamachinankupaj churasqas karqanku chaykunantinta, nerqataj: Noqaqa machu runaña kani, unay watasniyojñataj.

³ Qankuna rikorqankichej Señor Diosniykichejqa qankunarayku kay waj nacionesta imaynatachus ruwasqanta. Imaraykuchus Señor Diosniykichej qankunarayku maqanakorqa.

⁴ Noqaqa chayaqeykichej jallp'ata suerteta choqaspa ayllusniykichejman qoporqani. Noqaqa mana qhechusqaña kaj jallp'asllatachu qorqaykichej, manachayqa, manaraj qhechusqa kajkunatawan qorqaykichej, Jordán mayoj inti llojsimuyninmanta, mar Mediterráneo qochej inti chinkaykuyninkama.

⁵ Señor Diosniykichej chay jallp'aspi tiyakojkunata wijch'ullanqa, qankuna qhawashajtiykichej, qankunataj chay jallp'asta jap'ikunkichej, imaynatachus Señor Diosniykichej nerqa chayman jina.

⁶ Kallpachakuychej ari, junt'aychejtaj imatachá Moisespa escribisqan libropi nishan chayta, ni uj chhikanta saqerispa.

⁷ Ajinamanta chaupiykichejpi waj runas tiyashankuraj chaykunawan amapuni chajrukunaykichejpaj, dioskunasninkuta ama yupaychanaykichejpaj, ama kasunaykichejpaj, ni chaykunamanta parlarillankichejpischu, nitaj qonqorikunkichejchu, nitaj chaykunaj sutimpi jurankichejchu.

⁸ Señor Diosniykichejtapuni qhatikunkichej, imaynatachus kunankama ruwashankichej ajinata.

⁹ Señormin ñaupaqeykichejmanta wijch'un chay chhikachaj kallpasapa nacionesta. Qankuna rikushankichej kunankamaqa ni pipis ñaupaqeykichejpi kutichikuyta atinchu.

¹⁰ Qankunaqa ujnillaykichej ayqechiwajchej waranqa runasta, imaraykuchus Señormin qankunaj allinniykichejpi maqanakushan, imaynachus pay kikin nisqanman jina.

¹¹ Chayrayku qankuna kikiykichejta allinta qhawakuychej, Señor Diosniykichejtataj munakuychejpuni.

^12-13 Sichus qankuna ukhupi qhepakunkuraj chay runaswan chajrukunkichej, chaykunawantaj casarankichej, paykunawan ujllaman tukuspa, paykunapis qankunawan chayqa, yachanaykichejpaj Señor Diosniykichejqa qankunawan kashan chay runasta mana qharqonqachu, manachayqa paykunata churanqa waskhata jina chaypi layk'ukuspa urmanaykichejpaj, chicoteta jina wasasniykichejpi jasut'isunaykichejpaj, khishkata jina ñawisniykichejpi t'ojsisunaykichejpaj ima, kay chhika sumaj jallp'ata Señor Diosniykichej qosusqaykichejmanta mana ujniyoj chinkanaykichejkama.

¹⁴ Noqaqa wañuy patapiña kani, amaraj wañupushaspataj yachanaykichejta munani tukuy sonqo, tukuy alma ima allin imastachus Señorqa nerqa qonasuykichejta, chaykuna junt'akusqanta. Ni ima palabrasnimpis qhepakunchu mana junt'akuspaqa.

^15-16 Kunanqa imaynatachus Señor Diosniykichejpa k'acha palabrasninta uyarerqankichej, ajinallatataj Señorqa tukuy ima mana allin kajta qankunaman apachimusonqachej mana ujniyoj tukukunaykichejkama, kay sumaj jallp'ata pay qosorqachej, chaypi, sichus Señorpa trato ruwasqanta p'akinkichej chayqa. Sichus qankuna waj dioskunata yupaychankichej, chaykunaj ñaupaqempitaj qonqorikunkichej chayqa, Señor qankunapaj phiñakonqa, manaraj imapitaj kay jallp'a patamanta chinkachisqas kankichejchu kay chhika sumaj jallp'ata Señorniykichej qosorqachej chaymanta.