Josué 21 - Qheshwa Biblia DC

Levitaspa llajtasnin

¹ Levitaspa kurajkunasninku rerqanku sacerdote Eleazarman, Numpa wawan Josueman, israelitaspa tatasninku kurajkunasninman ima.

² Canaampi siloman chayaspataj parlayta qallarerqanku: Señorqa kamacherqa Moisesnejta llajtasta tiyakunaykupaj qonawaykuta, chay cantosnimpitaj uywasniykuta michikunaykupaj qonawaykuta, chay cantosnimpitaj uywasniykuta michikunaykupaj, nispa.

³ Chaymanta israelitasqa wakin chayaqe llajtasninkuta qorqanku, muyuyninta ima Señorpa kamachisqanman jina.

⁴ Ñaupajtaqa suerteta choqaspa qorqanku Coatpa miraynin levitasmanraj. Chaykunaqa karqanku Aarompa miraynin, jap'erqankutaj chunka kinsayoj llajtasta, chay llajtastaj karqa Judá ayllupi, Simeompapi, Benjamimpapi ima.

⁵ Coatpa wakin wawasninmantaj suertepi chunka llajtas chayarqa, chaykuna karqa Efraín ayllupi, Dan ayllupi, Manasespa khuskan ayllupi ima.

⁶ Chaymantaqa Gersompa miraynin levitasmanñataj sorteopi qollarqankutaj chunka kinsayoj llajtasta. Chaykuna karqanku Isacar ayllupi, Aserpapi, Neftalejpi, Manasespa khuskan ayllumpapi ima, chaytaj kashan Basampi.

⁷ Merarej miraynin levitasmantaj sorteopi chayarqa chunka iskayniyoj llajtas, chaykunataj karqa Rubén ayllupi, Gadpapi, Zabulompapi ima.

⁸ Ajinata israelitasqa levitasman llajtasta qorqanku, jinallataj chay cantospi uywasninkuta michikunankupaj, imaynatachus Moisesnejta Señorpa kamachisqanman jina.

⁹ Kay qosqanku llajtasqa karqa Judá ayllojta, Simeompa ayllumpata ima.

¹⁰ Chaykuna chayarqa Coatpa miraynin levitasman, paykuna karqanku Aarompa mirayninmanta, imaraykuchus paykunamanraj suerteqa chayarqa.

¹¹ Judá orqopi Anac tatampa llajtanta Quiriat-arba nisqa llajtata qorqanku, chay llajtaj uj sutenqa Hebrón, chay cantospi uywasninkuta michikunankupajwan qosqa karqa.

¹² Chay llajtaj aswan cantosninta, ranchosninta imaqa Jefonej wawan Calebman jap'ikunampaj qoporqanku.

^13-16 Runata wañuchejkunaj pakakunanku Hebrón llajtata muyuynintinta sacerdote Aarompa mirayninman qorqanku; chanta waj llajtastapis kikillantataj muyuynintinta qorqanku: Libnata, Jatirta, Estemeata, Holonta, Debirta, Ainta, Jutata, Bet-semesta, ima. Chay isq'on llajtasmantaqa sapa ujpata tiyaporqa jallp'asninku michinankupaj.

^17-19 Benjamín aylloj jallp'an ukhupi qorqanku Gabaonta, Gebata, Anatotta, Almonta ima. Chay tawa llajtasta qorqanku chay muyuynimpi uywasninkuta michikunankupaj ima. Ajinamanta sacerdote Aarompa miraynimpaj llajtasqa tukuynimpi chunka kinsayoj llajtas karqanku, sapa ujnin cantosnimpi uywa michinasniyoj.

^20-26 Ujkuna levitasmanta ayllus Coatpa mirayninmanta Efraín aylloj ukhupiñataj llajtasta qorqanku. Efraín orqopi Siquem nisqa llajtata muyuynintinta, pichus runata wañuchejkunaj pakakunanku kajta qorqanku. Chaymantaqa qollarqankutaj Kibsaimta, Bet-horonta ima. Chay tawa llajtasta cantosnimpi uywa michinasniyojta qorqanku. Dan ayllumanta jap'erqanku Eltequeta, Gibetonta, Ajalonta, Gat-rimonta ima. Chay tawa llajtasta qorqanku cantosnimpi uywa michinasniyojta. Manasespa khuskan ayllunmantataj qorqanku: Taanacta, Gat-remonta, chaykunapis karqanku cantosnimpi uywa michinasniyoj. Coatpa miraynimpaj llajtasqa, cantosnimpi uywa michinasniyoj tukuynimpi chunka karqanku.

^27-33 Gersompa miraynin levitasman iskay llajtasta qorqanku. Chaykunataj Manasespa khuskan ayllun ukhupi karqa cantosnimpi uywa michinasniyoj: Golán, chayqa Basán jallp'api kashan, chantapis chayqa karqa pakakuna llajta, chanta Beesterata ima. Isacar ayllu ukhupitaj qorqanku Cisonta, Deberatta, Jarmutta, En-ganimta ima. Ajinaqa chay llajtas karqanku tawa, cantosnimpi uywa michinasniyoj. Aser ayllu ukhupitaj qorqanku Misaelta, Abdonta, Helcatta, Rehotta ima. Ajinaqa tawa llajtas karqanku cantosnimpi uywa michinasniyoj. Neftalejpa jallp'an ukhupi kinsa llajtasta cantosnimpi uywa michinasniyojta: Cedesta chayqa kashan Galileapi pakakuna llajta, Hamot-dorta, Cartanta ima. Ajinamanta Gersompa miraynimpa llajtasnenqa tukuynimpi karqanku chunka kinsayoj, sapa ujnintaj cantosnimpi uywa michinayojkama.

^34-40 Merarej miraynin levitas puchorqankuraj chaykunaman qorqanku Zabulompa ayllumpa jallp'an ukhupi: Jocneamta, Cartata, Dimnata, Naalalta ima. Chay llajtasqa cantosnimpi uywa michinasniyojkama tawa karqanku. Rubén aylloj jallp'an ukhupi qorqanku Beserta, Jahazata, Cademotta, Mefaatta ima. Chaykuna karqanku tawa llajtas cantosnimpi uywa michinayojkama. Gad aylloj jallp'an ukhupi qorqanku Ramotta, chayqa kashan Galaadpi pakakuna llajta, Mahanaimta, Hesbonta, Jazerta ima. Chay llajtasqa tawantin uywa michinayojkama karqanku. Ajinata Merarej miraynin levitas qhepakorqankuraj chaykunaqa tukuynimpi chunka iskayniyoj llajtasta jap'erqanku.

⁴¹ Israelitaspa jallp'an ukhupi levitaspa llajtasnenqa tukuynimpi tawa chunka pusajniyoj karqanku, sapa ujninta cantosnimpi uywa michinasniyoj.

⁴² Chaykunaqa karqanku llajtaj muyuynimpi. Kay llajtasqa sapan sapallan karqanku. Sapa ujnintaj cantosnimpi uywa michinasniyoj karqanku.

Señorqa imatachus nisqanta junt'ampuni

⁴³ Ajinata Señorqa tukuynin israelitasman jallp'ata qoporqa imaynatachus tatasninkuman juraspa qosqaykichej nisqanman jina, paykunataj mojonakuytawan chaypi tiyakorqanku.

⁴⁴ Señorqa chay jallp'api allin tiyakuyta qorqa, imastachus juraspa tatasninkuman nisqanman jina. Enemigosninkupis mana ujtawan torearqankuñachu, imaraykuchus Señorman makisninkuman enemigosninkuta churarqa.

⁴⁵ Señorpa palabrasnenqa ni ujpis qhepakorqachu mana junt'akuspaqa, israelitasman Señorpa nisqasninmantaqa.