Josué 20 - Qheshwa Biblia DC

Josué t'aqan pakakuna llajtasta

^1-2 Señorqa Josueman nerqa: Israelitasman parlay, niytaj pakakuna llajtasta ajllachunku, imaynatachus Moisesnejta kamachisqayman jina.

³ Sichus pipis mana yuyasqallamanta runata wañuchiman chayqa, chay llajtaman pakakoj ayqekuchun chay wañusqaj aswan qaylla kaj ayllun ama wañuchinampaj. Ajinamanta chay llajtapi pakakunaykichejpaj.

⁴ Pillapis ayqenqa pakakoj mayqen llajtallamampis chayqa, chay llajtaj punkunman chayaspa willanqa chay llajtapi kaj kurajkunaman. Paykunataj kachaykonqanku, qonqankutaj maynejpichus tiyakunanta.

⁵ Sichus chay wañusqaj aswan qaylla kaj ayllun chay runata chay llajtakama qhatiykun chayqa, chay llajta kurajkunaqa chay pakakoj runata mana jaywanqankuchu, imaraykuchus chay runataqa mana wañuchiytapuni munaspachu wañucherqa, nitaj ñaupajta enemigon kajtin chejnikuspachu.

⁶ Chay ayqekoj runataj chay pakakuna llajtapi kanqa allinta cheqanchanakama, amaraj runaspa ñaupaqenman llojsimushaspa, kuraj kaj sacerdote mit'ampi chaypacha kashaj wañupunankama. Chaymanta chay pakakojqa atin ripuyta maymantachus ayqekamorqa chayman, wasinman, llajtanman.

⁷ Chaymanta israelitasqa pakakuna llajtasta ajllarqanku Sedes llajtata Galileapi, Neftaléj orqompi, Efraín orqopi Siquem nisqata, Quiriat-arba llajtata, ujnin sutintaj Hebrón, Judá orqopi ima.

⁸ Jordán mayu chimpapi, Jericó llajtaj inti llojsimuynimpi ch'innejpi kaj Beser llajtata ajllarqanku, Rubén aylloj jallp'an ukhupi. Galaadpi Ramot llajtata ajllarqanku, Gadpa ayllumpa jallp'ampi. Basán jallp'api ajllarqanku Golanta, Manasés ayllu ukhupi.

⁹ Kaykuna karqanku pakakunapaj ajllasqa llajtasqa israelitaspaj, jinallataj chaypi paykunawan tiyakoj karu llajtayojkunapajpis. Chaypi pakakunanku karqa pikunachus mana wañuchiytapuni munaspa wañuchejkuna; ajinamanta wañojpa ayllusnin ama wañuchinankupaj, manaraj runaspa ñaupaqempi cheqanchasqa kashajtin.