Josué 2 - Qheshwa Biblia DC

Josueqa wateqajkunata Jericoman kachan

¹ Numpa wawan Josueqa Sitinmantapacha iskay wateqajkunata pakayllamanta kacharqa, paykunamantaj nerqa: Riychej, qhawamuychej jallp'ata, Jericó llajtatawan, nispa. Paykunataj rispa, Jericó llajtapi uj khuchi warmej wasinman chayakorqanku, chay ch'isitaj chaypi qhepakorqanku; chay warmej sutenqa karqa Rahab nisqa.

² Jericó llajtaj reyninmantaj pichus willarqamusqanku: Uj iskay israelitas kunan ch'isi jamunku jallp'anchejta wateqaspa qhawaraj, nispa.

³ Chaymanta reyqa kachaspa Rahabman nichimorqa: Orqhomuy qanta watukoj jamusunku chay runasta, paykuna wasiykipi kashanku, imaraykuchus chaykunaqa wateqajkuna kanku.

⁴ Chay warmitaj pakaykuspa nerqa: Arí, iskay runas chayakamuwarqanku, chaywampis mana yachanichu maymantachus kankupis.

⁵ Laqhayaykushajtinña ripunku, llajta punku wisq'akunampaj kashajtin. Mana yachanichu maymanchus rinkupis. Chaywampis sichus qankuna usqhayta llojsispa qhatiriwajchej chayqa, taripamuwajchejraj.

⁶ Chaypaj payqa chay runasta techo pataman wicharichisqa, chaypitaj pakaykusqa lino marq'as ukhupi, chaykunataj ch'akinampaj churasqas karqanku.

⁷ Reypa runasnintaj chay runasta qhatiykorqanku Jordán mayu cheqannejta, maynejpichus yaku ch'ajchalla karqa chaykama. Soldados llojsisqankutawantaj llajta punkoqa wisq'akorqapacha.

⁸ Manaraj chay wateqajkuna puñushajtinku Rahabqa techo pataman wicharerqa, paykunamantaj nerqa:

⁹ Noqa yachani, Señorqa qankunaman kay jallp'ata qosqasuykichejta, pay nerqa noqayku qankunata sinch'ita manchachikunaykuta. Tukuy kaypi tiyakojkunaqa qankunarayku manchachikuywan wañusqas jinaña kayku.

¹⁰ Noqayku yacharqayku, mayk'ajchus Egiptomanta llojsimushajtiykichej. Diosqa Puka mar qochata iskayman khallaspa chay cheqata ch'akicherqa chayninta qankuna pasamunaykichejpaj. Yachallaykutaj qankuna atipasqaykichejta amorreospa iskayin reyesninkuta Sehonta, Ogtawan. Paykuna karqanku Jordán mayu chimpapi.

¹¹ Chayta yachaspa noqaykoqa maytapuni mancharikorqayku. Chayrayku mana pipis atinmanchu qankunawan maqanakuytaqa. Imaraykuchus Señorqa Diosniykichej, pay kikin janaj pachapi kashan, jinallataj kay pachapipis.

¹² Chayrayku kunan mañaykichej kunampacha kay kikimpi juranawaykichejta Diosrayku, aylluymanta khuyakunaykichejpaj, imaynatachus noqapis qankunata khuyakuykichej ajinata. Chaypajtaj qowaychej ari uj señata allin sonqoyoj kasqaykichejta yachanaypaj.

¹³ Jinamanta ama wañuchipuwaychejchu ari tatayta, mamayta, turasniyta, ñañasniyta, imasniykuchá tiyan chaytawan, wañuymanta salvawayku ari.

¹⁴ Paykunataj kuticherqanku: Kausayniykuta qosqayku qankunaj kausayniykichejta salvanaykupaj, qantaj amapuni pimampis willaychu kay jamusqaykumanta. Maypachachus Señor kay jallp'ata qowasqayku chayqa, noqayku yachasqayku qanta allinta qhawayta, tukuy khuyakuyniykuwan.

¹⁵ Rahabqa tiyakorqa llajta kanchachasqa perqa patapi, chaypipuni paypa wasin karqa ventananta kachaykuspataj uj waskhapi paykunata uraykuchimorqa.

¹⁶ Chaymantataj paykunaman nerqa: Kaymantaqa ripuychej orqoman, mask'asojkuna ama taripasunaykichejpaj. Chaypi pakakuychej kinsa p'unchayta, paykuna llajtaman kutimunankukama, chaymanta qankunaqa ñanniykichejta ripullankichej.

¹⁷ Paykunataj warmiman nerqanku: Noqaykoqa qanman juramentota ruwasqaykuta junt'asqaykupuni.

¹⁸ Maypachachus kay llajtaman chayamusqayku chayqa, kay puka wasqhata ventanaykimanta warkhuykamunki, imapichus noqayku uraykamusqaykuta. Wasiykimantaj tantaykamunki tataykita, mamaykita, turasniykita, chantá tataykej tukuy ayllusnintawan.

¹⁹ Mayqellampis wasiykimanta llojsejqa, pay kikin juchayoj kanqa wañunampaj, noqaykoqa mana juchayojchu kasqayku wañunampaj. Pillapis llujchiykunman wasiykipi qanwan kashajtin chayqa, noqaykuña chaymanta juchayoj kasqayku.

²⁰ Sichus pimampis kay imasta willanki chayqa, manaña ima ruwanaykuchu kanqa chay juramentota qanwan ruwasqaykumantaqa.

²¹ Paytaj kuticherqa: Chay nisqaykichejqa ajinapuni kachun. Chaymantataj kacharpayarqa, paykunataj riporqanku. Chaymanta warmeqa puka waskhata ventananman warkhuykorqa.

²² Wateqaspa jamojkunataj orqoman riporqanku, chaypitaj kinsa p'unchayta pakakorqanku. Chaykamataj soldadosqa tukuynejta mask'aykorqanku. Mana maypipis tarispataj kutiporqanku Jericó llajtaman.

²³ Chaymantataj chay iskay runasqa orqomanta uraykamuspa mayuta chimparqanku, kutiporqankutaj maypichus Josué kasharqa chayman, paymantaj willarqanku imaynatachus purimusqankuta.

²⁴ Nerqanku: Señorqa chay tukuynin jallp'asta makisninchejmanña churan. Tukuy chaypi tiyakojkunaqa may mancharisqas kashanku.