Josué 19 - Qheshwa Biblia DC

Simeón aylloj jallp'an

^1-6 Iskay kaj sorteopeqa Simeón ayllumanñataj chayarqa mashkhachus kasqankuman jina. Chay jallp'aqa tarikorqa Judá aylloj chaupimpi. Chay jallp'api tarikorqa: Beerseba, Seba, Molada, Hazar-sual, Bala, Ezem, Eltolad, Betul, Horma, Siclag, Bet-marcabot, Hazar-susa, Bet-lebaot, Saruhén ima. Chay tukuynin llajtas ranchosnin ima chunka kinsayoj karqa.

^7-8 Chantapis paykunallamantaj chayarqa Aín, Rimón, Eter, Asán ima. Chay llajtasqa ranchosnintin tawa karqa. Chanta chay llajtaspa muyuynimpi kaj ranchosnintin karqa, Baalat-beerkama, chaytaj Ramat llajta Neguevpi. Kay jallp'asmin Simeompa ayllunmanqa chayarqa, mashkhachus kasqankuman jina.

⁹ Simeón aylloj jallp'anqa karqa Judáj jallp'an chaupipi, imaraykuchus Judá ayllojtaqa jatun jallp'anqa karqa. Chaynejta Simeón aylloqa chaypi jallp'ata jap'erqa.

Zabulón aylloj jallp'an

^10-16 Kinsa kaj sorteopeqa chayarqa jallp'aqa Zabulompa ayllunmanñataj mashkhachus kasqankuman jina. Chay jallp'aj mojonnenqa karqa Saridkama. Chaymanta mojonnenqa rillarqapuni inti yaykuynejman Maralakama, chaymantataj Debesetkama, chaytaj tukukorqa Jocneampa chimpampi wayq'opi. Saridmanta chay mojonnenqa inti llojsimuynejman rerqa Quislot-taborkama, chaymanta rerqa Daberatman, chaymantataj wicharerqa Jafiaman. Chaymanta inti llojsimuynejman rerqa Gat-heferman, chaymanta Ita-casinman. Chaymantaqa llojserqa Rimonman Neaj muyuyninta. Patanejta mojonqa muyuykamorqa Hanatonkama, chaymantataj Jefte-el valleman llojserqa. Chay jallp'apeqa chunka iskayniyoj llajtas ranchosnintin karqa, chaypitaj karqa Catat, Naalal, Simrón, Idala, Belén ima. Kaymin karqa Zabulón aylloj chayaqe jallp'anqa llajtasnintin ranchosnintin mashkhachus kasqankuman jina.

Isacar aylloj jallp'an

^17-23 Tawa kaj suerteqa chayarqa Isacar aylluman mashkhachus kasqankuman jina. Chay jallp'antaj karqa Jezreel, Quesulot, Sunén, Hafaraim, Sihón, Anaharat, Rabit, Quisión, Abez, Remet, En-ganim, En-hada, Bet-pases ima. Chay jallp'aj mojonnenqa chayarqa Taborman, Sahaziman, Bet-semesman ima, tukukorqataj Jordán mayupi. Tukuynimpi chunka sojtayoj llajtas ranchosnintin karqa. Kaymin chay jallp'aqa karqa Isacarpa ayllunman chayasqanqa, llajtasnintin ranchosnintin.

Aser aylloj jallp'an

^24-31 Phishqa kaj suerteqa chayarqa Aser ayllumanñataj mashkhachus kasqankuman jina. Chaypa jallp'antaj karqa Helcat, Halí, Betén, Acsaf, Alamelec, Amad, Miseal; ajinaqa inti yaykuynejman chayarqa Carmelo orqokama, Sihor-libnatanwan. Chaymantaqa inti llojsimuynejta muyuykamorqa Bet-dagonman, chayarqataj Zabulompaman, patanejpi Jeft-el valleman, chantá Bet-emecman, Neielman, patanejmantaj Cabulman llojserqa. Chaymantaqa Hebronmanta kallarqataj, Rehobman, Hamonman, Canaman ima, Sidón jatun llajtaman chayanankama. Chaymanta mojonnenqa Ramaman muyuykamorqa, Tiropi sumaj jark'achisqa llajtakama, chaymantataj Josaman rerqa, chaymantataj mar Merditerraneoman llojserqa. Chaymantaqa karqa Mahaleb, Aczib Umamanta, Afecmanta, Rehobmanta. Tukuynimpi karqanku iskay chunka iskayniyoj llajtas, muyuynimpi kaj ranchosnintin. Kay jallp'amin karqa Aser aylloj jallp'anqa.

Neftalí aylloj jallp'an

^32-39 Sojta kaj suerteqa chayarqa Neftalí ayllumanñata mashkhachus kasqankuman jina. Chaykunaj jallp'ankoqa karqa Helefmantapacha, Alon-saananimanta, Adami-necebmanta, Jabneelmanta Lacumkama, Jordanman chayanankama. Inti chinkaykuynejmantataj muyuykamorqa Aznot-tabornejta, Hucocnejta; uranejtataj muyuykamorqa Zabulompa jallp'anwan tinkuynejta. Inti chinkaykuymantaj chay mojonqa karqa Aser aylloj mojonninkama. Inti llojsimuymantaj Neftalíj mojonnenqa Jordán mayukama chayarqa. Sumaj jark'achisqa llajtastaj chayarqa: Sidón, Ser, Hamat, Racat, Cineret, Adama, Rama, Hazor, Cedes, Edrei, En-hazor, Irón, Migdal-el Horem, Bet-anat, Bet-semes ima. Tukuynimpi chay llajtasqa muyuynimpi ranchosnintin chunka isq'onniyoj llajtas karqa. Kaymin karqa Neftalí aylloj jallp'anqa mashkhachus kasqankuman jina llajtasnintin ranchosnintin.

Dan aylloj jallp'an

^40-48 Qanchis kaj suerteqa Dan ayllumanñataj chayarqa mashkhachus kasqankuman jina. Chay jallp'api tarikorqa Zora, Estaol, Ir-semes, Saalabín, Alajón, Jetla, Elón Timnat, Ecrón, Elteque, Gibetón, Baalat, Jehud, Bene-berac, Gat-rimón, Mejarcón, Racón ima, Jope chimpapi. Chay jallp'a mana tukuyninkupaj jinachu kajtintaj, Dan aylloqa Lesem nisqa llajtawan maqanakamorqa, atipaspataj chay llajtata jap'ikaporqanku, chay llajtapi kajkunata wañurachispa. Ajinamanta paykunaqa chay jallp'api tiyakorqanku, jinaspataj chay llajtaj sutinta wajta suticharqanku ñaupa achachinku Dampa sutinwan. Kaymin karqa Dan aylloj jallp'anqa mashkhachus kasqankuman jina llajtasnintin ranchosnintin.

Josuéj jallp'an

⁴⁹ Tukuy israelita ayllusman chayaqe jallp'asninkuta rak'irasqankumantataj, kurajkuna israelitasqa Josuemanñataj jallp'anta qoporqanku chay wakin ayllusnimpa chaupimpi.

⁵⁰ Señorpa kamachisqanman jina Josuemanqa Timnat-sera nisqa llajtata qoporqanku Efraimpa sach'arara orqompi, Josué chayta mañakusqanman jina. Josuetaj chay llajtata watejmanta ruwaspa, chaypi tiyakorqa.

⁵¹ Tukuy kay jallp'asta sacerdote Eleazar, Josué, israelitaspa kurajkunasnin ima sapa ayllusman chayaqe jallp'asninkuta qoraporqanku suerteta choqaspa Señorpa ñaupaqempi, Dioswan tinkukuna toldoman yaykunapi. Ajinata jallp'a rak'iyta tukorqanku.