Josué 16 - Qheshwa Biblia DC

Joséj iskaynin wawasnimpa jallp'asnin

¹ Joséj wawasninman sorteopi chayarqa chay jallp'aqa karqa Jericó Jordanmanta, inti llojsimuypi Jordán yakusmanta, ch'in pampanejman Betel wichayninta Jericomanta llojsin chaynejmanta.

² Betelmanta llojserqa Luz nisqakama, chaymanta arquitaspa jallp'annejta Atarotman rerqa;

³ chaymantataj rerqa inti chinkaykuyman jaflititaspa jallp'an ukhunejta, Bet-horompa uranej jallp'anwan mojon tinkuyninkama, Gezerkama, chaymantaqa mar qochakama.

⁴ Joséj wawasnin Manaseswan, Efrainwanqa ajinata jallp'asta chayaqenkupaj jap'ikorqanku.

⁵ Efraimpa jallp'anqa mashkhachus kasqankuman jina kay jina karqa: Inti llojsimuynejmanta Atarot-adarmanta pata Bet-horonkama karqa.

⁶ Chaymanta rillarqataj Mediterráneo mar qochakama, chanta Micmetatkama wichaynejman, chaymantaqa muyuykamorqa inti llojsimuyninta Taanat-silokama, chaymantataj Janoanta ima.

⁷ Janoamantaqa uraykorqa Atarotman, Naaratmanwan, chaymanta Jericoman, chaymantataj Jordán mayuman llojserqa.

⁸ Tapuamanta mojonqa rillarqapuni inti chinkaykuynejman Caná mayukama, chaymantataj Mediterráneo mar qochaman llojserqa. Ajina karqa Efraimpa ayllumpa chayaqe jallp'an, mashkhachus kasqankuman jina.

⁹ Chanta Efraimpa ayllumpaj kallarqataj llajtas, ranchos ima Manasespa chayaqe jallp'asninku ukhuspi.

¹⁰ Chaywampis Efraimpa ayllunmanta kajkunaqa, Geserpi tiyakoj cananeosta mana qharqorqankuchu, saqellarqanku paykunawan khuska tiyajta kanankama, chaywampis nerqanku impuestota paganankuta.