Josué 14 - Qheshwa Biblia DC

Josué Canaán jallp'ata rak'in

¹ Kaymin karqa, israelitaspa Canaampi chayaqe jallp'a jap'isqankoqa. Chaytataj rak'erqanku sacerdote Eleazar, Numpa wawan Josué, israelitaspa kurajkunasninkuwan.

² Chay jallp'astaqa rak'inakorqanku sorteopi isq'on ayllus, chanta Manasespa khuskan ayllun ima, imaynatachus Señorqa Moisesman kamachisqanman jina.

³ Imaraykuchus Moisesqa manaraj Jordán mayuta chimpashaspaña qopusqaña chayaqenku jallp'asta iskay ayllusman Manasespa khuskan ayllunmanwan. Chanta levitasmanqa manapuni jallp'ata qorqachu.

⁴ Joséj wawasnimpa mirayninmanta kajkunaqa iskay ayllus karqanku, Manasesmanta, Efrainmantawan. Levitasmantaj mana uj chhikan jallp'allapis chayarqachu, paykunaqa llajtasllapi tiyakunanku karqa, chay llajtas cantospitaj jatun uywasninkuta, juch'uy uywasninkuta ima michikunanku karqa.

⁵ Ajinaqa, imaynatachus Moisesman Señorpa kamachisqanman jina, israelitasqa jallp'ata rak'inakorqanku.

Calebpa jallp'an

⁶ Judáj ayllunmanta kajkuna Gilgalman rerqanku Josuewan parlaj; chayaspataj cenezeo Jefonej wawan Calebqa Josueman nerqa: Qan yachanki allinta imatachus Señorqa kamachin Moisesman nisqanta Cades-barneapi qanmanta noqamantawan.

⁷ Noqaqa tawa chunka watasniyoj kasharqani, maypachachus Moisés Cades-barneamanta jallp'ata qhawamojta kachawarqa chaypacha, kutimuspataj noqaqa maychus kajta imatachus rikusqayta cheqanta willarqani.

⁸ Noqawan rejkuna wauqesniy israelitas runaspa sonqonkuta iskayrayacherqanku. Noqarí imatachus Señor Diosniy nisqanta junt'arqani.

⁹ Chaypacha Moisesqa juraspa niwarqa may jallp'amanchá saruykunki chay wiñaypaj chayaqe jallp'ayki kanqa, Señor Diosniypa nisqasninta junt'asqaykirayku.

¹⁰ Tawa chunka phishqayoj watastaña kausachiwan, mayk'ajchus Moisesman kay imasmanta parlasharqa chaymanta kaykama, israelitaspis ch'in pampapi purisharqanku chaypacha. Kunanqa pusaj chunka phishqayoj watayojña kani.

¹¹ Kunampis kallpayojraj kani, mayk'ajchus Moisés jallp'ata qhawajta kachawarqa, chaypacha jina. Kunampis atiniraj rispa maqanakamuyta ñaupajta maqanakoj kani ajinata.

¹² Chayrayku kunanqa qoway ari may orqotachus Señor qonawanta nerqa chayta. Chaymantapacha qanqa yachanki chaynejpi anaquitas tiyasqankuta, jatuchaj llajtas sumaj jark'achisqastaj kasqanta. Chaywampis noqaqa yuyani Señor yanapanawanta chay llajtasta chinkachiyta, imaynatachus Señorqa yanapanawanta nisqanman jina.

¹³ Chaymanta Josueqa Jefonej wawan Calebta bendicerqa; chaymantataj chayaqempaj Hebrón jallp'ata qoporqa.

¹⁴ Ajinamanta Hebrón jallp'aqa Calebpa jallp'anman tukorqa kunan p'unchaykama, imaraykuchus Israelpa Señor Diosninta kasorqa.

¹⁵ Hebrompa sutenqa ñaupajta karqa, Quiriat-arba, imaraykuchus uj anazeo Arba nisqa runa may mentasqa karqa. Chaymanta qhepamanqa chay jallp'aspi manaña ima ch'ajwaspis karqachu.