Josué 1 - Qheshwa Biblia DC

Dios wajyan Josueta

^1-2 Señorpa kamachin Moisés wañupusqanmantaña, Señorqa Numpa wawan Moisespa yanapajnin Josueman parlarqa, kay jinata: Moisés kamacheyqa wañupunña. Kunanqa qanñataj sayariy. Jordán mayuta chimpay tukuynin israelitasta pusariykukuspa, maypichus noqa qankunaman jallp'ata qosqaykichej chayman rinaykichejpaj.

³ Imaynatachus Moisesman nisqayman jina, noga qosqaykichej, maymanchá chakisniykichej saruykonqa chay tukuy jallp'asta.

⁴ Chay jallp'astaj kanqa ch'innejmantapacha Líbano orqokama, Eufrates jatun mayumantapacha Mediterráneo mar qochakama. Chantá tukuynin heteospa jallp'asnintin qankunajta kanqa.

⁵ Tukuy kausayniykipi mana pipis atipasonqachu. Noqa qanwan kasaj, imaynatachus Moiseswan karqani ajinata, manataj ni jayk'ajpis sapaykita saqesqaykichu.

⁶ Sumajta kallpachakuy, waputaj kay. Qanmanmin chayasunki kay aylluman jallp'ata rak'inaykeqa. Kay jallp'ataqa tatasninkuman nerqani chayaqenkupaj kanampaj qonayta.

⁷ Chaypajqa sumaj kallpachasqa wapu kanayki tiyan, kamachiy Moisés tukuy leyta kamachisusqanman jina ruwanaykipaj. Chaytaqa junt'aypuni ari, ama ni uj chhikanta karunchakuspa imatachus nisqanta kikinta ruwaspa, tukuy ima ruwasqaykipi allin risunampaj.

⁸ Kay libropi Diospa leyninmanta kajtaqa willaypuni imatachus nisqanta. Tuta p'unchay unanchakuy kay libropi imatachus nisqanta ruwanaykipaj, ajinamanta tukuy ima ruwasqaykipi allin risunampaj.

⁹ Noqa kayta kamachiyki, sumaj kallpasapa wapu kay. Ama manchachikuychu, amataj q'ewakuychu. Noqa Señorniyki, Diosniykeqa qanwampuni kasaj, maymanchá rinki chaypi.

Josué wakichikun jallp'ata jap'imunankupaj

¹⁰ Chaymanta Josueqa kamachiykunasta israelitaspa kurajkunasninman qon, jinata nispa:

¹¹ Tukuynin jaraman rispa kamachimuychej qoqawista wakichikunankuta, kaymanta kinsa p'unchayman Jordán mayuta chimpasunchej, Señorninchej Dios qowasunchej chay jallp'ata, nispa.

¹² Chantá Josueqa nillarqataj Rubempa ayllunman, Gadpa ayllunman, Manasespa khuskan ayllunmanwan:

¹³ Yuyarikuychej Señorpa kamachin Moisés imatachus nisorqachej chayta. Chaypacha nisorqachej: Señor, qankunaj Diosniykichej, qankunaman kay jallp'ata qosunkichej chaypi tiyakunaykichejpaj.

¹⁴ Chayrayku saqeychej warmisniykichejta, wawasniykichejta, uywasniykichejtapis; Moisés qosorqachej chay jallp'api manaraj Jordán mayuta chimpashaspa. Tukuynin qharistaj maqanakupaj jina kajkuna, maqanakunasniykichejta oqharikuspa wauqesniykichejpa ñaupaqenta riychej, ajinamanta yanapanaykichejpaj.

¹⁵ Paykunamampis Señorqa jallp'ata qonankama qankunaman jina chaypi tiyakunankupaj; paykunapis Señorniykichej Diospa jallp'a qosqanmanta dueño kanankupaj. Chaymanta qankunaqa atinkichej kutimpuyta jallp'asniykichejta jap'ikapoj, mayqentachus Diospa kamachin Moisés qosorqachej, manaraj Jordán mayu chimpapi inti llojsimuynejpi.

¹⁶ Chaymanta paykuna kuticherqanku: Tukuy qampa nisqaykita ruwasqayku, risqaykutaj maymanchá qan kachawasqayku chayman.

¹⁷ Qantaqa kasusqaykupuni, ñaupajta imaynatachus Moisesta kasorqayku ajinata. Noqaykoqa munayku Señor Diosniyki qanwampuni kananta, imaynatachus Moiseswan karqa ajinata.

¹⁸ Pillapis kamachisqaykita jark'ajqa, chayri imatachus kamachisqaykita mana kasukojqa, wañuchun. Noqaykoqa munayku qan sumaj kallpachasqa wapu kanallaykita.