Jonás 4 - Qheshwa Biblia DC

Jonaspa phiñakuynin

¹ Chay jinata Diospa ruwasqantaj Jonasmanqa mana allinchu rijch'arqa, maytataj phiñarikorqa.

² Señormantaj kay jinata nerqa: Qhawariy Señor, kaytamá nerqayki jallp'aypi kashaspallaraj. Chayrayku ayqesharqani Tarsisman. Yachani ari, khuyakoj sonqo nanachikoj Dios kasqaykita, mana chhika usqhayta phiñakoj kasqaykita, chhika jatun khuyakuyniyoj kasqaykita, jasut'ej rishaspa mana jasut'isqaykita chay jina millay sajrata ruwasqankumanta.

³ Chayrayku kunanqa, Señor, mañakuyki, wañuchinawaykita, allin kanman wañupunay kausanaymantaqa.

⁴ Señortaj payman kutichispa nerqa: Ajinata phiñakuspaqa yuyankichu allinta ruwashasqaykita?, nispa.

⁵ Chaymanta Jonasqa llajta ukhumanta llojserqa inti llojsimuynejman. Chaynejpitaj q'epinoqakuspa uj llanthuchata ruwaspa chay uraman tiyaykukorqa llajtata qhawaspa, suyaspataj llajta imanakonqachus chayta.

⁶ Señortaj wakichiporqa mathi yurata, chaytaj chay uman pata llanthuchanman ch'ipaykukuspa wiñaykorqa Jonaspa umanta llanthunampaj, jinamanta phiñakuynin tiyaykunampaj. Jonastaj mayta kusikorqa uman pata llanthuchapi wiñaykusqanmanta.

⁷ Q'ayantin paqarimuytataj Señorqa chay mathi yurata khuruwan mikhuykucherqa, ch'akirpayaporqataj chay matheqa.

⁸ Inti llojsimuytataj Diosqa uj sinch'i q'oñi wayrata inti llojsimuynejmanta wayrachimorqa. Chay intitaj Jonaspa umantaqa sinch'ita k'ajaykorqa, jinamanta llauch'iyarparerqa, wañuytataj munarqa. Allin kanman wañunay kausanamanta nisqaqa, nispa.

⁹ Chaymantataj Dios nerqa Jonasman: Chay jinatapunichu phiñakunki mathi yura ch'akirpayajtin?, nispa. Jonastaj kuticherqa: Arí, rabiawan wañushaniña, nispa.

¹⁰ Diostaj kuticherqa: Mathi yurata, qanqa mana tarporqankichu, nitaj wiñacherqankichu. Uj tutalla p'utuytawan wiñarqa, q'ayantin tutataj ch'akiporqa. Chayllamantaraj qanqa llakikushanki.

¹¹ Noqarí manachu astawanraj khuyakunay karqa Ninivemanta, mayqen llajtapichus tiyakunku pachaj iskay chunka waranqa kurajniyoj runas, wawas ima mana juchasniyoj, ashkha uywas ima, chaymanta?