Jonás 3 - Qheshwa Biblia DC

Nínive llajta Señorman kutirin

^1-2 Watejmanta Señorqa Jonasman parlapayarqa, kay jinata: Sayarikuy, riytaj jaqay jatun Nínive llajtaman, chaypitaj willamuy imatachus noqa nisqayki chayta.

³ Jonastaj sayariytawan Niniveman purirerqa Señorpa kamachisqanman jina. Niniveqa jatun llajta karqa, uj cantonmanta uj cantonkamaqa kinsa p'unchay chaki puriy jina karqa.

⁴ Jonasqa llajtaman yaykorqa uj p'unchay puriyta jatunmanta willaspa: Kaymanta tawa chunka p'unchayman Nínive llajtaqa phirisqa kanqa, nispa.

⁵ Chay llajtapi tiyajkunataj Diospi creerqanku, qhaparikorqankutaj ayunota ruwaspa, llakiy p'achastataj churakorqanku jatunmanta juch'uykama.

⁶ Chay willaykunataj Nínivej reyninman chayarqa. Paytaj kamachinanmanta sayarispa, p'achasninta lluch'ukuspa, llakiy p'achasta churaykukuytawan ushpha patapi tiyamorqa.

⁷ Chaymanta reyqa, yanapajkunasnin kurajkunawan tukuy chay llajtaman rejsicherqanku uj kamachiyta, kay jinata: Mana pipis mikhunanchu tiyan, nitaj uywaspis: Ovejas, wakaspis. Chaykunamampis ama qarankichejchu, nitaj yakuta ujyachinkichejchu.

⁸ Manachayqa llakiy p'achasta churakuychej, jinallataj uywastapis qhataychej, tukuyniykichej sinch'ita Diosmanta mañakuychej; sapa ujtaj saqeychej sajra kausayniykichejta, suwakuyta makisniykichejwan ruwasharqankichej chayta.

⁹ Ichapis Diosninchej jinamanta juchasninchejta pampachanman, k'ajaj phiñakuynintaj tiyaykunaman, jinamanta mana wañusunchu, nispa.

¹⁰ Diosqa ajinata ruwasqankuta rikusqa, sajra ruwayninkuta saqespa allin ñanman kutirikusqankuta. Chayrayku Diosqa manaña ruwarqachu imatachus ruwayta munasqantaqa.