Jonás 1 - Qheshwa Biblia DC

Jonás ayqekun Diosmanta

^1-2 Señorqa Amitaejpa wawan Jonasman nerqa: Riy, wakichikuspa puririy Nínive jatun llajtaman, willamuytaj phirita ruwanayta chay llajtata, imaraykuchus kaykama chayamuwan tukuy sajra ruwasqasninku.

³ Jonastaj kasunantaqa, Señorpa ñaupaqenmanta ayqeyta munarqa, jinataj Jonasqa mar qocha cantopi Jopeman ayqerqa. Chaypitaj uj buqueta Tarsisman puririshajtaña taripasqa. Usqhayta pasajeta rantikuspataj wichariytawan riporqa.

⁴ Chaymantataj, Señorqa uj sinch'i para wayrata phukuchimorqa, qocha chaupitaña rishajtinku maytapuni para wayraqa yakuta qhollchoqeyachispa, buquetapis q'opata jina apaykacharqa, phirinampaj jina.

⁵ Buqueta purichejkunataj mancharikuytawan sapa ujninku dioskunasninkumanta qhaparikorqanku. Chantá buque chhallayanampaj ama yakuman p'ultikunampaj cargasta yakuman wijch'uykorqanku. Chaykamataj Jonasqa buquej ukhun k'uchunman yaykuykusqa, chaypitaj misk'ejta puñurparerqa.

⁶ Buquepi kamachejtaj jamuytawan Jonasman qayllaykuspa nerqa: Imanayasunkitaj puñuysiki? Sayariy, Diosniykiman qhaparikuy, ichapis pay khuyakuwasunman ama wañunanchejpaj.

⁷ Chaykamataj buqueta purichejkunaqa ninakorqanku: Jamuychej, suerteta choqana, ajinamanta yachananchejpaj, pichus juchayoj kasqanta kay jinatapuni llakiy jamunawanchejpaj. Jinataj suerteta choqarqanku, chaypitaj Jonaspaj suerteqa urmarqa.

⁸ Chaymantataj Jonasta taporqanku: Kunanqa sut'inta niwayku, imaraykuchus kay llakiy jamuwasqanchejta. Imapajtaj purishanki? Maymantá jamorqankiri? Maytaj llajtaykiri? Ima ayllumantataj kankiri?, nispa.

⁹ Jonastaj kutichikusqa: Hebreo kani, Señorta, janaj pacha Diosta yupaychani, mar qochata, kay jallp'atapis ruwajta.

¹⁰ Buqueta purichejkunataj chayta uyarispa, maytapuni mancharikorqanku, nerqankutaj: Imaraykutaj qan jinata ruwankiri?, nispa. Imaraykuchus paykuna yacharanku Jonasqa Señormanta ayqeshasqanta, chaytari payllataj siminwan willakorqa.

¹¹ Paykunataj nerqanku: Kunanqa qanta imanasqaykutaj, mar qocha tiyaykunampajri?, nispa. Chaykamataj mar qochaqa astawan astawan oqharikusharqa.

¹² Jonastaj paykunaman nerqa: Mar qochaman wijch'uykuwaychej, para wayrataj thañiponqapacha. Yachani juchayoj kasqayta, chaynejta qankunaman jamusunkichej kay sinch'i para wayraqa.

¹³ Buqueta purichejkunataj manchay kallpawan ñaupajman buqueta tanqarqanku jallp'aman chayachinankupaj, manataj aterqankuchu, imaraykuchus mar qochaqa astawan astawan oqharikusharqa, paykunata chinkachinampaj jina.

¹⁴ Chaymantaqa Diosmanta mañakorqanku: Señor, ama saqewaykuchu wañojtaqa ari kay runaj juchanraykoqa. Sichus pay mana juchayoj chayqa, ama juchachawaykuchu wañojtenqa ari; imaraykuchus qanqa, Señor, imatapis munasqaykiman jina ruwanki.

¹⁵ Chaymantataj, Jonastaqa jap'iytawan mar qochaman wijch'uykorqanku, yakutaj chay jinata oqharikushaspa tiyaykorqapacha.

¹⁶ Chayta rikuspataj buqueta purichejkunaqa Señorta maytapuni manchachikorqanku. Chayrayku rikuchikusta jaywarqanku, tratotapis ruwarqanku.

¹⁷ Chaykamataj Señorqa uj jatun challwata wakicherqa Jonasta oqoykunampaj. Jinamanta Jonasqa chay challwaj wijsampi kinsa p'unchayta, kinsa tutatawan karqa.