Joel 2 - Qheshwa Biblia DC

¹ Sión orqopi putututa waqachiychej. Señorpata kaj llimphu orqompi sinch'ita putututa waqarichiychej. Judá llajtapi tiyakoj runas tukuyniykichej kharkatitiychej. Imaraykuchus, Señorpa p'unchaynenqa qayllapiña kashan.

² Chay p'unchayqa tuta, laqhataj. Phuyusqa p'unchay, llanthusqataj kanqa. May atiyniyoj, yupay mana atinataj orqos pataman mast'alla junt'aykamunku, sut'iyayta jina k'ancharispa. Chayman rijch'akojqa mana jayk'ajpis karqachu, nitaj jayk'ajpis kanqañachu.

Langostas jamunku

³ Nina jinamin kanku, tukuy imata ruphaykunku. manaraj pasashaspa nina q'olaykunku. Pasaykusqankumantapis q'olashallankupuni. Jallp'aqa, manaraj chay p'unchay chayamushajtenqa, Edén huerto jina karqa. Pasasqanmantawantaj ch'in pampaman rijch'akun. Paykunamantaqa mana imapis ayqekunchu!

⁴ Caballosman rijch'akunku, caballopi purej jinataj juñanku.

⁵ Orqosman phinkiramushajtintaj, ch'ajwaynenqa guerrapaj wakichisqa carrospa ch'ajwaynin jina. Imaynatachus ch'akisqa sach'a laphis nina larwaypi ch'ajwarin ajinata. Uj jatun atiyniyoj ejército jinapuni kanku. Maqanakunapaj wakichisqa runas jinapunitaj.

⁶ Chayta rikuspa runas kharkatitinku. Tukuypa uyasninkutaj q'elluman tukunku.

⁷ Maqanakupi kallpanta mana pisichikoj runas jina juñanku. Perqasta wasaykunku. Cheqantataj rinku, nitaj mayqenninkupis ñanninmanta pantaspa.

⁸ Ujkuna ujkunaman mana ñit'inakunkuchu. Sapa ujpis ñannillanta rin. Wach'ina flecha chaupisman yaykuspataj, mana p'itinakunkuchu sinrulla kasqankuta.

⁹ Llajtaman yaykuykunku. Perqa patasta juñanku. Wasista wasaykunku. Wasi ventananta suwas jina yaykuranku.

¹⁰ Jallp'a kharkatitin paykunaj ñaupaqempi. Janaj pachapis kuyurin. Intipis, jinallataj killapis laqhayaykunku. Qoyllurkunataj manaña k'anchankuchu.

¹¹ Señorqa ejercitompa ñaupaqempi kashan. Jatun qhapariynintataj uyarichin. Soldadosnenqa may ashkhapuni kanku. Kamachisqasninta junt'ajkunataj mana yupay atinas kanku. May jatun, manchachikunataj Señorpa p'unchaynenqa! Mana kanchu pipis ñaupaqempi sayarejqa.

Tukuy Atiyniyoj Señorpa khuyakuynin

¹² Kunanqa Señor nin: Noqaman tukuy sonqo kutirimuychej. Ayunota ruwaychej, qhaparikuychej, waqaychejtaj!

¹³ Qankuna, Señor Diosniykichejman kutirikampuychej! P'achasta llik'inaykichejtaqa, sonqoykichejta llik'iychej! Imaraykuchus, Señorqa sonqonta wawayachikojmin, khuyakojtaj. May pacienciayoj, tukuy munakuyniyojtaj Payqa. Jasut'isuyta yuyasqanta saqepuytapuni munan.

¹⁴ Ichapis yuyaychakunman qankunata mana jasut'iyta, aswantataj bendicionninta apachimusunkichejman. Ajinamanta poqoj granosmanta, vinomantataj ofrendasta Tukuy Atiyniyoj Diosniykichejman jaywanaykichejpaj.

¹⁵ Sión orqopi putututa waqachiychej! Runasta tantarqamuychej. Ayuno kananmanta paykunaman willaraychej.

¹⁶ Diospa runasninta tantaykuychej, paykunata llimphuchaychejtaj. Unay watayoj runasta, wawasta, ñuñukushaj wawasta ima tantachiychej. Kunallan casarakojkunapis llojsimuchunku casarakuna wasimanta!

¹⁷ Sacerdotes, Señorta sirvejkunapis waqachunku. Templo punkuman altar qayllanejpi nichunku: Kay llajtapi kaj tukuy runaspa juchasninta pampachay, Señor. Ama saqeychu, qampata kajkunamanta pipis burlata ruwakunanta. Ama saqeychu waj llajtayoj runas llajtaykipi kamachinankuta. Amataj saqeychu Diospi mana creejkuna ninankuta: Maypitaj kashan paykunaj Diosninrí?

^18-19 Chaypacha Señorqa ayllunman rikucherqa munakuyninta. Jallp'ampi kaj runasninta khuyakuspataj, nerqa: Apachimusqaykichej trigota, vinota, aceiteta ima, sajsasqas kanaykichejkama, manataj ujtawan saqesajchu mana creejkuna qankunamanta burlata ruwakunankuta.

²⁰ Wichaymanta jamoj langostastaqa karunchachisaj qankunamanta. Ch'in pampamantaj qharqosaj. Ñaupajpi kajkunata Wañusqa Qochapi jeq'eqachisaj, qhepapi kajkunatataj Mediterráneo nisqa qochapi. Cuerposninkutaj ismuykonqa, asnaykonqataj. Jatuchej imasta ruwasaj!, nin Señorqa.

²¹ Mayta kusikuy jallp'a, amataj manchachikuychu, imaraykuchus Señorman jatun imasta ruwanqa.

²² Campospi kaj animalespis, ama manchachikuychejchu, imaraykuchus watejmanta pastosqa q'omeryanqaña. Sach'aspis poqonqanku. Kallanqataj ashkha higos, jinataj uvaspis atipasonqachej.

²³ Sión orqopi tiyakojkuna, mayta kusikuychej! Kusikuychej Tukuy Atiyniyoj Señor Diosniykichejpi. Paymin parachimusunkichej maychus kaj tiempompi. Parachimusonqachejtaj chiri tiempopi, jinallataj q'oñi tiempopipis, Imaynachus ñaupa tiempopi kaj ajinata.

²⁴ Trigo oqharinataj may sumaj kanqa. Vinotaj may ashkha kanqa, jinallataj aceitepis.

²⁵ Señorqa nin: Noqa kutichipusqaykichej pasaj wataspi pierderqankichej chaypa cuentanmanta. Chaypachaqa noqa kachamorqaykichej langostastaqa uj ejercitota jina, chajrasniykichejta t'unaykunampaj.

²⁶ Sumajta sajsakunaykichejkama mikhunkichej. Tukuy Atiyniyoj Señor Diosniykichejtataj yupaychankichej. Pay jatun t'ukuna imasta ruwan qankunarayku. Llajtayqa mana jayk'ajpis p'enqachisqachu kanqa.

²⁷ Qankunataj, Israelmanta runakuna, yachaychej, noqa Tukuy Atiyniyoj Señor kashasqayta qankunawan. Noqa Diosniykichej kasqayta, manataj aswan waj Dios kasqanta. Mana jayk'ajpis llajtayqa ujtawan penqaypi rikhurenqañachu!

Diospa Espíritun jamun

²⁸ Kay imas qhepata, Espirituyta jich'arimusaj tukuy runasman. Qhari wawasniykichej, jinataj warmi wawasniykichejpis, Noqaj sutiypi parlanqanku. Unay watasniyoj runas mosqokonqanku. Wayna runaspis mosqokullanqankutaj.

²⁹ Jinallataj wata runasman, qhari kajman, warmi kajmampis, jaqay p'unchaykunapeqa Espirituyta junt'achimusaj.

³⁰ Janaj pachapi jatuchej t'ukunasta rikhuchisaj. Jallp'apitaj rikhuchisaj yawarta, ninata, q'osñi jina phuyustawan.

³¹ Inteqa laqhaman tukonqa. Killataj yawarman jina tukonqa. Chay p'unchayqa mayta mancharinapaj jina Señorpa jatun p'unchay kanqa.

³² Señorpa sutinta qhaparikojkunaqa, tukuyninku wañuymanta salvakonqanku, imaraykuchus, Sión orqopi, Jerusalempi, salvación tarikonqa, Señorpa parlasqanman jina. Pikunatachá Pay ajllarqa, chaykuna kausanqanku.