Joel 1 - Qheshwa Biblia DC

Langostas chajrasta q'araykunku

¹ Kay willayqa Señorpa parlasqan, Petuelpa churin Joelman.

² Kurajkuna kaytaqa allinta uyariychej, jinallataj qankunapis kay llajtapi tiyakojkuna. Qankuna rikorqankichejchu jayk'ajpis kayman rijch'akojta? Tatasniykichejqa tiemponkupi kayman rijch'akojta rikojchu kanku?

³ Kaytaqa wawasniykichejman willaychej, paykunataj wawasninkuman willachunku, paykunatajrí willachunku qhepa tiempopi nacekojkunaman.

⁴ Langostasqa tukuy chajrasta mikhuykaporqanku. Puchojkunatarí, waj langostasñataj jamuspa mikhuykapullarqankutaj.

⁵ Machasqas, qankuna rijch'ariychej! Vinota ujyajkuna, waqayta qallariychej, imaraykuchus uvas ch'irwasqastapis qankunamanta qhechusonqanku!

⁶ Imaraykuchus langostasqa, uj atiyniyoj ejército jina, yupay mana atinataj, llajtayman junt'aykamunku, paykunaj kirusninkoqa orqo leompata jina, kolmillosninkuta china leompata jina.

⁷ Uvas sach'asninchejta q'araykunku, higos sach'asninchejta t'unaykunku, tukuyninta q'araykunku, ramasninta yurajllata saqerparinku.

⁸ Imaynatachus uj casarakoj sipas waqan luto p'achata churakuspa, paywan casarakoj novion wañupusqanrayku,

⁹ chay kikinta sacerdotes waqanku; imaraykuchus templopi mana kanñachu poqojkunaqa, ni vinopis ofrendata Señorman jaywanapaj.

¹⁰ Chajrasqa mana ima poqoyniyoj, q'arapachalla kashanku, jallp'astaj may llakisqas kashanku Trigoqa pierdekapun. Uvas sach'aspis ch'akirapunku. Olivo sach'astaj ch'akirasqallataj.

¹¹ Qankuna, campospi, uvas sach'aspitaj llank'ajkunaqa, llakiyniykichejpi waqaychej, imaraykuchus tarpoyqa, trigota oqharina, cebadata oqharinapis pierdekapun.

¹² Uvas sach'asqa ch'akirasqaña. Higos sach'astaj manaña kanchu. Chay granado sach'as, palmera sach'as, manzana sach'as, ajinallataj orqopi kaj tukuy sach'aspis ch'akirasqallataj tarikunku. Chaynejta tukuy runaj kusikuynin chinkapun!

¹³ Qankuna, altarpi sirvejkuna sacerdotes, qhasqa pachata churakuspa nanaywan waqaychej, imaraykuchus Diosniykichejpa templompi ofrendata qonapajqa, manaña kanchu ch'aki mikhuykuna, nitaj vinopis.

¹⁴ Runasta tantarqamuychej, ayunomantataj paykunaman willaraychej. Señor Diosninchejpa templompi tantaykuychej kurajkunasta, kay llajtapi tiyakoj tukuynin runastawan, Señormantataj qhaparikuychej.

¹⁵ Way, Señorpa p'unchaynin qayllamushanña! Chay jatun manchachej p'unchayqa tukuy atiyniyoj Diosmanta t'unaykuyta apamushawanchej!

¹⁶ Ñawisninchej qhawashajtillanraj mikhuyta qhechurawarqanchej. Diosninchejpa templompitaj kusikoyqa tukukaporqa.

¹⁷ Tarposqa mujoqa pachampi wañuraporqa. Trigopis ch'akiraporqa. Trojestaj thuñisqas kanku.

¹⁸ Uywaspis machayta waqarashanku! Wakaspis qhasillata pastosta mask'akushanku. Ovejastaj tropantin wañurapushanku.

¹⁹ Señor, qanta qhaparikamuyki. Nina ruphaykun ari ch'impi kaj qhorasta, jinallataj campopi kaj sach'astapis!

²⁰ Campopi k'ita animalespis qanta qhaparikamusunku, imaraykuchus, juch'uy mayuspi kaj yakupis ch'akipun! Campospi sumaj pastos kajtataj nina ruphaykapun!